【DSE升學】自資大學／院校2026攻略：收生分數、學費、SSSDP＋NMTSS資助比較

大家講起自資院校，第一反應通常係「係咪即係讀唔起大學先讀」。呢個講法其實幾有問題，因為自資院校入面有唔少學系，收生分數同部分八大課程已經相差唔遠，個別醫療專科甚至仲高過部分八大Band A課程。

呢篇會帶你逐間睇清楚都會大學、樹仁、恒生、聖方濟各、東華同伍倫貢，包括佢哋嘅王牌學系、收生分數參考、校園氛圍，同埋自資學位入面成日搞唔清嘅資助計劃分別。

大學定學院？先搞清楚身份

呢6間機構入面，其實分兩種身份：

私立/自資大學：香港都會大學、香港樹仁大學、香港恒生大學、聖方濟各大學

專上學院（未升格大學）：東華學院、香港伍倫貢學院

呢個分別唔係得個名咁簡單，大學身份代表整體學術自主性同辦學規模一般更高，亦可以自行開辦同頒授更多類型課程。

值得留意嘅係，東華學院其實已經喺2026年初公開表示希望「本年內升格大學」，仲同科大建緊跨專業合作關係，所以呢個名單其實會變，講唔埋下一屆你哋睇到呢篇文嘅時候，東華已經改名。

點解人會揀自資院校

唔係淨係「入唔到八大」先揀自資，常見原因大概有幾個：

• 有啲學科八大根本冇開：例如某啲細分嘅醫療專科（放射治療、職業治療）、或者專屬嘅Nursing課程數量
• 收生分數更加彈性：核心科目差一級，配合彈性收生安排都有機會入
• 細班教學：自資院校學生人數少好多，師生比例通常比八大細班
• 想讀嘅科真係得呢間有：例如社工喺樹仁真係讀出名，護理喺東華一條龍咁多分支

逐間自資院校詳細拆解

香港都會大學 HKMU

成立：1989年（前身為公開進修學院／公開大學）
身份：法定自資大學，2026年3月正式成為全港首間「應用科學大學」
QS排名：2026年QS亞洲大學排名第393位，一年內跳升140幾名
學院架構：人文社會科學院、李兆基商業管理學院、教育及語文學院、護理及健康學院、科技學院

王牌範疇：護理及健康科學係都大近年主打，另外商業管理、教育、酒店旅遊管理都算係傳統強項。

適合邊類學生？
如果你想讀護理、健康科學或者商科，又想喺市區返學、交通方便，都大會係自資院校入面其中一個最穩陣嘅選擇。

DSE 5科分數參考（2025年SSSDP課程）：

• 護理學（普通科／精神科）約18.5分
• 財務及金融科技約16.3分
• 創意廣告及媒體設計、社會科學約15.6分
• 醫療化驗、土木工程約16分

校園氛圍：何文田自置校舍，市區位置，樓景比較似商業大廈多過傳統校園，冇乜草地或者運動場嗰種感覺，勝在交通方便。

彈性收生小知識：都大自己公布過，如果考生中文或英文其中一科只達第2級，但有任何一科甲類選修科考獲5*或以上，加上總成績仍達最低分數要求，並將課程放喺Band A，都大會作特別收生考慮。呢個係官方公開講法，唔係聽講。

香港樹仁大學 HKSYU

成立：1971年（香港首間獲政府承認嘅私立專上學院）
身份：私立大學
QS排名：2026年QS亞洲大學排名第360位，連續多年蟬聯全港私立大學第一

王牌範疇：社會工作絕對係樹仁招牌，另外新聞與傳播、經濟及金融都算係傳統強科。

DSE 5科分數參考（2025年SSSDP課程）：

• 工商管理（榮譽）學士約16.92分
• 中國語言文學（榮譽）文學士約16.39分
• 會計學（榮譽）商學士約16.13分
• 新聞與傳播（榮譽）文學士約15.63分

校園氛圍：北角寶馬山，山路比較斜，屬於傳統啲嘅舊式校園，但正正因為喺山上，環境比較清靜。

個人經驗分享（僅供參考）：我自己讀樹仁嗰陣，聽聞有部分課程如果核心科（中文或英文）只差一級，可以透過額外嘅筆試去補返，呢個唔係every課程都有，網上都幾少資料講到，但係我自己經歷過係真嘅。如果你踩正呢條線，建議直接問返樹仁招生處確認你嗰科係咪都有呢個安排。

適合邊類學生？
如果你對社工、新聞傳播或者人文社科有興趣，又鍾意細班教學同傳統校園文化，樹仁值得優先考慮。

香港恒生大學 HSUHK

成立：2010年成為專上學院（前身恒生商學書院1980年成立），2018年11月正名大學，全港第二間私立大學
身份：非牟利私立大學
QS排名：QS世界大學排名1401至1500位，未有進入QS亞洲排名（THE排名801至1000位）
學院架構：商學院、傳播學院、決策科學學院、人文社會科學學院、翻譯及外語學院、跨學科學院

王牌範疇：商科係恒大最強項，尤其精算保險、供應鏈管理、數據科學同商業智能，加埋佢哋主打「博雅+專業」模式。

DSE 5科分數參考（2025年SSSDP課程）：

• 精算及保險約15.73至16.42分
• 供應鏈管理工商管理約16.23分
• 數據科學及商業智能約16分
• 管理科學與資訊管理約16.05分

校園氛圍：沙田小瀝源，依山而建，係自資院校入面少數有真正「大學feel」嘅校園，有住宿式書院、泳池、球場，仲係綠色建築鉑金級認證。

適合邊類學生？
如果你想讀商科、精算、供應鏈或者數據分析，同時又重視校園生活、宿舍同大學氛圍，恒生會係唔少人嘅首選。

聖方濟各大學 SFU（前身明愛專上學院）

成立：1985年（前稱明愛徐誠斌學院／明愛專上學院），2024年1月正名大學
身份：私立大學，主打天主教教育背景
QS排名：未有上榜（屬於新晉大學）

王牌範疇：健康科學（護理學、物理治療）同社會服務係傳統強項，近年開始發展跨學科嘅科技人文商業範疇，包括人工智能、數碼娛樂科技。

DSE 5科分數參考（2025年SSSDP課程）：

• 物理治療學（榮譽）理學士約21分
• 社會科學（榮譽）學士約17分

物理治療呢科分數其實幾高，唔好以為自資院校科科都易入。

校園氛圍：將軍澳兩個明愛校舍互通，高科技化，實驗室同臨床實習設施密集，比較似醫療學院多過傳統大學校園。

學生人數：約4,000人（全日制3,400加兼讀800）

適合邊類學生？
如果你目標係物理治療、護理或者其他健康科學專業，希望接受較多臨床培訓同實務學習，SFU值得納入考慮。

東華學院 TWC

成立：2010年，由東華三院創立
身份：專上學院（未升格大學，但2026年初已公開表示力爭本年內升格，並與科大建立跨專業合作關係）
學院架構：護理學院、醫療及健康科學學院、管理學院、人文學院，共18個學位、高級文憑及證書課程

王牌範疇：醫療同護理相關學科係東華絕對強項，涵蓋護理學、醫療化驗、放射治療、職業治療、物理治療、應用老年學、醫療資訊及服務管理、醫療影像學，可以話係全港自資院校入面醫療分支最齊全嘅一間。

DSE 5科分數參考（2025年SSSDP課程）：

• 放射治療學約24.3分
• 醫療化驗約21.2分
• 物理治療學約23.7分
• 職業治療學約21.3分
• 護理學約16.2分

留意呢度啲醫療專科分數其實好高，放射治療同物理治療呢類已經同部分八大學科分數睇齊，唔係話讀自資就一定容易入。

校園氛圍：跟SFU類似，高科技化，實驗室同臨床設施為主，冇乜傳統校園嗰種氛圍。

學生人數：超過4,300人

適合邊類學生？
如果你一心想入醫療專業，例如放射治療、職業治療、醫療化驗或者護理，而八大未必夠分，東華學院會係其中一間最值得研究嘅院校。

香港伍倫貢學院 UOWCHK

成立：前身為香港城市大學專上學院，現為澳洲伍倫貢大學（University of Wollongong）全球網絡成員
身份：專上學院（非大學）
背景：澳洲伍倫貢大學本身喺澳洲評分幾高（澳洲大學排名第8，教學質素排名第3），但UOWCHK本身係香港嘅附屬學院，唔可以直接將母校排名套用喺呢間學院度

王牌範疇：UOWCHK主要係自資學士、副學士、高級文憑一條龍嘅升學路徑，主打銜接海外升學或者本地大學高年級，教學團隊超過一半有博士學歷。

DSE 5科分數參考：呢間喺2025年SSSDP自資學士學位收生分數表入面冇被列出，代表佢哋主打嘅未必係JUPAS/SSSDP呢條主流資助線，副學位同高級文憑先係主力，如果你想直接讀學士，建議直接問返學院實際收生要求。

校園氛圍：學生人數約1,300人，係6間入面規模最細嘅一間，主打國際化英語授課環境。

適合邊類學生？
如果你希望以副學位、高級文憑或者銜接學士作為升學路線，亦有計劃日後升讀本地或海外大學，UOWCHK會比較適合呢類規劃。

SSSDP vs NMTSS 資助計劃速查表

呢兩個名成日撞埋一齊搞到人頭都大，一張表分清楚：

六間院校一覽表

好處同壞處，兩邊都要睇

好處

• 有啲學系（護理分支、社工、精算保險）真係專門，八大冇齊
• 彈性收生機會較高，一科差一級都有機會透過額外要求入到
• 細班教學，同教授接觸機會多
• 執業類學科（護理、社工）出嚟做嘢睇牌唔睇校名
• SSSDP、NMTSS資助可以大幅減低實際學費負擔

壞處

• 未計資助前，自資學士學費一般比UGC資助學士高得多。UGC資助學士每年學費約$42,100，而自資學士每年學費則因課程而異，由約一萬多元至二十幾萬元不等。
• 部分非執業類學科（一般商科、傳理）仍然面對僱主對「大學名氣」嘅隱性偏見
• 研究資源、postgrad銜接路徑一般比八大少
• 部分院校（例如SFU、恒生正名大學）歷史仍然較短，未有長期track record
• 熱門執業學科（放射治療、物理治療、職業治療）分數其實唔低，未必真係「易入」

自資院校常見問題

自資院校同八大學位有咩分別？

最大分別主要係資助模式同院校背景。八大（UGC資助）學位由政府大幅資助，學費相對較平；自資院校則主要靠學費營運。不過，唔少自資學位都符合SSSDP或者NMTSS等資助計劃，實際要交嘅學費未必比想像中高。

自資學位認受性高唔高？

香港認可自資院校頒授嘅學士學位，同樣屬於本地認可學歷，可以報考大部分公務員職位、升讀碩士，同一般求職。不過，部分行業或僱主仍然可能較重視院校名氣，所以實際情況會因行業而異。

自資院校可以轉八大嗎？

可以，但難度唔低。部分八大會接受自資學士、副學士或高級文憑學生申請轉學或高年級入學，一般要求較高GPA，亦會視乎學額同課程銜接程度決定是否取錄。

自資院校一定比八大容易入？

未必。部分熱門醫療專業，例如放射治療、物理治療、職業治療等，自資院校收生分數其實相當高，甚至接近甚至高於部分八大課程。揀院校時應該比較個別課程嘅收生要求，而唔係只睇「自資」定「八大」。

自資學位畢業之後可以升讀碩士嗎？

可以。只要完成香港認可學士學位，並符合院校收生要求，就可以報讀本地或海外大學碩士課程。院校一般會綜合考慮GPA、相關背景、工作經驗（如適用）等因素，而唔係只睇畢業院校。

幾個延伸迷思

A. 「執業牌照 > 大學名氣」呢條規則

如果你讀嘅係要考牌先可以執業嘅專業，例如護理或者社工，僱主同法例睇嘅其實係你有冇牌，唔係你邊間畢業。護理畢業生要向護士管理局註冊先可以做註冊護士，社工就要向社會工作者註冊局註冊先可以執業，呢個registration process同考試，八大同自資院校畢業生要過嘅要求係一樣。換句話講，喺TWC或者都大讀護理，同喺中大讀護理，最終你哋考嘅係同一個牌。

呢個邏輯喺一般商科或者傳理科就未必完全成立，因為呢啲行業入行更加睇portfolio、實習經驗、同埋（現實啲講）大學名氣。

B. 校園文化差好遠

呢6間院校嘅校園氛圍差異其實幾大，揀之前建議親身去睇下：

• 都會大學：何文田市區，商廈感重
• 恒生大學：沙田小瀝源，最似傳統大學校園，有宿舍書院、運動設施
• 樹仁大學：北角寶馬山，山路斜，舊式傳統校園
• 聖方濟各同東華：都係高科技化、臨床實驗室為主，冇乜傳統「草地飯堂」嗰種校園感

如果你好睇重大學生活嗰種氛圍多過純粹讀書，呢點值得放入考慮。

每間院校都有自己最強嘅範疇，重點唔係「自資定八大」，而係你想讀嘅科同將來想行嘅路。。揀之前，用JUPAS calculator計清楚你嘅分數落喺邊個範圍，再對返呢篇入面每間院校嘅王牌學系同分數參考，先至知道邊間真係適合你。