中學生活

做筆記一定要Goodnotes? 香港 iPad 筆記 Apps 完整比較 2026 (免費/買斷/訂閲)

dse.best
dse.best
陪你由 DSE 行到大學。
做筆記一定要Goodnotes? 香港 iPad 筆記 Apps 完整比較 2026 (免費/買斷/訂閲)

Goodnotes 太貴?真係值得畀咁多錢買app寫notes?

如果你只係想用 iPad 做下筆記,其實未必需要畀錢買 Goodnotes。依家免費、買斷、訂閱制嘅筆記 App 都有,而且每隻主打嘅嘢都唔同。

中學生可能最在意做 Past Paper 同 notes,大學生就可能更加需要 Lecture 錄音、同步、跨平台或者其他功能。

所以今日就一次過睇下幾款常見嘅 iPad 筆記 App,睇下佢哋有咩功能、點收費,同埋實際用落有咩分別。

筆記 Apps 點解可以差咁遠價錢?

其實而家嘅筆記 App,大致可以分做三種。

免費 (Free)
基本功能唔使畀錢,用嚟寫字、睇 PDF、做下筆記已經夠。有啲免費 App 甚至功能幾完整,只係部分進階功能或者同步會有限制。

一次買斷 (Lifetime)
畀一次錢就可以繼續用,唔使每年再續。對於只想買一個 App 長期做筆記嘅人嚟講,呢種會比較直接。

訂閱制 (Subscription)
通常按月或者按年收費,除咗基本筆記功能之外,可能再包錄音、雲端同步、AI、手寫辨識等功能。問題就係用得耐嘅話,幾年加埋嘅費用可以比一次買斷高好多。

所以見到一個 App 寫住「免費」或者「$58」,都唔代表你真正用落就係呢個價。今次會將每隻 App 嘅實際收費同埋免費版限制一齊講。

gn

Goodnotes

講到 iPad 寫筆記,好多人第一個諗到都係 Goodnotes。佢由一個學生為咗解決自己做數學筆記嘅問題開始,創辦人亦係香港人,所以如果你本身都想支持香港製作嘅 software,Goodnotes 算係最出名嗰個。

不過 Goodnotes 近年改過收費方式,所以如果你以前用過 Goodnotes 5,或者隔咗幾年冇睇過佢,而家見到個價錢可能會有少少亂。

Goodnotes 5 vs 6

Goodnotes 5 同 Goodnotes 6 唔係兩個完全獨立嘅 App。

GoodNotes 5 係舊版本,而家嘅 Goodnotes 就係新版本。6 加入咗重新設計嘅介面、手寫拼字檢查、數學轉換、Text Documents、Whiteboard 等功能。

如果你以前已經買咗 GoodNotes 5,唔需要因為 Goodnotes 6 而重新買一次。GoodNotes 5 仍然可以繼續用;不過新功能唔會全部出現喺舊版本入面。

Goodnotes 現時嘅收費方案

方案收費主要分別
Free$0基本筆記功能,但有數量、匯入、錄音等限制
Special Edition一次性 $319Apple 裝置買斷版
Essential$108/年跨平台、無限筆記、5GB、進階基本功能
Pro$319/年進階 AI、Goodnotes Cloud、即時協作等

咁買斷版係咪已經冇咗?

✅ 有

Goodnotes 而家仍然有一次性買斷版,只係以前叫 One-Time Payment,而家改名叫 Special Edition。買一次就可以一直用,唔使每年續期。

但買斷版亦唔等於所有功能都有。Special Edition 主要係 Apple 裝置嘅完整筆記體驗,唔包括 Goodnotes Cloud,同 Android、Windows、Web 之間亦唔會有完整嘅跨平台同步。

goodnotes pricing plans

免費版夠唔夠用?

唔夠。 ❌

免費版最多只可以有 3 本 notebook,對正常學生嚟講基本上冇可能夠用。與其話係免費版,倒不如話係俾你試下 Goodnotes 有幾好用嘅 trial。

另外仲有 100MB 儲存空間、5MB 匯入上限、匯出 watermark 等限制。

Essential 同 Pro 又差喺邊?

Essential 基本上係畀普通重度使用者用。佢解鎖:

  • 無限notebooks、text documents、whiteboards
  • 無限 folders
  • 5GB 儲存
  • 無限錄音、無檔案大小限制
  • 無 watermark export
  • AI 方面亦有手寫 spellcheck、Math AI、Q&A、Quiz Generator
  • 錄音轉做文字 (裝置端)

Pro 就再上多一層,主要係進階 AI 同協作功能,例如:

  • AI Create Mode
  • AI 圖像生成
  • Edit AI
  • Goodnotes AI for Meetings
  • 雲端錄音轉錄
  • Live Summary
  • 自動生成 meeting notes
  • Private link sharing
  • Real-time collaboration
  • Google Drive integration
  • Turbo Sync

所以如果你純粹係學生自己寫筆記,其實唔係見到 Pro 有最多功能就一定要買 Pro。好多 Pro 嘅功能,本身同「我今日要做數學卷」冇乜直接關係。

網上嗰啲超平 Goodnotes 又係咩?

如果你有上過 Carousell、淘寶之類嘅地方,可能會見到一啲平好多嘅 Goodnotes「永久版」、共享帳號或者其他平價方案。

咁點解可以平咁多?通常係因為你買到嘅唔係完全同官方直接買一樣嘅方式,例如用其他人提供嘅帳號或者授權。

如果你只係偶爾寫下筆記、開下 PDF,或者本身都冇乜重要資料,其實有人會覺得平啲幾抵。只係要留意,呢類方案始終有機會出現帳號失效、授權改變,甚至之後攞唔返原本筆記嘅情況。

所以最簡單就係睇你自己點用:普通試玩或者唔重要嘅筆記,平價方案未必係大問題;如果成個學期嘅筆記都靠佢,就要考慮埋失去存取權嘅風險。

nota icon

Notability

Notability 係另一款好多人會用嘅 iPad 筆記 App,亦係 Goodnotes 之外其中一個比較多人認識嘅選擇。

兩者其實非常接近:手寫筆記、PDF 批改、搜尋手寫字、錄音、錄音轉文字、AI、Quiz 同 Flashcards 等都有。真係要揀嘅話,反而係睇你自己嘅筆記習慣。

Notability 比較突出嘅地方,就係「一邊聽堂一邊寫筆記」。錄音可以同你當時寫低嘅內容同步,之後重溫 Lecture 時可以直接跳返去相關位置。

所以如果你係大學生,要成日睇 Lecture Slides、聽堂、做筆記,Notability 其實係一個相當完整嘅選擇,唔係單純 Goodnotes 嘅平價替代品。

Notability 現時有咩收費方案?

而家 Notability 有幾個方案,分別係免費嘅 Starter、訂閱制嘅 Lite 同 Plus,以及一次性買斷嘅 Classic。香港 App Store 目前見到嘅價格包括 Lite $38、Plus $103 同 Classic $148。

方案收費主要分別
Starter$05 本免費筆記,基本編輯功能
Lite$38/年無限筆記、第三方備份
Classic一次性 $148無限筆記、手寫辨識、跨裝置同步等
Plus$103/年錄音轉文字、AI Quiz、手寫搜尋等

免費版夠唔夠用?

No.

免費係只可以有 5 本免費筆記。如果你打算由中學一路儲幾年筆記,5 本就好快用晒。

Lite、Classic 同 Plus 有咩分別?

Lite 主要係解鎖最基本嘅長期使用。最大分別係由 5 本變成無限筆記,另外有第三方備份。即係如果你主要想寫筆記、改 PDF,同埋自己另外做 backup,Lite 已經可以用。

Classic 就係一次性買斷版。除咗無限筆記之外,仲有手寫辨識、手寫搜尋、手寫數學轉 LaTeX、Live Collaboration,同 Notability Cloud 跨裝置同步。對於唔想每年畀錢嘅人,呢個方案會比較有吸引力。

Plus 就開始加入比較多 AI 同 Lecture 功能,包括錄音及轉文字、手寫搜尋、AI Quiz、Flashcards,同 YouTube 影片轉成筆記。官方目前每月亦有限額,例如每月最多 400 個 AI Quiz/Flashcard 問題,以及 100 條 YouTube link-to-note conversions。

所以如果你只係想正常寫筆記,Lite / Classic 已經可以做到好多核心功能。Plus 比較適合真係會用錄音轉錄、AI Quiz 呢類功能嘅人。

nota feature voice

Notability 最大賣點:錄音同步筆記

如果你成日要聽 Lecture,Notability 呢個功能就幾有用。

你可以一邊錄音一邊寫筆記,之後重播錄音時,App 會跟住你當時寫筆記嘅時間點同步。即係老師講到某個概念,而你當時寫低咗幾句,之後可以直接跳返嗰個位置重聽。

Plus 同 Pro 再加入錄音轉文字同 Live Audio Transcription,所以對需要大量 Lecture、訪問或者課堂錄音嘅學生會更加實用。

整體嚟講,Notability 同 Goodnotes 其實已經係非常接近嘅兩款 App。Goodnotes 比較偏向一個完整嘅筆記工作區,而 Notability 就比較集中喺課堂筆記、PDF 同錄音呢類 workflow。

Noteful Ipad notetaking app demo

Noteful

如果你覺得 Goodnotes 同 Notability 都幾貴,但又唔想用功能太少嘅免費 App,Noteful 可能會係你最值得睇嘅選擇之一。

佢最大賣點其實好直接:一次性 $58 買斷 Pro。

而且佢唔係嗰種「平所以乜都冇」嘅 App。Noteful 有完整嘅手寫、PDF 標註、圖層、標籤、iCloud 同步同錄音功能,對普通學生做筆記其實已經幾完整。

Noteful 現時嘅收費方案

免費版夠唔夠用?

其實幾夠。

Noteful 免費版最多可以有 10 本 notebook,而且每本 notebook 入面嘅頁數唔設上限。基本手寫、PDF 匯入同標註等功能都可以用,唔係嗰種得幾個功能俾你試吓嘅 trial。

所以佢同 Goodnotes、Notability 最大嘅分別之一,就係免費版本身已經幾完整,而唔係主要用嚟試玩。

方案收費主要分別
Free$0基本手寫、PDF 標註、筆記功能
Pro一次性 $58解鎖完整功能,包括圖層、iCloud 同步、錄音等

$58 買斷 Pro 有咩?

Pro 解鎖嘅功能其實幾多:

  • 圖層:可以將內容放喺唔同 layer,方便做 PDF worksheet 或自己整練習
  • iCloud 同步
  • 錄音,而且錄音位置會同筆記同步
  • 更完整嘅筆記整理功能
  • 其他 Pro 標記嘅進階功能

另外,Noteful 本身支援 PDF 同 Microsoft Office 文件匯入,可以加入圖片、圖形同文字,亦可以直接匯出 PDF。

noteful demo

Noteful 有咩特別好用?

我覺得 Noteful 最值得講嘅反而係 layers 同 tags。

例如你拎老師份 PDF worksheet 做題,可以將自己嘅答案放喺另一個 layer。之後想重做嗰份 worksheet,就可以直接隱藏答案嗰層,而唔使重新抄一次。

Tags 就比較適合整理大量筆記,例如可以用 #math、#biology 或者 #chapter1 去分類,唔一定要靠一大堆 folders。

不過 Noteful 有一個幾明顯嘅缺點

佢冇 handwriting OCR。

即係你手寫咗幾個月嘅數學、中文或者英文筆記,之後想靠搜尋功能搵返某個手寫字,Noteful 暫時做唔到。呢點亦係近期用戶比較常提到嘅缺點。

如果你平時主要係寫完就算,或者筆記本身已經分好章節,可能影響唔大。但如果你成日要搵返幾個月前寫過嘅內容,Goodnotes、Notability 呢類有手寫搜尋嘅 App 就會方便好多。

整體嚟講,Noteful 最大優勢唔係「功能最多」,而係 $58 買斷已經有一套相當完整嘅學生筆記 workflow。如果你唔需要 AI、手寫 OCR 呢類功能,佢其實已經可以應付大部分 PDF 同手寫筆記需求。

collanote

CollaNote

如果你覺得 Noteful $58 買斷都唔抵,CollaNote 就係另一種玩法:大部分功能都免費畀你用。

佢同樣主打 Apple Pencil 手寫筆記同 PDF 標註,但功能比一般免費筆記 App 多好多。除咗筆記、PDF、PPT 同 Word 文件,仲有錄音、Flashcards、Planner、翻譯同 AI 功能。

CollaNote 現時嘅收費方案

免費版本身已經可以用到無限紙張同 notebook,亦有 PDF、PPT、DOC 匯入、Apple Pencil 手寫、錄音、Flashcards 等核心功能。Premium 主要係解鎖部分進階功能,而 App Store 目前亦有一次性 Lifetime Premium 選項。

方案收費主要分別
Free$0大部分核心筆記功能,無限紙張及 notebook
Premium約 $58解鎖 Premium 功能
Lifetime Premium約 $78–118一次性買斷 Premium

功能有幾多?

CollaNote 最誇張嘅地方就係功能數量。

基本嘅手寫筆記已經有 25+ 種筆同筆刷、手寫穩定器、150+ templates,亦可以匯入同標註 PDF、PowerPoint、Word 同圖片。做老師 worksheet、Lecture Slides 或者自己整筆記都可以直接放晒入去。

另外仲有錄音,而且而家可以將 手寫、錄音同 transcription 同步。即係一邊聽 Lecture 一邊寫,之後重溫時可以跟返當時嘅筆記同錄音睇。

AI 功能又點?

CollaNote 近年加咗幾多 AI 功能,已經唔係以前嗰種單純手寫 App。

而家有 AI Calculator、AI drawing、AI handwriting-to-text、AI document chat,同埋可以對住揀選嘅內容直接問 AI。錄音亦可以自動轉錄,仲可以將錄音、手寫同 transcript 一齊同步。

不過如果你純粹想做普通筆記,其實唔需要理晒呢堆 AI。CollaNote 本身嘅基本筆記功能已經相當完整。

網民實際使用感

CollaNote 最大優勢似乎真係係「功能多,而且唔一定要畀錢先用到」。App Store 評論入面亦有大學生表示,佢哋之前試過好多需要限時 trial 嘅筆記 App,但 CollaNote 可以長期免費用,仲有 iCloud 同步、錄音、planner 同 flashcards。

但手寫體驗就比較見仁見智。有近期 Reddit 用戶覺得 CollaNote 寫字太流暢,快速寫字時筆劃會變得比較亂;亦有人提過偶爾會有 lag。呢啲屬於個別使用體驗,唔代表所有人都會遇到。

所以 CollaNote 最大賣點其實唔係某一個功能,而係 「免費已經有一大堆功能」。如果你想要一個唔使一開始就畀錢、又可以做 PDF、手寫、錄音、Flashcards 甚至 AI 嘅 App,CollaNote 確實幾有吸引力。

onenote

OneNote

如果前面幾隻 App 主要係「iPad 筆記 App」,咁 OneNote 就比較似係一個跨平台嘅 Microsoft 筆記系統。

最大賣點其實唔係有幾靚嘅筆刷,而係 免費、跨平台,同 Microsoft 生態夾得好。你只需要一個免費 Microsoft Account 就可以用,唔需要 Microsoft 365 訂閱,亦唔需要學校帳戶。OneNote 本身可以免費下載同使用,筆記亦可以同步去其他裝置。

完全免費使用

OneNote 基本上係完全免費。

OneNote 只要有一個普通 Microsoft Account,就可以直接使用,連學校帳戶都唔需要。免費 Microsoft Account 本身有 5GB OneDrive 儲存空間,用嚟同步 OneNote 筆記。

方案收費主要分別
Microsoft Account$0OneNote 基本功能、跨裝置同步、5GB OneDrive
School / Work Account$0*視乎學校或機構提供嘅 Microsoft 365 權限及儲存空間
Microsoft 365需訂閱主要係增加 OneDrive 容量及其他 Microsoft 365 功能

如果你有學校 Microsoft 365 Account,就更加方便。學校通常會提供額外嘅 OneDrive / SharePoint 儲存空間,所以實際可用容量可能會比普通 Microsoft Account 大好多。

咁 OneNote 適唔適合用嚟寫 iPad 筆記?

可以,而且功能其實幾完整。

iPad 版有 Apple Pencil 手寫、畫圖、不同筆色同粗幼,亦可以喺文字同手寫模式之間切換。

你可以用傳統 OneNote 嘅方式分成:

Notebook → Section → Page

所以如果你有十幾科、幾個 semester 嘅內容,可以好有系統咁分開。

例如:

📕 2026–27
→ Introduction to Psychology
→ English
→ Critical Thinking
→ Gender Studies
→ Chinese

對於大學 Lecture Slides、老師派嘅 worksheet、自己寫嘅補充筆記,其實幾方便。

OneNote 最大嘅優勢 : 跨平台

你可以:

iPad 寫 → Windows 電腦繼續 → Mac 睇 → Web 開返

唔需要特登export一份 PDF 再搬去另一部機,Notebook 本身就係雲端同步。

所以如果你本身返學用 Macbook、屋企有 Windows Desktop、但又用 iPad 寫筆記,OneNote 呢種 workflow 會幾自然。

不過 OneNote 有一個幾明顯嘅缺點

如果你係由 Goodnotes / Notability 過嚟,OneNote 嘅手寫體驗未必會令你覺得好舒服。

最明顯係 iPad 版目前仍然唔支援直接將手寫轉成文字。即係你可以用 Apple Pencil 寫,但唔可以好似某啲專門手寫 App 咁,寫完之後直接將啲字變成打字文字。

所以如果你成日做數學、畫 Biology diagram、寫大量手寫答案,OneNote 未必係最啱嗰種「純 iPad 手寫筆記」workflow。

但如果你本身已經係 Microsoft 生態,用開 OneDrive、Word、PowerPoint、Teams 同 Windows,咁佢嘅優勢就唔係筆刷有幾多,而係所有嘢可以放埋一齊。

OneNote 最適合邊類學生?

我覺得 OneNote 最有價值嘅地方,反而係:

「我唔想為筆記 App 畀錢,而且我想所有裝置都開到。」

你有一個 Microsoft Account 就已經可以開始用,唔需要試用期、唔需要買斷、亦唔需要訂閱先可以正常寫筆記。

尤其係大學,如果學校本身已經派 Microsoft 365 Account,OneNote 就更加有吸引力。你原本已經有學校帳戶、OneDrive 同 Office,直接用埋 OneNote 就可以,唔需要再另外買一個 Goodnotes。

所以 OneNote 唔係用「最多筆刷」或者「最好睇」嚟打,而係用 免費 + 跨平台 + Microsoft 生態 呢三樣嘢取勝。

applenotes

Apple Notes

如果你用 iPad,Apple Notes 應該唔需要特登介紹。

佢就係部 iPad 本身已經有嘅 Notes App,而家其實已經唔係以前嗰種「得幾行文字畀你打」嘅簡單筆記 App。Apple Pencil 手寫、PDF 標註、掃描文件、錄音、錄音轉文字、數學運算、Quick Note 同協作都有。

免費,而且有 Apple 生態同步

有 iPhone、iPad 或 Macbook 嘅話,基本上已經可以直接用 Apple Notes,開啟 iCloud Sync 就可以喺 Apple 裝置之間同步。

所以如果你只係想記下堂上嘅嘢、寫手寫筆記、改下 PDF或者儲低啲文件,其實完全唔需要另外買一個 App。

Apple Pencil 手寫

Apple Notes 嘅手寫功能其實幾完整,可以用 Apple Pencil 寫字、畫圖、highlight、畫直線,亦可以喺同一頁混合文字、圖片同手寫內容。

另外仲有 Quick Note,睇緊 Safari 網頁或者其他內容時可以快速開一張 Note 記低嘢。

錄音同轉文字

Apple Notes 其中一個比較實用嘅功能係 錄音 + transcription。

你可以直接喺 Note 入面錄 Lecture,同時繼續寫筆記。之後可以睇返 transcript,亦可以搜尋錄音入面講過嘅內容。

而家亦支援 繁體中文、英文、日文等 transcription 語言,對香港學生嚟講都幾實用。

Apple Notes 嘅限制

Apple Notes 最大問題反而係:佢乜都有,但唔係專門為大量手寫筆記而設。

如果你每日都用 iPad 做大量數學題、整理幾十份 Lecture Slides,又或者習慣將每科當成一本 notebook 咁管理,Goodnotes、Notability 呢類專門 App 嘅頁面管理同手寫 workflow 會更加完整。

所以 Apple Notes 比較似係:

「部 iPad 已經有一個免費筆記 App,點解唔直接用?」

如果你主要需要基本筆記、手寫、PDF、錄音同 Apple 裝置同步,佢其實已經好夠用。

GoodnotesOneNoteApple Notes
💰 免費用有限✅✅
✍️ 手寫⭐⭐⭐⭐⭐⭐
☁️ 雲端同步自家 CloudOneDriveiCloud
🎙️ 錄音✅✅✅

iPad 筆記 Apps 價錢比較

筆記 App免費買斷訂閱
Goodnotes$0$319$108/年起
Notability$0$148$38/年起
Noteful$0$58—
CollaNote$0約 $78–118約 $58
OneNote$0——
Apple Notes$0——
功能GoodnotesNotabilityNotefulCollaNoteOneNoteApple Notes
Apple Pencil 手寫✅✅✅✅✅✅
PDF 標註✅✅✅✅✅✅
錄音✅✅✅✅✅✅
手寫搜尋 / OCR✅✅❌部分❌部分
Windows / Web✅✅❌❌✅Web

總結

睇完咁多款筆記 App,其實冇一隻係所有人都一定要用。

如果你想要比較完整嘅手寫筆記體驗,Goodnotes、Notability 呢類專門 App 會比較適合;如果想一次過買斷,Noteful 就幾直接。CollaNote 同 OneNote 就更加適合唔想畀錢嘅人,而 Apple Notes 就勝在部 Apple 裝置本身已經有,開嚟就用。

所以與其問「邊隻最好」,不如先諗下自己平時主要係做卷、寫 Lecture 筆記、改 PDF,定係要跨平台同步。搵到啱自己 workflow 嘅,通常比追求最多功能更加重要。

dse.best
dse.best

DSE 攻略、選科同升學資訊,一次過睇晒。 寫俾每一位捱緊 DSE 嘅你。

⭐ 喜歡 dse.best?設為 Google 偏好來源

© 2026 dse.best | 熊茂科技(圖瓦盧)