【DSE Retake必睇】DSE Combine Cert 係咩？JUPAS 點樣合併唔同年份成績？

放榜失手，係咪淨係retake嗰一科就得？

放榜嗰日，你英文差一個 level，入唔到心儀課程。你第一個諗法好自然，咁我下年淨係重考英文啦，中文同選修唔使再考啦。

跟住第二個問題即刻嚟，咁舊年考得好嗰幾科，仲可唔可以照用？所以大家 search「Combine Cert」，其實最想知嘅就係：舊年考得好嗰幾科，重考之後仲用唔用得？

Combine Cert 到底係咩？

先講最重要嗰句：考評局冇一張正式叫「Combine Cert」嘅證書。

你邊一年考 DSE，就會有返嗰一年嘅成績證明。你如果考咗兩年，就會有兩年各自嘅成績，考評局唔會幫你將幾年成績合併成一張新證書。

考評局嘅證明文件 FAQ 亦寫明：

Each certification covers the results of one examination/test in a year.

詳情: HKEAA 證明文件 FAQ。

咁點解大家又會叫「Combine Cert」？

因為重考生 (retaker) 申請 JUPAS 時，JUPAS 同院校可以取得你唔同年份、唔同 sittings 嘅 DSE 成績。

例如你 2025 年考完整份 DSE，2026 年淨係retake Maths：

• 2025：中文 4、英文 5、Maths 3
• 2026：Maths 5

你唔會收到一張新嘅「Combine Cert」，但 JUPAS／院校可以取得你 2025 同 2026 嘅成績。之後點樣用呢兩年成績，就由院校／課程自己嘅收生政策決定。

所以大家口中講嘅「Combine Cert」，其實通常係指將唔同年份嘅 DSE 成績一齊考慮，而唔係真係有一張叫 Combine Cert 嘅官方證書。

JUPAS 本身亦唔係幫你自動揀最高分。只要你報考 DSE 同申請 JUPAS 時使用相同嘅身份證明文件號碼，並按程序授權，JUPAS 同院校就可以向考評局取得你過往及當屆嘅相關 DSE 成績。

所以成件事可以簡單理解成：

HKEAA：每年各自有成績 → JUPAS／院校：可以取得唔同年份成績 → 大學／課程：再決定點樣計。

所以Combine Cert其實唔係官方名詞

Combine Cert 唔係官方術語，只係學生之間方便叫嘅簡稱。所以你 Google 會見到個個講法唔同，唔係你搞錯，係根本冇一個統一嘅官方定義。

JUPAS 講緊 “results obtained in different sittings”。大學有啲寫 combined sittings，有啲寫 multiple sittings, repeat attempts, etc.

四個最多人誤解嘅位

誤解一：以為要自己申請一張Combine Cert

你係唔需要去考評局申請一張「合併證書」，亦唔需要自己上載幾張證書去 JUPAS。你完成授權同確認相關考試年份後，JUPAS同院校會按程序向考評局取得相關成績。

誤解二：以為可以淨交最好嗰年

No

JUPAS 會拎晒你過往同當屆成績，唔可以淨係交靚仔嗰年、收埋衰咗嗰年。過往成績仍然會提供俾院校，至於會唔會用嚟計分，就係另一回事。

誤解三：以為全港大學都會自動逐科取最高成績

都唔係！唔少課程都會考慮唔同 sittings 入面嘅最佳成績，但唔係全部都係咁。港大寫明大部分課程考慮唔同 sittings 嘅最佳組合，少數課程只睇最新一次，少數可能有 penalty。

可以睇 HKU多次應考計分。

Most programmes consider the best results achieved in different combinations of sittings, except for a few programmes which only consider the latest results.

誤解四：以為考幾多次都一定全部計晒

考幾多次係一回事，計幾多次係另一回事。

中大官方頁面目前列出嘅規則係用近三次應考入面同科最好成績計，唔係無限追溯。(2026 詳情以課程公布為準。)

可以睇 CUHK FAQ。官方頁面目前列出嘅規則係：For 2025 entry...

For 2025 entry, the best result in the same subject taken by a candidate in his/her three most recent attempts will be used.

所以 CU 呢個例子好重要，正正示範咗「計幾多次」係由院校自己決定，唔係你考得愈多次，就代表可以全部攞嚟砌。

點解一定要逐間大學查 ?

因為 JUPAS 本身唔會為所有大學設一套統一嘅計分方法。每間院校可以自己定核心科同選修科權重，計 Best 5 定 Best 6 定 4C加2X，仲可以自己定點處理多次 DSE 成績。JUPAS 亦寫明部分課程可以對多過一次應考嘅申請人設 penalty。

所以你睇到某大學話接受 Combine Cert，唔代表你報嗰個課程一定逐科取最高。一定要返去睇返目標課程嘅收生頁，搵清楚多次應考嗰段點寫。

八大、HKMU：多次DSE成績點處理

下表以各校目前公布資料為準，主要為 2026 入學。CU 行沿用官方已公布規則，2026 以課程公布為準。重點睇計法同扣分，唔好淨睇收唔收三個字。

官方原文如下，方便你自己 double check。

HKU 可以睇 HKU多次應考計分。

Most programmes consider the best results achieved in different combinations of sittings, except for a few programmes which only consider the latest results. Few programmes may also impose a penalty on repeaters.

CUHK 可以睇 CUHK FAQ 同 CUHK IBBA例子。IBBA 嗰頁有寫多次應考扣 5 percent or less，個別情況下，面試表現良好可獲豁免。

HKUST 可以睇 JUPAS HKUST課程頁。嗰頁寫住符合最低要求後，按課程規定取所有 sittings 入面嘅最佳成績計分。

PolyU 可以睇 PolyU JUPAS常見問題。

PolyU all along considers multiple attempts without penalty. Similar subjects will be considered once and the best grade will be taken into consideration.

CityU 可以睇 JUPAS CityU課程頁。

CityUHK accepts repeat results and will use the best results in assessing whether applicants fulfil the entrance requirements and to calculate admission scores.

HKBU 可以睇 HKBU HKDSE入學頁 同 JUPAS HKBU課程頁。

For 2026 entry, we accept combined results and will count the best results for meeting our entrance requirements and for the calculation of admissions scores.

LingU 可以睇 Lingnan FAQ 同 JUPAS Lingnan課程頁。

The best grade for a subject will be used in the calculation of the score in case of multiple attempts. There is no penalty or mark deduction for repeated sittings.

EdUHK 可以睇 EdUHK FAQ。

Yes, we accept combined sittings. If an applicant has taken a subject for more than once, only the best result will be counted. There is no penalty on repeaters.

HKMU 可以睇 JUPAS HKMU課程頁。

HKMU will consider the best grade attained in a particular subject from any sittings. There is no grade penalty for multiple sittings.

有個好實在嘅例子就係港大入學獎學金。港大一般入學可以考慮多次應考，但 港大DSE入學獎學金 寫明用指定年份一次過成績，非重考生先合資格。所以入學計法唔等於獎學金計法，兩樣要分開查。

一個 Retaker 例子睇晒 Combine Cert 點運作

假設你 2025 考完 DSE。

中文 4，英文 5，Maths 3，Biology 5，ICT 4。

2026 你淨係retake Maths，攞到 Level 5，其他科冇再考。

如果某課程係逐科取最佳成績，咁最後計分就會變成：

中文 4、英文 5、Maths 5、Biology 5、ICT 4

舊年考得好嘅中文、英文同選修科繼續可以用，呢個例子入面，新level會取代舊 Maths 嘅 Level 3。

但另一課程可以完全唔同玩法。可能只睇最新一次，可能有 repeater penalty，可能只計指定次數。所以你唔可以淨係自己砌一張 DSE 成績表，再用嗰個分數直接對照 JUPAS 收分。

呢句係成篇最重要嘅提醒，「自己砌」出嚟嘅最高分，只係你按某一套假設計出嚟嘅結果，大學可以用另一套方法再計。

最大限制，合併分唔等於一次過同分

舉個好直接嘅例子。A 同學一次過考到 30 分。B 同學考兩次合併後都計到 30 分。兩個人唔代表錄取機會完全一樣。

因為JUPAS唔係單純鬥個分數高低。

每個課程會按自己準則評分，再按結果排出一個 Merit Order List。最後由 JUPAS 按各課程嘅 Merit Order List 同你嘅選科次序進行派位。

可以睇 JUPAS派位機制。

Each programme assesses eligible applicants according to its own selection criteria. The assessment determines each applicant's position on the programme's Merit Order List.

除咗 DSE 分，課程仲可以睇面試、選修科組合、同屆其他申請人嘅成績同表現，以及其他課程訂明嘅收生準則。所以往年收分只係參考，唔係你砌到嗰個分就等於穩入。

JUPAS實際要做邊四步

① 用同一個身份證明文件號碼報考。
JUPAS Account 同 DSE 報名時，要使用相同嘅身份證明文件號碼。如果之前有用過其他證件考，收到通知後要盡快通知 JUPAS Office，否則佢拎唔齊你所有年份。

② 等 JUPAS 取得你嘅歷屆 DSE 成績。
呢一步由 JUPAS 同院校直接向考評局取得，唔使你自己交表。

③ 登入 JUPAS 確認你嘅 DSE 考試年份。
收到電郵同短訊通知後，就要入去睇清楚年份啱唔啱，有錯就盡快跟進。

④ 查返目標課程點樣計多次 DSE。
呢步最重要，偏偏亦係最多人會漏睇。逐個睇返心儀課程嘅收生頁，搵「多次應考」、「combined sittings」、「repeaters」嗰段。

如果你係因為retake先睇到呢篇

如果你係因為諗住重考 (retake DSE) （e.g. NCK Tony)，睇完呢篇文，咁Combine Cert其實只係其中一樣值得留意嘅嘢。

你仲要考慮重考邊幾科、自修生嘅校本評核安排、溫習時間夠唔夠，同埋重考定轉去副學位邊條路啱你。呢啲我哋另有文章詳細拆，唔喺呢篇一次過講晒。👇👇

Combine Cert 常見問題

我只retake一科，其他科成績仲用唔用得？

可以，但要視乎目標課程點樣處理多次 DSE 成績。好多同學都係 2025 考完整份，2026 淨係重考失手嗰一兩科。舊年考得好嘅中文、英文同選修科可以繼續用，新一年就只有重考嗰科有新成績。但最終用唔用舊成績，係課程決定，唔係你自己話事。

我考咗三年或者四年，可以全部合併嗎？

JUPAS會取得你過往同當屆成績，而官方並無寫明一律最多只可以合併兩年。但個別院校可以自己設計算範圍，例如中大用近三次應考入面最好成績計。所以唔好以為考幾多次，就一定可以全部逐科攞最高，一定要查課程頁。

如果retake後差咗，舊成績會唔會冇咗？

舊成績唔會消失，考評局嗰邊仍然有紀錄。
但課程會唔會繼續用舊成績，要睇佢嘅計法。如果課程用最佳成績計，差咗嗰次唔會拖低你。如果課程只睇最新一次，咁新成績就會取代舊成績。

可唔可以唔合併，淨用最新一年？

你唔可以叫 JUPAS 收埋舊年唔俾院校睇。但院校會唔會合併係佢嘅政策，有啲課程本身只睇最新一次，實際上就等於唔會用兩次成績一齊計。你報之前要睇清楚嗰個課程寫最佳組合定最新一次。

Non-JUPAS會唔會一樣？

Non-JUPAS係另一條申請途徑，唔會經JUPAS嗰套自動取得DSE成績嘅機制。你要按返個別院校／課程要求，自己提交所需嘅成績證明文件。

至於同一學年可唔可以同時用 JUPAS 同 Non-JUPAS 申請 JUPAS 課程，亦有另外嘅規定，唔可以當成兩條完全獨立嘅路一齊報。官方寫明唔可以同時經兩條路報讀 JUPAS 課程，詳情可以睇 JUPAS申請資格。

如果你已經砌好合併後嘅最佳組合，唔好淨係對住收分估。不如直接去 JUPAS 計分機計下目標課程嘅加權，再對埋往年收分，心入面會實在好多。