【Non-JUPAS攻略】Personal Statement點寫？｜每間大學要求、寫法結構、範文參考 (2027)

Sem 1 啱啱開學，Non-JUPAS 又陸續開始收申請。如果你讀緊 Asso 或者 HD，呢幾個月除咗顧住 GPA、文件同推薦信，仲有一樣好多人一諗起就頭痛嘅嘢：Personal Statement（個人陳述）。

簡單講，Personal Statement 就係一篇英文短文，主要係答一個問題：

「點解大學要收我？」

唔係將你份 CV 再寫一次，亦唔係將成績單逐項翻譯成英文，而係畀收生嗰部門多一個途徑認識你除咗成績之外，你點解想讀呢科、做過啲咩，同埋你點解適合呢個課程！

呢篇主要講 Asso / HD 學生報 Non-JUPAS Year 1 同 Senior Year 嘅 Personal Statement。IB、A-Level 或者其他學歷嘅申請玩法未必一樣，所以如果你係其他學歷，下面呢套寫法唔好直接照跟。

每間大學 Personal Statement 要求一覽

先講最重要嘅：香港唔同大學對 Personal Statement 嘅玩法其實唔一樣。有啲課程會要求，有啲只係建議提交，亦有啲 programme 會有自己指定嘅表格或者題目；就算同一間大學，唔同課程、唔同申請組別都可能有少少分別。

所以以下張表可以當快速對照，畀你先知道大概點玩，但真正交之前，始終要返去睇你今年報嗰個 programme 嘅官方要求。

字數上限係天花板，唔係目標。實際應該寫幾長，要睇你報嗰個課程有冇指定，同埋你究竟有幾多有用內容可以寫。

Personal Statement 有幾重要？

先唔好將 Personal Statement 想像到太神奇。Non-JUPAS 始終係大學收生，學業成績同基本入學要求一定係重要一環；如果 GPA 或者其他條件本身已經差好遠，單靠一篇文通常唔會突然扭轉成個申請。

但反過來講，亦唔代表 Personal Statement 可以求其寫。當幾個申請人嘅學業背景相近，而其中一個可以清楚講到自己點解揀呢科、做過咩、從中學到咩，另一個就只係寫「我一直對呢個領域充滿熱誠」，兩份申請畀人嘅感覺自然會差好遠。

如果個課程有面試，Personal Statement 仲可以變成面試前其中一份重要材料。你寫過嘅經歷、興趣同選科原因，都有可能變成面試問題；寫得具體，至少收生嗰邊有嘢可以問你，你自己亦比較容易接得返落去。

至於冇面試嘅課程，佢就更加係其中一個畀你自己補充資料嘅位置。成績表可以話畀大學知你讀成點，但 Personal Statement 就可以話畀佢知，你點解想讀呢科，同埋你究竟做過啲咩。

不過，唔使太糾結「Personal Statement 究竟佔幾多分」先決定點寫！反而諗下：如果大學只係睇你份申請文件，除咗 GPA 同成績表之外，仲有咩可以畀佢知道你係一個點樣嘅申請人？

落筆之前，先搵齊你自己有咩可以寫

好多人成日話自己「英文唔夠好，所以唔知點落筆」，但其實真正卡住嘅位通常唔係英文，而係你未諗清楚自己究竟有咩材料。

可以由四個方向開始諗，唔使全部塞入最後份 Personal Statement；先brainstorm下先，之後再慢慢揀邊啲真係值得寫。

點解想讀呢科

唔好淨係寫「因為我有興趣」。諗下你幾時開始有呢個興趣，中間有冇一件事令你由「覺得幾有趣」變成「我真係想繼續讀落去」。

你實際做過啲咩

Project、比賽、學校科目、實習、兼職、自己整過嘅 website 或 app、課外閱讀、義工，甚至你自己長期研究緊一個題目，都可以寫。呢

你從中學到咩

呢樣反而係最多人漏咗。你參加過一個比賽，唔代表大學會因為「參加過比賽」四個字就對你另眼相看；

真正有用嘅係，你喺入面遇到過咩問題、點樣處理，同埋件事有冇令你對呢個領域有新睇法。

點解你想讀呢個課程

睇下 programme structure、課程內容、專修方向，諗下有邊幾樣真係吸引你。唔需要逐個課程內容塞入篇文，而係要講得出：「我之前做過呢樣嘢，所以我而家特別想學呢樣。」

咁樣先會由「我想讀呢科」變成「我知道自己點解想讀呢科」。

一份定幾份？ 報幾科點寫

唔同大學嘅做法唔一樣，所以首先要搞清楚自己係交一份共用嘅 Personal Statement，定係每個 programme 都有自己嘅題目或者表格。

如果一份文要畀幾個志願共用，最好一開始就諗清楚自己報嘅方向有幾接近。

假設你幾個志願都係商科，咁你可以集中講自己對商業、數據分析或者某個相關方向嘅興趣，寫出嚟自然會比較完整。

相反，如果你一邊報商科，一邊又報完全唔同嘅文科或者健康科學，一份共用嘅 Personal Statement 就會比較難寫。因為每個 programme 都想提少少，最後反而變成乜都講，但冇一樣講得深入。

如果 programme 有指定題目或者表格，就直接跟返要求寫。人哋問你「點解想讀呢個專業」，就集中答返呢條問題，唔好硬塞一份通用稿入去。

文章主結構：點解 → 證據 → 反思 → 點解係呢科

其實成篇文唔需要有一個死版嘅格式。通常最順嘅寫法，就係由「我點解開始對呢科有興趣」講起，再帶到自己真正做過嘅嘢，講下呢啲經歷令你學到或者發現咗啲咩，最後先落返去「所以我而家點解想讀呢個課程」。

例如你話自己對 AI 有興趣，下一句就唔好再講「我對 AI 充滿熱誠」。你可以直接講自己整過一個 project，過程中撞到咩問題；再講正正因為嗰次經歷，你發現自己想深入學某一方面。最後先帶返去你申請嘅 programme，講點解佢啱啱好可以接住你而家想學嘅嘢。

有比賽，可以寫比賽入面真正做過嘅嘢。

冇獎項，都可以寫 project。

甚至你而家讀緊 Asso，本身個課程入面某一科令你突然發現自己想轉方向，都已經可以成為一條幾完整嘅故事線。

所以唔好將成篇變成「我好叻、我好有熱誠、我有好多夢想」。收生嗰邊真正可以從你篇文了解嘅，始終係你做過啲咩，同埋你點樣由呢啲經歷行到今日。

點解揀呢科先唔會變廢話

呢一部分通常最容易寫到好空泛。

例如：

"I have always been passionate about technology since I was young."

問題唔係文法，而係讀完之後仲係唔知道你做過咩。

與其由「我一直都好有興趣」開始，不如直接由一件具體嘅事講起：你整過咩、研究過咩、遇到過咩問題，或者邊一次經歷令你開始認真諗自己係咪想繼續讀呢個方向。

你唔一定要有一個好戲劇性嘅故事。普通嘅經歷一樣可以寫，只要你講得出點解開始、做過咩、之後發現咗咩。

唔同科可以寫啲咩？

以下唔係範文，只係畀你感受下「具體」可以去到幾盡，唔係叫你照住套格式寫。

商科

與其話自己自細鍾意做生意，不如講你做過咩小型項目，或者研究過邊間公司嘅咩操作令你好奇，再講你之後想學咩工具去驗證自己嘅諗法。

護理

唔使特登講「我好有愛心」。如果你做過義工或者見習，可以講一次實際見到嘅情況，令你發現護理工作同原本想像有咩唔同，以及點解你接受到呢種工作方式。

工程

可以寫你整過咩、砌過咩、參加過咩比賽，甚至係自己慢慢試嘅 project。中間遇到咩技術問題，你點樣拆解同解決，呢啲通常比一句「我夢想成為工程師」有用。

社科

可以由一個令你好奇嘅社會議題開始，講你點解會去搵資料、睇過邊啲角度，以及最後發現個問題原來比最初想像複雜。

如果你係 Asso 轉方向

呢個反而係你幾值得用嘅材料。

你可以直接講自己而家讀緊咩，其中邊科或者邊個功課令你開始發現，原來自己真正想行嘅係另一條路。

由現有學習經歷一路講到下一步選擇，本身就已經係一條幾自然嘅故事線，亦係 DSE 直入嘅申請人未必有嘅材料。

冇咩課外活動點算？

呢個係好多 Asso 同學都會問嘅問題。

其實 Personal Statement 唔等於獎項清單。冇一大疊證書，唔代表冇嘢寫。

自己整過 website、寫過 app、長期研究一個題目、睇過相關書或者文章、做過 personal project，呢啲全部都可以成為材料。

尤其係 Asso / HD 學生，本身未必人人都有一大堆比賽或者獎項，所以唔需要為咗令份 Personal Statement 睇落好似好豐富，而硬搵十樣活動塞落去。

一件自己真正做過嘅事，如果你可以講清楚點解開始、途中遇到咩問題、最後學到咩，已經可以寫成一段完整內容。

如果你真係咩都冇？

而家仲有時間嘅話，與其周圍搵啲一日體驗活動去填版面，不如認真睇一次課程內容。

搵兩三個你真係有興趣嘅課程方向，諗清楚點解吸引你，已經比為咗湊數而塞一堆冇乜關係嘅活動好。

常見伏位

有幾種寫法真係好常見，而且好多時唔係英文差，而係寫作方向一開始已經歪咗。

① 一開頭就講「我一直都好有熱誠」

"I have always been passionate about..."、"Since I was a child..." 呢類句子唔一定錯，只係資訊量太低。

如果後面都冇具體經歷接住，成段好容易變成空話。

② 將 CV 再抄一次

GPA、IELTS、獎項、參加過咩活動，如果系統本身已經有得睇，就唔需要再用一大段 Personal Statement 重複。

篇文更加值得用嚟補充嘅，係你點解做過嗰件事、從中得到咩，同埋佢點樣影響你揀科。

③ 花太多篇幅讚大學

"HKU is a world-renowned university with excellent professors."

呢啲說話大學自己當然知，唔需要由你提醒。

與其讚佢世界知名，不如講清楚你對課程入面某個方向有興趣，以及點解嗰樣嘢同你之前嘅經歷接得上。

④ 英文靚得太過頭

每段都充滿 "Moreover"、"Furthermore"、"This experience has taught me..."，句句都好完整，但睇完之後又講唔出你究竟做過咩。

英文唔需要寫到好浮誇，最緊要係睇得明，而且真係有嘢講。

⑤ Copy and paste 完冇再睇

一稿多投嘅時候，記得逐份檢查。

大學名、programme 名、課程內容甚至課程編號都有可能因為 copy and paste 出錯。呢啲唔係文筆問題，而係交之前應該直接檢查清楚。

⑥ 最後先諗字數

如果官方有明確上限，就一開始已經照住個上限寫。

冇指定嘅話，可以先寫一個完整版本，再按實際需要刪減。通常會比一開始寫到好長，最後先大刀闊斧咁剪容易控制。

⑦ 用舊資料寫課程

課程名稱、課程內容、入學要求呢啲資料，最好都對返最新官方頁面。

舊年有嘅課程內容，今年未必仲有；網上其他人嘅文章更加可能已經過時。AI 可以幫你整理資料，但最後都應該自己核對返官方資料。

仲有一個幾多人會忽略嘅位

唔好為咗令篇文「有故事」而硬塞人生故事。

冇童年陰影就唔使作，冇感人轉折就唔使編。假故事好易喺面試被問兩句就散。

反而你真真正正做過一件普通嘅事，再講清楚自己點解做、途中遇到咩、最後學到咩，通常更加可信。

AI 可以點用？

2026 年唔使扮自己完全唔用 AI。真正要留意嘅唔係「有冇用 AI」，而係你用 AI 做緊乜。

用 AI 執稿，通常幾有用。

例如：

• 整理你已經有嘅思路
• 睇下有冇內容重複
• 檢查英文文法
• 幫你由 600 字壓到 400 字
• 扮收生老師問你幾條問題，睇下篇文有冇位一問就穿

呢啲都係幫你處理文字或者測試內容，而唔係幫你虛構一個申請人。

最唔應該做嘅，就係由零開始叫 AI 幫你「製造」一份好勁嘅 Personal Statement。

你冇做過嘅 project、冇攞過嘅獎、冇參加過嘅義工，唔應該因為 AI 話咁樣寫會更加有說服力就加落去。

同樣地，如果 AI 幫你改到篇文充滿你平時根本唔會用嘅字，亦未必係好事。

其實有個幾簡單嘅測試：

遮住個名，再讀一次。

你自己會唔會一眼就認得出，呢篇真係你寫嘅？

如果連你自己都覺得好陌生，咁就可能改得太過火。

範文參考：一個普通商科生點寫

下面係一篇示範，背景設定係一個讀緊 Associate in Business Administration 嘅學生，報 BBA 或者管理相關課程。故意唔寫到好誇張，冇咩大獎，冇咩神奇實習，就係一個普通 Asso 商科生會遇到嘅 group project。重點係睇下佢點樣由一件普通經歷，寫到自己點諗。

呢篇係寫作示範，唔係叫你抄去交。每間大學同課程嘅要求都唔同，你始終要按自己經歷同報嗰科改。

I became interested in business through something fairly ordinary: working on a group project during my Associate in Business Administration studies. At first, I mainly saw it as an assignment that needed to be completed. As we worked on a marketing plan for a product, though, I became more interested in why some ideas worked better than others and how businesses make decisions when they have limited resources.

My group initially focused on creating an attractive promotion and deciding what features we thought customers would like. When we started researching the target market, however, we realised that some of our assumptions were not supported by the information we found. We changed our target customers and adjusted our marketing strategy accordingly. This made me realise that a business decision is not simply about having a good idea. Understanding customers and using information to support a decision can be just as important.

After that project, I started approaching other assignments differently. Instead of deciding on an idea first and looking for information afterwards, I became more interested in researching the market before deciding what I thought would work. I also found that I enjoyed bringing different pieces of information together and using them to make a clearer recommendation.

My associate degree studies have given me an introduction to different areas of business, but they have also shown me that I want to understand these subjects in greater depth. I am particularly interested in management and marketing because they involve both analytical decision-making and an understanding of how people and organisations behave. I am applying for undergraduate study because I want to build on this starting point and develop my ability to analyse problems, evaluate information and communicate ideas clearly.

點解呢篇值得參考？佢跟足上面教嘅結構：對商業有興趣，證據係 marketing plan group project，反思係發現原本嘅假設同資料唔夾，於是調整方向，最後先講點解想繼續讀管理同市場學。

更加重要係，佢用嘅材料其實好普通，就係一個功課。真正令佢變得有用嘅，係佢講清楚自己原本點諗、做 research 後發現咩問題，再點樣改變判斷。相比單純話自己「有熱誠」或者列一堆活動，呢種內容更加容易畀人知道你係點樣思考。

同時，呢個申請人亦冇硬作一個好戲劇性嘅人生故事。對一個 ABA 學生嚟講，想繼續讀管理同市場學、希望將現有學習再讀深啲，已經係一個合理而且可信嘅申請理由。

交之前檢查清單

印出嚟逐格剔，唔好靠個腦記：

• 確認呢個課程係咪需要交 Personal Statement
• 確認字數或者字符上限
• 確認係交一份共用，定係每個課程分開交
• 大學名、課程名同課程編號全部正確
• 冇寫已經取消或者改咗名嘅課程內容
• 冇虛構經歷、獎項或者義工
• 英文文法同串字已經檢查過
• 搵一個唔熟你申請內容嘅人睇一次，睇下佢讀完係咪真係明你想表達咩

搞掂 Personal Statement 之後，Non-JUPAS 仲有一份成日同佢一齊交嘅文件：推薦信。每間大學對推薦信嘅要求都唔同，邊個寫先有用、幾時問老師要，另一篇已經拆過。