Ocamp 迎新營懶人包|房 Game 玩法、破冰遊戲一覽、去唔去 Ocamp 終極分析

未入U先收到嘅第一份「功課」
JUPAS 放榜之後,IG page突然開始洗版。
「XX Hall Ocamp 招生」
「XX Society Early Bird」
「Pre-camp開始報名」
「組爸組媽等緊你!」
再睇多幾個Post,就開始見到一堆陌生名詞:
房Game、City Hunt、Dem Beat、Camp Fire、First Impression...
如果你心入面第一個反應係:
「房Game...即係喺房打Board Game?」
放心,幾乎個個Freshman第一次聽都係咁諗。
Ocamp 同房Game 係咩嚟
Ocamp(Orientation Camp)即係迎新營,通常係開學前由書院、學系、學會或者舍堂搞,等你未開學已經識到未來三四年會見到嘅同學仔。一般會有一至三日唔等,日頭玩體力遊戲,夜晚就縮返自己組嘅房,開房 Game。
唔好見到「房Game」三個字就以為好神秘,其實大部分都係一班人圍個圈坐低玩遊戲。一晚通常會玩幾個Game,而唔係淨係玩一個玩足幾個鐘。
玩法有啲偏搞笑、有啲偏破冰、有啲會講多少少心事,同日頭嗰啲要跑嚟跑去嘅隊際活動完全係兩回事。
至於負責帶大家玩嘅高年級學生,就係大家成日聽到嘅「組爸媽」,主要負責控場、帶氣氛,同埋確保遊戲唔會玩到過火。
Ocamp常見名詞
- 組爸媽(Seniors): 負責出題、帶氣氛、控場,同埋當某啲Game玩得太盡或者有人唔舒服嗰陣負責拉返住。
- 細組 (Sub-group) : 你Ocamp期間最常黐住嘅十幾個人,基本上之後幾日食飯、玩Game都係同呢班人一齊。
破冰系:夜晚房Game常見嘅遊戲
呢類遊戲嘅共通點係,唔一定需要對方講太多秘密,純粹係想大家快啲記得對方個名、消除尷尬,適合Ocamp第一晚,大家都仲未熟嘅時候玩。

真真假假(Two Truths One Lie)
可以話係Ocamp最經典嘅破冰Game之一,幾乎每年、每組都有機會玩到。
玩法: 每人寫三件事(兩真一假),輪流讀出嚟畀全組估邊件係假。
精髓: 假嗰件切忌太離譜(例如:「我細個去過火星」),一定要「真假難分」先好玩!例如「我中學讀過男校但拍過 4 次拖」。
組爸媽加碼版: 寫「五真兩假」,或者只限答感情 / 性格,玩得 Chur 嘅組爸媽會即時喺度挖細節。

臥底(類似狼人殺嘅簡化版)
玩法: 所有人拿到同一個詞語(如「譚仔」),但有 1-2 個臥底會拿到相近詞(如「三哥」)。每人講一句話形容自己個詞,但唔可以講太明,一輪後投票指認臥底。
精髓: 講得太明會即刻暴露畀臥底知;講得太玄,你自己組員會當你係臥底投票車死你。
First Impression
玩法: 男組同女組分開,各自幫對面所有異性改「代號」(例如:「眼鏡戴一半哥」、「講嘢成日笑妹」)。改完之後開門,問一啲勁界線嘅問題,例:「呢度邊個睇落最 Organic / 機心最重?」、「邊個最似 Nightclub 獵物?」,答嗰陣只可以用代號。
對答案環節: 最後揭曉「到底眼鏡哥即係邊個」。提醒: 大部分人都會改得幾壞手,網上大量教高 EQ 應對嘅教學,但講到底純粹係 Game,千萬唔好代入個人感情!

兩秒真心話 / Truth or Dare
玩法: 圍圈轉樽仔,樽口指住邊個,3 秒內要揀 Truth(答問題)定 Dare(做懲罰)。
精髓: 問題深度完全由組爸媽手握,可以由「平時用咩 Skin Care」秒變「呢度咁多個女仔你最想同邊個出街」。
有啲問題真係會令人坐低諗三秒:「吓,玩到咁㗎?」
進階/深入系:熟咗之後先玩嘅房Game
玩到Ocamp第二、三晚,大家通常已經由「你叫咩名」進化到「你中學發生過啲咩黑歷史」。
所以呢類Game唔再係純粹破冰,而係想令一班原本唔識嘅人,快啲變熟。
當然,唔代表玩完一定會全組喊到收唔到聲,亦唔係每個人都需要分享自己人生秘密。好多時只係靠一啲問題,同大家交換下故事。
一生人一次
Target: 睇吓邊個組員隱藏得最深、生活經歷最狂野,順便搵同類。
玩法: 主持人拋出一啲人生經歷或者比較大膽嘅情境(例如:「一生人一次蒲過 Full Moon Party」、「同過陌生人 Say Hi 搭訕」、「偷睇過前任 IG」)。做過嘅人要即場舉手,並講 30 秒當時嘅事發經過。
精髓所在: 完全零講大道理嘅壓力,純粹睇邊個組員「最不出意料」或者「人不可貌相」。好似只係問問題,但最有趣嘅地方係,你會突然發現平時坐你隔離嗰個人原來有啲完全估唔到嘅經歷。
有人講旅行,有人講感情,有人講啲自己以前覺得唔會同人分享嘅事,氣氛通常都會慢慢由尷尬變熟。

人生 Bucket List 撕紙遊戲
玩法: 每人一張 A4 紙切八格,寫低 8 件入大學最想完成嘅 Dream(例如:出 Exchange、過 3.5、住 Hall、拍拖)。
寫完轉返出嚟畀全組睇。隨後,主持人會用極低沉嘅聲線讀出一啲現實逼迫嘅情境(例如:「為咗 Part-time 賺錢,你要放棄一個夢想」、「為咗 Grad-job,你要 Cut 走一個自由」),每讀一個,你就要親手撕走一格。
精髓所在:去到最後剩返最後一格,組爸媽通常會叫大家分享一下自己點解寫呢樣嘢,成為一個比較安靜嘅交流時間。個遊戲比較「深」,適合Ocamp後期,大家已經熟到願意喺人面前流露真感情先玩。
體力/隊際系:日頭玩到全身濕晒嗰啲

City Hunt
玩法: 著住大組 T-shirt 喺中環 / 尖沙咀 / 旺角完成一系列任務。例如去某個地標打卡、問路人一條問題、完成一個尷尬小任務(例如喺街上扮結婚拍照、同陌生人合照)。每個任務都有分數,最快完成同分數最高嘅組贏。
現實: 熱到仆街,消耗99%體力。記住搽防曬、帶風扇、帶多件 T-shirt,否則夜晚開房 Game 全房都係汗臭味。
大逃殺 / 追逐類遊戲
聽個名可能好似大型Battle Royale,但實際通常係比較簡化嘅追逐遊戲。
玩法可能包括搶旗、追捕、分陣營對抗等等。部分玩法會有「生命值」設定,例如身上嘅絲帶或者貼紙,俾人捉到就扣,冇晒就出局。
呢類Game最大特色就係, 平時坐低傾偈好文靜嗰啲人,突然會跑到好似參加校運會。

Dem Beat / 大隊操
玩法: 各院系、舍堂都會有自己嘅Dem Beat(一種帶節奏嘅呼喊同拍手動作),通常會有固定口號同動作,圍埋一齊拍手鳩喊。
真實體驗:未玩過會覺得:「搞咩啊,好撚中二喎。」
但當成班人一齊叫到聲都沙埋嗰陣,反而會發現嗰種尷尬感會慢慢消失。
收買佬 / 成語接龍等集體遊戲
呢類遊戲通常用嚟炒熱氣氛。
例如收買佬,主持人突然講一樣指定物品,全組要喺限時內搵到,再送返去。 最經典畫面通常係成班人突然衝去便利店、翻袋、問隔離組借嘢,完全唔理形象。
成語接龍就比較考反應,主持人出頭兩個字,組員要即刻接落去,慢半秒可能已經輸。
玩法簡單,但一大班人一齊玩,氣氛通常會比想像中熱鬧。

Camp Fire
通常係Ocamp最後一晚,一班人圍住個火堆(或者電子營火)唱歌、跳舞、分享感受、甚至有組員會喊出嚟。呢個係最少「表演成分」、最多真心說話嘅環節,好多人形容呢個位係成個Ocamp最感動嘅一刻。
Ocamp 遊戲一覽表
| 遊戲名 | 玩嘅時間 | 體力/精神消耗 | 主要目的 |
|---|---|---|---|
| 真真假假 | 第一晚房Game | 🧠 10% | 破冰認人 |
| 臥底 | 房Game常見 | 低 | 破冰+鬥智 |
| First Impression | 夜晚房Game | 🧠 80% | 深入認識、有時踩界 |
| 兩秒真心話 | 房Game常見 | 低 | 快速熟絡、隨機性高 |
| 一生人一次 | 房Game中後期 | 低 | 分享真實經歷 |
| Bucket List撕紙 | 房Game後期 | 🧠 90% | 反思、情感連結 |
| City Hunt | 日頭 | 🏃♂️ 100% | 團隊合作 |
| 大逃殺 | 日頭 | 高 | 體能+刺激感 |
| Dem Beat | 日頭/開場 | 🏃♂️ 60% | 建立歸屬感 |
| 收買佬/成語接龍 | 日頭/房Game都得 | 中 | 反應力+團隊合作 |
| Camp Fire | 最後一晚 | 低 | 情感連結、總結 |
其實去唔去 Ocamp好?呢個先係真正嘅大難題
講咗咁多遊戲,不如講返個更多人糾結嘅問題:Ocamp到底值唔值得去 ??
呢個真係每年都有人喺Secrets、討論區問嘅topic。一嚟Ocamp真係唔平,千幾兩千蚊落去,對啱啱交完學費嘅Freshman嚟講真係唔係講笑。二嚟就係最現實嘅恐懼:「唔去係咪即係第一年冇朋友」「其他人都靠Ocamp識到嗰班死黨,我唔去係咪就注定孤獨終老」。
老實講,呢個擔心唔係完全冇道理,因為好多大學嘅social圈,第一波確實係喺Ocamp度成形,你組嗰班人可能之後三四年都一齊食飯、一齊組隊做project。
但呢個唔代表唔去Ocamp就等於冇朋友,Ocamp淨係眾多識朋友嘅其中一個途徑,唔係唯一途徑。開學之後嘅上莊、Hall Life、學會 Soc、甚至系會迎新Day都一樣可以識到人,識朋友嘅時間軸遠比一個Ocamp長。
如果純粹想識人但又唔想俾成千蚊,可以留意下有冇「Day Camp」或者純日間活動嘅版本,通常比正式Overnight Ocamp平好多,都一樣有機會識到組員。
點揀Ocamp?搞手嘅底細要查清楚
如果你決定去,揀邊個Ocamp都係一門學問。同一間大學入面,唔同書院、學系、學會、舍堂搞嘅Ocamp,玩法同風氣可以差好遠。
一般嚟講,由學系或者學會(Society)搞嘅Ocamp,因為有系會/學會嘅架構同老師隱形睇住,加上想維持個系嘅聲譽,玩法通常會比較收斂、有分寸,房Game都偏向溫和向。相對嚟講,一啲舍堂或者純學生自發搞嘅Ocamp,因為冇太多監管,風氣可以去得比較盡,玩法上限亦都較難預計。
所以報名之前,花少少時間做下功課係值得嘅:去返學校嘅Secrets、Threads、Instagram搜下個Ocamp嘅名,睇下有冇往年嘅評價或者投訴;問下高年級嘅師兄師姐,個組織風評好唔好;
房Game玩到盡頭?有啲位都要自己判斷下
講真,房Game之所以咁多人期待,某程度都係因為佢有機會玩到比較熟、比較放嘅程度。
由普通破冰Game,到真心話、大冒險,再到一啲比較「玩開先會有」嘅環節,每組風格可以差好遠。有啲組全晚笑到停唔到,有啲組就會玩啲比較刺激、比較考驗心理質素嘅玩法。
但記住一樣嘢:Ocamp目的係識朋友,唔係證明自己有幾玩得。
如果有啲Game你真係唔舒服,例如唔想講私人問題、唔想有身體接觸、或者覺得個玩法太過火,直接講「pass」其實完全正常。大部分組爸媽都知道每個人接受程度唔同,唔會因為你唔玩一個環節就當你掃興。
其實最好玩嘅Ocamp通常唔係因為玩到幾癲,而係一班人玩完之後仲可以舒服咁相處幾年。玩得開心之餘,保留返少少判斷力,呢個先係最重要。
去之前實用貼士
- 帶多一套衫(City Hunt玩完通常成身汗)
- 帶水樽同小風扇,夏天日頭活動真係會頂唔順
- 眼罩、耳塞如果驚瞓唔到都可以帶埋
- 有藥物敏感或者身體狀況,記得提早同組爸媽講
講到尾
玩得開心就玩,唔想玩就Pass,冇必要為咗融入而勉強自己。
講到底,Ocamp最珍貴嘅唔係玩過幾多個Game,而係幾日之內由一班陌生人,變成之後幾年會打招呼、食飯、做Project嘅朋友。
如果你仲喺度諗緊揀邊科定係擔心JUPAS選科,可以睇下我哋其他篇DSE同JUPAS嘅相關文章,開學前搞掂晒啲雜務,先可以安心去玩。



