DSE 考生最常犯嘅 7 個錯誤：由溫書方法到日常作息

明明每日都有溫書，Past Paper 又做咗唔少，點解成績仲係冇乜進步？

有時問題未必係你唔夠努力，而係你一直用緊嘅方法，未必真係最有效。DSE 備試唔係鬥邊個坐喺書枱前最耐，亦唔係鬥邊個買最多本補充練習。

以下 7 個錯誤，由溫書方法到日常作息都有。如果你發現自己中咗幾個，唔使即刻懷疑人生，識得調整就仲有改善空間。

1. 由頭理解晒所有概念，先開做past paper/mock

寫呢個 Post 嘅時候，距離 DSE 仲有 170 日。時間聽落好似仲有好多，但如果你每個課題都想由最根本嘅原理開始研究，等到自己覺得完全明白晒先肯操題，你會仆街。

唔係話你未完全理解一個概念，就代表你做唔到past paper/相關題目

例如你溫緊 Math core，未必完全明白公式背後嘅過程，但你已經知道公式點樣用，亦識得處理基本題型。

呢個時候，你完全可以先試下做 Past Paper，遇到唔識嘅地方再返去補底。

做題past paper就係學習嘅一部分。透過實際題目，你可能會發現自己邊度唔明、邊啲概念容易混淆，甚至會因為見到具體例子，先真正理解之前睇唔明嘅原理。

2. 做完 Past Paper、對完答案就當完成

做完一份 Past Paper，對完答案，見到自己攞到幾多分，然後就開下一份。

聽落好有效率？

如果你只係知道自己錯咗邊題，卻冇搞清楚點解錯，咁下一份卷遇到同類題目，你可能又會再錯一次。

例如 M2 某條題目計錯咗，你應該搞清楚究竟係概念唔熟、計算失誤、睇漏題目條件，定係根本唔識用嗰個公式。唔同原因，需要唔同嘅改善方法。

其他科目都一樣。如果英文 Writing 成日因為 point/idea 發展不足而失分，單純記低分數或者睇一次參考答案，未必可以解決問題。

做完練習之後，可以簡單記低：

• 錯喺邊度？
• 點解會錯？
• 下次遇到同類題目，應該點做？

唔需要整一本超精美錯題簿，亦唔需要將每題答案重新抄一次。最重要係下次再遇到類似題目時，你真係識做。

3. 成日溫自己擅長或者鍾意嘅科目

呢個真係好容易中。

假設你有一日放學返到屋企，打算溫三個鐘書。你有兩科要溫：一科係你比較有信心、做練習通常都識嘅科目；另一科就係你一直覺得好難，一打開 Notes 已經唔太想面對嘅科目。

你最後會揀邊科？

好多時，我哋都會自然地先溫自己比較熟悉嗰科。因為做題比較順利，容易有成功感，亦會覺得自己今日好似溫咗好多嘢。

相反，弱項可能做幾條題目已經卡住，睇答案又唔明，溫咗半個鐘都未必有明顯進展。久而久之，就更加唔想掂佢。

結果就變成：擅長嘅科目越溫越熟，弱項卻一直停留喺原地。

到考試前先發現某科仲有幾個課題唔識，就真係幾麻煩。

咁係咪應該將所有時間都放喺弱項？

No.

如果你某科本身已經掌握得唔錯，適量練習同保持手感當然有用。問題係唔好因為自己鍾意某科，就不斷將時間投放喺嗰度，而忽略其他更需要改善嘅地方。

例如你嘅英文閱讀理解已經相對穩定，但 Bio 仲有幾個基本課題成日失分，咁下一個溫習時段可能更值得用嚟補 Bio 嘅漏洞。

你可以每隔一段時間，睇下自己最近嘅練習表現、測驗分數同錯題紀錄，再決定下一步溫乜。

有時你最唔想溫嗰科，偏偏就係最值得你花時間嘅科目。

4. 花太多時間整靚 Notes，反而忽略真正溫習

筆記寫得整齊、有顏色分類、重點清清楚楚，的確會令人更容易閱讀。

但如果你花咗兩個鐘抄寫 Notes、畫線、改顏色同排版，最後只剩低半個鐘做練習，咁就值得諗下自己係咪用錯咗時間。

有啲人會不斷重新整理同一份筆記，覺得上次寫得唔夠好，今次要再整靚啲。結果同一個課題整理咗幾次，真正嘗試回憶內容或者做題嘅次數卻少得可憐。

其實，Notes 嘅作用係幫你理解同記住內容，而唔係參加筆記設計比賽。

如果某個課題已經有清楚嘅 Notes，你可以直接用現有材料溫習，再透過練習測試自己識唔識。真係有遺漏或者難以理解嘅地方，先補充返去就夠。

溫書嘅成果，應該係你識多咗幾多，而唔係你本 Notes 又靚咗幾多。

5. 為咗追進度，長期犧牲睡眠同日常作息

考試越近，越容易出現一種心態：「今日仲有咁多嘢未溫，點可以咁早瞓？」

於是本身打算十一點瞓，最後變成凌晨一點；本身只係想遲瞓一晚，最後幾乎日日都係咁。

偶爾因為測驗或者考試而調整作息，未必代表有問題。但如果長期靠減少睡眠去換取溫書時間，就可能得不償失。

睡眠同記憶鞏固、專注力都有關係。當你休息不足，第二日上堂可能更難集中，做練習亦容易因為疲倦而出錯。即使你夜晚多溫咗一個鐘，第二日狀態差到聽唔入書，未必真係賺咗。

而且，唔係每個人都適合同一種作息。有人習慣早起溫書，有人放學休息一陣先開始讀，都可以。重點係搵到一個自己可以持續執行、又有足夠休息嘅節奏。

與其每日靠爆肝chur進度，不如將目標定得實際啲，安排好優先次序，盡量保持穩定嘅睡眠時間。

DSE 備試係一場長期戰，唔係鬥邊個可以連續幾晚唔瞓。

6. 忽略老師批改、評語同建議

有時老師派返份卷，見到上面寫咗幾句評語，可能望兩眼就收埋；又或者老師喺課堂提醒某啲答題問題，聽完就算。

但其實，老師嘅批改同建議有時會指出你自己一直冇察覺嘅問題。

教咗多年嘅老師，通常見過唔少學生犯過嘅錯，亦可能知道某科常見嘅失分位。尤其係一啲重複出現嘅問題，例如答案唔夠精準、論點冇解釋清楚，或者明明識個概念但答題方式唔符合要求，老師可能比你更容易睇得出。

所以，如果老師話你某類題目成日失分，唔好只係覺得自己今次唔小心就算。可以問清楚究竟應該點改善，甚至直接拎返份卷去問：「老師，我呢度應該點寫先可以攞到分？」

（唔係每個老師嘅建議都一定有用）🚨

但至少，唔好未聽清楚就直接忽略。

有時你欠缺嘅唔係再做十份卷，而係有人幫你指出一直改唔到嘅問題。

7. 以為喺屋企溫書最方便，就一定最有效率

「去圖書館好麻煩喎，仲要搭車，來回可能成兩個鐘。留喺屋企咪仲好？慳返啲時間，又唔使咁攰。」

呢個想法其實好合理。尤其係屋企同圖書館距離遠，或者你本身已經好攰，特登出門口的確會增加成本。

但問題係：你留喺屋企之後，真係有將慳返嘅時間用嚟溫書嗎？

情境：同樣三個鐘，喺屋企 vs 去圖書館

假設你打算星期六下午溫三個鐘 Chem。

喺屋企，你覺得舒服又方便，唔使特登出門口。開始之前先睇一陣IG，溫咗半個鐘又想休息，之後屋企人行過同你講兩句，或者見到張床又想瞓一陣。

最後三個鐘過去，真正專心做題嘅時間可能比預期少好多。

另一邊，你去咗公共圖書館嘅自修室。周圍嘅人都喺度溫書，有人做緊 Past Paper，有人睇緊 Notes。你見到大家都好專心，自然都會想 Lock in，認真完成自己嘅進度。

呢種環境會帶嚟一種正面嘅競爭壓力。未必有人真係同你比賽，但當身邊嘅人都喺努力，你自己亦比較容易投入。

結果就算去圖書館要花交通時間，你仍然可能因為更專心，而完成更多有質素嘅溫習。

咁係咪一定要去圖書館？

又唔係。如果你喺屋企本身已經好專心，有一個安靜嘅書枱，手機亦控制得到，咁留喺屋企完全冇問題。

重點係了解自己喺邊種環境下最容易集中，而唔係單純選擇最方便、最舒服嘅地方。

有時，出門口去一個適合溫書嘅地方，反而先係真正慳時間嘅方法。

Honorable Mention：成日靠 Energy Drink 撐住溫書

Red Bull、Monster 呢類能量飲品，同學都飲過。尤其係考試前溫到好夜，或者朝早返學但又未瞓夠，就好容易諗住飲一罐提神。

偶爾飲一罐，同每日靠佢撐住自己，係兩回事。

能量飲品通常含有咖啡因。咖啡因會阻礙腺苷（adenosine）喺大腦發揮作用。腺苷參與調節睡意，清醒得越耐，睡眠壓力通常亦會逐漸增加。咖啡因暫時減弱咗睡意，令人感覺清醒啲，但唔代表身體真正需要嘅睡眠已經補返。(讀bio 應該識少少)

而且，咖啡因喺身體入面唔會即刻消失。佢可以留低幾個鐘，影響你夜晚入睡，形成「夜晚飲嘢提神、夜晚瞓得差、第二日更攰、再飲多罐」嘅循環。部分人亦可能出現心跳加快、手震、焦慮或者胃部不適等反應。

睇吓 美國兒科學會 “The Buzz on Energy Drinks” (英文)

https://www.cdc.gov/school-nutrition/energy-drinks/

對中學生嚟講，最好避免飲用能量飲品。美國兒科學會建議青少年避免能量飲品，香港食物安全中心亦提醒，兒童唔適合飲用能量飲品，而過量攝取咖啡因可能引致睡眠問題、心悸等不良反應。

如果你已經成日要靠 Red Bull 或 Monster 先有精神溫書，可能值得先檢視自己嘅睡眠同溫習安排。

畢竟，能量飲品可以暫時令人清醒，但代替唔到真正嘅休息。