以為Asso/HD穩升大學？拆解副學位「90%升學率」背後嘅文字遊戲

副學位「升學率」實際上係咩一回事

放榜前後，總會聽到呢句：「讀HD/AD都得啦，人哋升學率9成幾，遲兩年一樣入到大學。」阿Sir講、阿爸阿媽講、連學店個sales都會咁講。呢句嘢唔係大話，但佢絕對唔係你以為嘅意思。

呢篇文唔係想話 Associate Degree/Higher Diploma 呢條路唔值得行，事實係好多人真係靠呢條路翻身。但「升學率90%」呢個數字被人講到好似「9成人都入到大學」咁，中間隔咗好幾層文字遊戲，你唔拆穿佢，就會用錯誤嘅期望嚟賭自己嘅兩年青春。

呢篇文入面用嘅所有數字，全部來自院校官方公布嘅升學調查，同埋教育局轄下「自資專上教育資訊平台(cspe.edu.hk)」嘅公開實際收生/畢業生數據，冇一個係我哋估出嚟。你隨時可以自己上去核實。文入面亦會清楚講明邊啲係官方數字、邊啲係我哋自己計出嚟嘅推算，唔會混為一談。

1. 你以為嘅90%，同官方嘅90%，唔係同一個90%

先由最新一屆嘅HKCC(PolyU HKCC)數字講起：

*2024年呢個67.5%嘅數字同其他年份跳動幅度好大，官方冇進一步拆解定義，有可能包含咗更闊嘅「政府資助課程」類別而唔淨止UGC-funded senior year。呢個位我哋搵唔到再細嘅拆解，所以只可以話：睇呢類數字嘅時候，見到同一個院校自己都有前後矛盾嘅年份，就要更加小心，唔好照單全收。

留意呢張表最右邊三條column嘅落差。官方主打嘅「升學率90.4%」係指「升讀學士學位課程」呢一個好闊嘅類別，入面包咗：

• 八大UGC資助嘅高年級學位(即係你腦入面嗰個「返到大學」)
• 八大自資top-up學位(讀嘅係八大，但你要俾全費，冇資助)
• 其他院校嘅自資學位(包括SPEED、樹仁、恒生大學等等)
• 海外升學

即係話，個「升學率」個分子，係將以上所有加埋一齊嘅人數，除返個畢業生總數。你想像緊嘅「入到大學」，其實喺呢90.4%入面，得返53.2%先算數。

HKU SPACE CC 嗰邊嘅拆法反而透明啲，直接分開講：

信報教育2024/25彙整嘅版本就寫成：香港大學專業進修學院副學士升大學率約84%，其中72%讀政府資助學位，23%讀本地自資學位，5%讀本地銜接學位。留意呢度連「84%」定「86%」都對唔上，呢個唔係邊個講大話，係唔同時間點/唔同來源計法有出入 — 呢個現象本身已經證明咗，呢類數字有幾多灰色地帶。

順帶一提，香港浸會大學國際學院(HKBU CIE)嘅副學士升學率官方講法係91%，其中83.9%升讀八大院校頒授學位課程。呢個數字表面睇比HKCC同HKU SPACE都高，但HKBU CIE個「83.9%升讀八大」入面，同樣冇拆清楚幾多係UGC資助、幾多係八大自資top-up，所以呢個91%都要用返同一套邏輯去拆先可以判斷。呢篇文暫時搵唔到HKBU CIE獨立嘅UGC資助升學百分比，如果你有讀緊/報緊呢間院校，建議直接向院校查詢清楚呢個細節，唔好單憑91%呢個headline數字做決定。

更隱藏嘅開關：分母都可以換 ⁉️

上面講嘅係分子嘅把戲(將乜嘢都計做「升咗學」)。仲有一個更少人留意嘅位，係分母。

官方「升學率」嘅分母，係「畢業生人數」，唔係「當年入學人數」。

呢個聽落好合理，但你診真啲：一個院校讀AD/HD兩年，中間有人degree-hop轉去其他學校、有人retake DSE走人、有人讀唔到書自己退學、有人因為個人原因休學。呢班人根本冇機會出現喺「畢業生」呢個分母入面 — 佢哋喺計數之前已經被踢走咗。

即係話，如果你第一年入學嘅時候有100人，兩年後可能得返85人畢業，官方個「升學率90%」係計緊嗰85人入面嘅90%，唔係嗰100人入面嘅90%。

呢個唔係惡意隱瞞，係呢類統計嘅common practice(大學JUPAS嘅畢業率、就業率統計都係用返類似邏輯)。但對於一個仲未入學、單憑個90%數字去決定人生方向嘅DSE考生嚟講，呢個落差絕對有殺傷力。

暫時搵唔到官方公開嘅AD/HD兩年流失率(dropout/degree-hop rate)，冇院校會主動公布呢個數字，合理但唔代表冇 — 呢部分我哋只可以合理懷疑,唔可以當事實講。如果你有讀緊/讀過AD/HD，見到你嗰屆入學同畢業人數有明顯落差，歡迎comment分享。

自己動手計一次 — 用真實收生數字拆返三層嘢出嚟

呢部分先係全篇文最重要嘅位。我哋直接用自資專上教育資訊平台(cspe.edu.hk)「進階數據搜尋」度攞返嘅官方原始數字，一步步拆俾你睇。呢啲唔係推算，係實際收生同實際畢業人數，白紙黑字。

先講清楚方法論嘅一個關鍵位：AD/HD係兩年制課程，即係話某一屆(例如2020/21學年)入學嘅學生，正常情況下會喺下一個學年(2021/22)畢業，唔係兩年後。配對嘅時候要用「入學年 → 入學年+1」嚟做一對，唔係「入學年 → 入學年+2」，呢個位好多人(包括嗰張LIHKG截圖)都配錯咗。

第一層：入學人數（實際收生，官方cspe數字）

留意呢度已經有一個好值得留意嘅趨勢：HKCC嘅收生人數近幾年持續下跌(由5,004跌到4,072)，同期HKU SPACE就大幅上升(由3,271升到6,002，五年內幾乎翻倍)。呢個現象背後原因(例如收生策略轉變、DSE考生人數下跌、院校競爭)呢篇文唔展開講，但值得你知道呢個大環境喺變緊。

第二層：畢業人數（正確配對「入學年+1」之後）

呢個先係全篇文最勁嘅發現：兩間院校嘅完成率大約企喺66%至79%之間，即係話每10個入學嘅人，大約有2至3個人喺兩年內冇準時畢業。呢個唔係推測，係用官方公開嘅實際收生同實際畢業人數直接除出嚟。

呢度要老實講清楚：「冇準時畢業」唔等於「讀爛咗」或者「被踢走」。入面實際包含好多可能性：

• 中途轉去其他院校/科目(degree-hop)
• 中途retake DSE走人，改行返JUPAS
• 個人原因休學，遲一年先畢業(呢批人會被計入落後一屆嘅畢業數字，唔算完全流失)
• 真係讀唔到書而退學

呢個數字冇拆到邊個原因佔幾多，所以「完成率」呢個講法比起話「流失率」更加中性、更加準確。我哋喺呢度想帶出嘅重點唔係話兩年制好難捱，而係想指出：單單「準時完成兩年」呢一關，已經有相當比例嘅人未必做到，呢個係報名嗰刻好少人會診到嘅風險，卻完全冇喺任何官方「升學率」宣傳入面出現過。

第三層：畢業之後，先至到「升唔升到大學」呢條問題

呢層先係我哋喺第1節已經討論過嘅官方「升學率」/「UGC升學率」數字(例如HKCC 2025年畢業生升讀UGC資助學位53.2%)。呢個53.2%嘅分母，係院校自己個畢業生升學調查，唔係cspe官方嘅畢業人數。

我哋刻意唔會將第二層嘅完成率同第三層嘅官方UGC升學率直接相乘，去計一個「終極真實升大學率」，原因係：

呢兩組數字嘅分母根本對唔上。用HKCC 2022/23畢業(3,318人，cspe官方數字)嗰屆做例：院校自己個升學調查話有2,611人升讀學士學位課程，達90.1%，即係話呢個調查嘅樣本基數大約係2,611 ÷ 0.901 ≈ 2,897人 — 同cspe官方畢業人數3,318人比較，中間少咗成420人。呢個落差可能來自調查回應率唔係100%、又或者調查範圍冇覆蓋全部畢業生(例如淨計全日制、唔計兼讀)。我哋搵唔到院校公開解釋呢個落差嘅具體原因，所以強行將兩個唔同基數嘅百分比相乘，只會製造一個睇落好精確但其實冇根據嘅「假數字」。

三層數字總覽(以HKCC做例子)

三層數字分開睇，你先會見到成個圖畫：由入學嗰刻開始，先要捱過「準時畢業」呢關(約7成人做到)，捱過之後先入到「升唔升到UGC資助學位」呢場競爭(官方講約5成幾)。兩場關卡分開睇已經好清楚話俾你聽，「90%升學率」呢個數字，同你由入學嗰日開始實際會面對嘅路，中間隔咗好幾層。

點解院校會用呢個講法？

睇到呢度，你可能會問：院校係咪特登想呃學生？

比較合理嘅講法係：呢個唔一定係「呃」，而係一個雙方都有誘因維持嘅局面。院校每年要爭收生，「升學率9成」係一個好強嘅招生賣點，寫喺宣傳單張度好睇、好記；學生同家長聽到「9成」又會覺得安心，唔會再深究個定義。兩邊都冇特別誘因去講清楚「9成入面有幾多先係UGC資助」，因為呢個細節只會令個數字睇落冇咁靚。

呢個現象其實喺好多升學宣傳入面都會見到，唔淨止AD/HD，八大院校自己講「就業率」、「起薪點」嗰陣，都可能用緊類似嘅手法(例如「就業率」都包埋讀緊碩士嘅人)。所以呢篇文想帶出嘅唔淨止係AD/HD呢一個case，而係一個通用嘅睇數字方法：見到一個好靚嘅百分比，先問返分子分母分別係咩，先決定信幾多。

全港嘅池有幾大？

就算你個人成績幾勁，都要知道成個game嘅規模。

即係話，全港每年大約2萬幾人讀緊AD/HD，但真正嘅UGC資助「返大學」門，全港淨係5,000個位，仲要八間院校嘅所有AD/HD畢業生一齊爭。你讀邊間院校、邊個科系，某程度上決定咗你响呢5,000個位入面有幾大機會 — 但呢個位本身已經話俾你聽，個90%點都唔可能全部指嗰5,000個位度。

呢個「pool」仲有一個你未必診到嘅細節：5,000個UGC senior year學額，唔淨止AD/HD畢業生會爭，仲有其他自資院校(例如樹仁、恒大、都會大學嘅副學位畢業生)、甚至海外副學位持有人都可以透過Non-JUPAS途徑一齊申請。即係話，你以為淨係同自己院校嘅同學仔競爭，實際上係同全港(甚至部分境外)嘅副學位畢業生一齊爭緊呢5,000個位。呢一點喺你揀科、揀院校嘅時候，都應該計落個心理預期入面。

唔同院校點計法都有出入，唔可以直接攞嚟比較

見到呢度你可能會問：咁HKCC定HKU SPACE邊間好？

老實講，單憑呢啲官方「升學率」數字，你係比較唔到嘅 — 因為兩間院校個定義、拆分方法、甚至幾時公布數字都唔一樣。HKCC將UGC資助同自資分開列，HKU SPACE有時會將AD/HD分開講，有時又會合埋一齊講「升學率」。你冇辦法用一個數字對另一個數字。

想認真比較呢兩間院校邊個對你嚟講更加合適，我哋另外寫咗一篇專門攞晒兩邊嘅收生要求、學費、科系選擇、同真實升學路徑嚟做對比，戳呢度睇：

咁即係話Asso/HD唔值得讀？

唔係。

呢篇文由頭到尾都唔係想話讀AD/HD係浪費時間，或者呢啲院校係學店呃你錢。事實係，每年真係有成千上萬人靠呢條路成功返到大學，甚至讀到八大裏面收生要求好高嘅學系。呢條路行得通，行得通嘅人絕對唔少。

但「行得通」同「9成人都行得通」係兩件事。

真相係：讀AD/HD唔係一張「穩上大學」嘅入場券，佢係「畀多你一次機會去搏」。你嗰兩年會唔會成為升到UGC資助學位嗰53%(甚至更少)，定係跌入去讀自資top-up、甚至讀完都冇書再讀嘅嗰班人，好大程度上取決於你入學嗰刻開始嘅每一個決定 — 唔係你report張入學offer嗰刻已經注定。

呢個道理其實同DSE本身冇分別：好多人以為「入到大學」就等於「贏咗」，但入到之後嘅每一日先係決定你最後拎住咩出嚟嘅關鍵。AD/HD只不過係將呢個道理提前咗兩年開始。

咁點樣先唔會跌入嗰47%？

如果你已經決定行AD/HD呢條路，或者放榜之後好可能要行呢條路，以下係幾個具體到你可以即刻執行嘅方向，唔係空泛嘅「努力啲」。

由第一日開始計GPA，唔好等到第二年先醒

UGC senior year嘅Non-JUPAS申請睇嘅係你成個AD/HD期間嘅累積GPA，唔係淨睇你第二年嘅表現。好多人第一年抱住「先玩下，第二年先認真」嘅心態，結果第一年幾科3.0-3.3拖累咗成個平均分，第二年就算攞成日4.0都拉唔返個平均。你要當呢兩年由入學第一個禮拜開始，就已經係一場為期兩年嘅公開試。

揀科唔淨止睇興趣，要睇「銜接路徑」清唔清晰

有啲AD/HD科系同UGC資助學位嘅銜接位好清楚(例如商科、工程、資訊科技呢啲，因為八大呢方面嘅senior year學額比較多)，有啲科系(尤其偏門嘅設計、傳理類)嘅UGC銜接位反而少，競爭更加激烈。報名前，唔好淨係睇個科系名靚唔靚，要具體去查返嗰個科系過去嘅畢業生實際銜接咗去邊，同埋嗰個方向嘅UGC senior year學額大概有幾多個(理大最多1,750個，其他院校分嘅份額少好多)。

認清邊科係「大路科」，邊科係「細眾科」

大路科(商業、資訊科技、工程)嘅UGC對應學額多，你嘅GPA排名喺同儕入面唔使太前都有機會爭到。細眾/偏門嘅科目(例如個別藝術、設計類)UGC對應學額本身就少，即使你個人成績唔差，都可能因為個池太細而爭唔到。呢個唔係叫你唔好跟興趣揀科，而係你要清楚知道自己揀嘅科屬於邊一種局面，然後調節返自己嘅心理預期同埋讀書強度。

Non-JUPAS申請唔淨係睇成績，面試/自我陳述都要準備

同DSE直接JUPAS唔同，AD/HD升讀UGC senior year嘅Non-JUPAS申請好多學系都有面試環節，甚至要求你交portfolio或者自我陳述。呢部分好多人完全唔當一回事，覺得「淨係睇GPA」，結果臨急抱佛腳，喺個環節輸俾GPA差過你但表現得更加清楚自己想讀咩嘅對手。由第一年開始，就要診清楚你想讀邊間大學邊個學系，同埋點解 — 呢個答案你要喺面試果日之前已經講到好流暢。

唔好將所有蛋放喺「一定要入UGC資助」呢個籃

自資top-up學位唔係世界末日，但你要喺入學果刻已經診清楚，如果最後真係要行呢條路，你係咪負擔得起、值唔值得。與其到第二年先臨急臨忙揾自資學位做保底，不如喺第一年中段已經開始平行留意返呢啲選項，甚至海外升學(英澳嘅3年制課程接受AD/HD第一年成績申請)嘅路，早啲部署你就有更多選擇權，唔使去到最後一刻先被迫揀。

定期check返自己嘅實際位置，唔好靠感覺

每個sem完，攞返自己個GPA同院校過去公開嘅UGC升學data(如果有嘅話)做個粗略對比，睇下自己而家企緊喺邊個位置。唔使太執著，但至少每半年做一次reality check，好過到最後一個sem先發現自己個GPA同目標學系嘅門檻有段距離，冇時間補救。

善用院校內部嘅升學輔導資源，唔好淨係靠自己估

HKCC同HKU SPACE呢類院校通常都有專門嘅升學輔導部門/senior嚟舉辦分享會，講解過往邊個科系、邊個GPA range嘅人成功銜接去邊。呢啲資訊好多時比起自己上網估更加貼近現實，因為佢哋手上有最新一屆嘅實際銜接數字。好多學生兩年入面一次都冇行過呢啲資源，其實好浪費 — 你已經俾緊學費，呢啲服務理應盡量用盡。

常見問題

Q: 完成率(66%-79%)入面嘅「未完成」，係咪即係讀爛咗？

唔一定。上面已經講過，呢個數字入面包含轉校、retake、休學等多種情況，唔淨止係「讀唔到書」。但無論原因係咩，重點係：入學嗰刻你有一定機會唔會準時喺兩年後畢業，呢個係你應該有心理準備嘅風險，唔應該假設自己一定係嗰七至八成。

Q: 邊間院校嘅完成率高啲？HKCC定HKU SPACE？

由呢四屆數字睇，HKU SPACE嘅完成率(74.4%-78.6%)整體上高過HKCC(66.3%-76.0%)，而且HKCC近兩屆(2021/22、2022/23入學)嘅完成率明顯比2019/20嗰屆低。但呢個對比只反映緊「準時畢業」呢一環，唔代表HKU SPACE嘅畢業生升UGC嘅比例就一定更高(呢部分要睇返第1節嘅官方升學調查數字，兩者唔可以混為一談)。

Q: 副學士(AD)同高級文憑(HD)邊個完成率高啲？

呢篇文用嘅係cspe「副學士+高級文憑」合併嘅數字，冇拆開AD同HD分別嘅完成率。如果你想知道自己想報嗰個specific科目嘅獨立數字，可以用返cspe個「進階數據搜尋」，喺「學科級別」入面淨勾選你想睇嗰一項，再揀返對應院校同學年，就可以攞到更貼身嘅數字。

Q: 咁我應該點用呢篇文嘅數字？直接放棄報AD/HD？

唔係咁極端。呢篇文嘅目的係幫你調整心理預期，唔係叫你唔好報。如果你嘅DSE成績真係入唔到心儀嘅JUPAS學位，AD/HD依然係一條可行、甚至係最實際嘅路。差異在於：你而家報名嗰刻，應該將自己定位為「要打好呢場仗」，而唔係「已經買咗張入場券，等兩年後自動轉車」。心態啱咗，你先會由第一日就認真對待GPA、對待科系選擇，而唔係到第二年先驚醒。

Q: 呢啲cspe數字，一般人自己都可以查到？

可以，完全免費公開。上cspe.edu.hk，揀「進階數據搜尋」，選擇項目揀「實際收生」或「畢業生」，跟返呢篇文嘅方法揀學年、學科級別(副學士學位/高級文憑)、院校，就可以攞到原始數字，自己核實一次呢篇文嘅計法，甚至攞嚟計你自己心儀嗰間院校、嗰個學科嘅獨立數字。

Q: 呢啲數字幾時會變？

會。教育局同院校每年都會更新呢啲數字，尤其HKCC近年收生人數持續下跌、HKU SPACE持續上升呢個趨勢，反映緊成個副學位市場都喺變緊。呢篇文用嘅係截至2025年中搵到嘅最新公開數字，如果你睇緊呢篇文嘅時候已經過咗一段時間，建議自己上返cspe.edu.hk 核實返最新一屆嘅數字。

以上呢啲步驟，冇一樣係「一步到位」，但每一項都係你由入學第一日就可以開始做嘅嘢。個「90%升學率」呢個數字本身冇錯，錯嘅係大部分人冇拆開佢嚟睇。你而家已經知道點拆，接落嚟嘅兩年，就睇你點行。

如果你仲喺考慮緊AD/HD以外嘅升學組合，或者想睇清楚自己DSE成績大約可以報邊啲JUPAS學系，可以用返我哋嘅工具做個初步預算：

資料來源

• HKCC 畢業生升學總覽（2020-2025年官方數字）
• PolyU HKCC 2024年畢業生升學調查報導
• HK01｜DSE放榜 PolyU HKCC升學率逾9成報導
• 尋補・Blog｜副學士及高級文憑手冊（2021年HKCC數字）
• 信報教育｜副學士高級文憑分別（HKU SPACE / HKCC / HKBU CIE 2024/25數字彙整）
• HKU SPACE Community College｜副學位院校一覽
• HKU SPACE CC｜理學副學士升學數字
• HKU SPACE CC｜升學途徑統計
• HKU SPACE CC｜升學統計 Facts & Figures
• HKU SPACE CC｜升學策略 Q&A（UGC高年級學額5,000個）
• 自資專上教育資訊平台（cspe.edu.hk）進階數據搜尋（實際收生／畢業生原始數字）
• 自資專上教育資訊平台｜申請資訊及收生安排
• 自資專上教育資訊平台｜最新消息（指定專業／界別課程資助計劃學額詳情）
• 自資專上教育資訊平台｜專上教育主要統計數字
• HK01｜DSE 學士及副學位共45,500個學額報導（2023/24學年總學額數字）
• Student.hk｜副學位簡介：副學士高級文憑（UGC高年級學額5,000個，理大1,750個）