2026 香港大學生必備 Apps＋網站＋免費工具｜温書、筆記、AI、做功課懶人包
開sem頭嗰兩日真係最亂，reg完科先發現自己連堂喺邊都唔知，班巴士又遲遲未到，Telegram swap group仲開始洗版。呢篇係2026香港大學生必備Apps同免費工具清單，讀degree、副學士同高級文憑都啱用，主要幫你搞掂timetable、交通、筆記、group project同交功課。
本文並非贊助內容，亦不含任何affiliate連結，所有推薦均出自學生角度的個人意見。
🎒 開學必裝：LMS & 大學專屬App
唔同學校唔同系統，各間U而家大概係咁，其他學校就自己去IT頁睇返最新資料。
| Uni | LMS | Uni App | 有咩用 |
|---|---|---|---|
| HKU | Moodle | HKU App | Timetable, Moodle入口, 圖書館book位, 校巴, 點名已合併, Access Code開門 |
| CUHK | Blackboard | CUHK Mobile | 校園資訊, 新聞, Blackboard另開web |
| HKUST | Canvas | HKUST Student / iLearn | 課程內容, 交功課, quiz, Path Advisor地圖 |
| CityUHK | Canvas | CityUHK Mobile | 上堂考試時間表, 房booking, 圖書館, 飯堂, Mobile ID QR |
| PolyU | Blackboard | PolyULife | 上堂考試時間表, 交費deadline, 連eStudent同圖書館 |
| HKBU | BUniPort | HKBU Mobile + e-Card | QR入圖書館同宿舍, U-life紀錄 |
| HKU SPACE | SOUL | SOUL App + Learner Portal | 筆記, 老師announcement, SCORE睇分, MyFuture報offer |
| PolyU HKCC / SPEED | Blackboard | my.HKCC / my.SPEED | Portal為主, 無單一旗艦app |
開學前順手搞掂printing，同埋搞掂Octopus扣錢設定，試印一張，唔好deadline朝早先嚟搞。返屋企想開圖書館database先發現入唔到，就開返學校VPN，而家幾間U都強制要用MFA，開學前記得set好authenticator。
🗓️ Timetable同功課管理
UniTable 影張相就入好課表
UniTable 係 iPhone同iPad用嘅課表app，要iOS 17.4以上。免費版得3科，不過試下都夠。超過3科先要課金。不過要留意，影相import課表係premium功能，免費版要手打。價格同功能會變，課金前睇返App Store最新價。
點解值得裝，有幾個位幾啱大學生平時用：
- 影timetable相自動拆科，唔使逐格打
- 朋友掃QR code就可以直接copy你個timetable，同班做group project嗰陣幾方便
- Widget擺home screen，下一堂幾點、喺邊間房，一眼就睇到
- Sync去電話calendar，Google嗰邊都見到
- 入埋assignment分自動計平均，追分方便
老實講，評價唔多，似indie細app。但影相入課表呢下真係慳時間。
Google Play：暫無，Android冇呢個app，就用返Google Calendar算。
Google Calendar / Apple Calendar
睇你用邊個ecosystem，iPhone就Apple Calendar，Android或者學校係GSuite就Google Calendar。Built-in已經夠，唔使再裝，實際用途：
- 將UniTable課表sync過嚟，下一堂喺widget見到
- 加退選deadline，考試日期，交功課日子一次過擺晒入去
- Group project開個shared calendar，deadline唔使逐個問
- Part-time排更都記埋，唔好同堂撞期
Apple Reminders / Google Tasks
Calendar記幾時要做，呢個就記仲有咩未做。
功課可以拆細逐項剔，買餸、買文具、要交咩文件都可以掉入去。iPhone用Reminders，Android用Google Tasks，跟返自己部機個系統，同步同通知都方便啲。
🚌 返學交通：遲到一次就識驚
HKBUS.app 無廣告查車
平時搭巴士或者小巴返學，呢個夠輕身，查車又快。免費無廣告，open source，包九巴，龍運，城巴，新大嶼山巴士，專線小巴。可以搜附近100至500米內嘅車站，連車費都show埋，中英對照。
| App | 廣告 | 巴士加小巴一次過 |
|---|---|---|
| HKBUS.app | 無 | 有 |
| App 1933 | 有 | 九巴系為主 |
| Citybus App | 有 | 城巴系為主 |
官方app唔係唔好用，只係功能比較重，趕時間嗰陣我自己反而鍾意HKBUS呢類輕身啲嘅。Bookmark定屋企同學校嗰兩個站，朝早一眼睇晒。
Amap 揸車返學先裝
如果你揸車返學，Amap值得裝。佢個導航比較偏向揸車用，複雜路口、隧道同分岔位會標得幾清楚，亦會較早提示應該行邊條線。香港有啲窄路同複雜路口，用佢有時會比Google Maps或者Apple Maps更容易睇清楚點行。
英文介面都有，香港電話號碼亦可以登入。平時搭車就唔使裝，HKBUS.app已經夠。
Amap App Store
Amap Google Play
MTR Mobile + App 1933 + Citybus App
- MTR Mobile：下一班車，車費，轉車月台， promos入app撳
- App 1933：九巴龍運官方ETA
- Citybus App：城巴官方ETA
三個官方，資料齊但有廣告。個人認為HKBUS.app順手d，官方app做後備。
MyObservatory
黑雨打風有冇堂，開呢個睇天氣警告最直接。開通知 & 定期check app，朝早唔使估。
💰 錢同學生著數
八達通學生身份要識搞
Student Octopus唔係自動有，要喺Octopus App撳MTR Student Travel Scheme申請。iPhone 8或以上，Android要NFC加Android 12以上。符合資格嘅學生要搞掂申請，先可以享學生車費優惠。
- 開Octopus App，Home撳All Actions
- 撳MTR Student Travel Scheme，新申請
- 跟住指示交學生證明文件，等批
PayMe：間中有啲著數執
PayMe平時當FPS咁收錢已經夠方便，二手書、group錢、AA飯錢都用得着。另一個值得留意嘅係佢成日會random drop coupon同優惠，有時食飯、買嘢或者其他消費會突然有張coupon可以拎，見到啱用就順手拎埋。
UNiDAYS：學生優惠集中地
學生身份驗證用，Spotify、YouTube Premium同其他brand嘅學生優惠都可以喺入面搵。唔一定日日開，但買嘢或者訂subscription之前check一check，有時真係慳到錢。
📦 二手書同學生用品
Carousell：9月搵二手textbook
開sem頭特別好用。Textbook、calculator、hall用品甚至上一手用完嘅課程材料都有人放，買之前睇清楚版本同condition，唔好貪平買錯edition。
📝 筆記同溫習：iPad寫notes係基本
GoodNotes / Notability / CollaNote 點揀
唔使三個全裝，揀一個寫足一個sem。三個定位幾唔同：
| App | 最啱邊個 | 最大優點 | 免費版 | 價錢 |
|---|---|---|---|---|
| GoodNotes | PDF、slides多，同時讀幾科 | folder分類、PDF管理好用 | 3個files，import限5MB，錄音每本20分鐘 | Essential $11.99/年；Special Edition另計 |
| Notability | 堂多、要錄音 | 錄音跟住手寫筆記，撳返隻字可以聽返老師講咩 | 可以試用，完整功能要Plus | Plus年費 |
| CollaNote | 唔想課金 | 免費已有錄音、dark mode等基本功能 | 基本功能已夠用 | 免費 |
簡單揀法：
- PDF、slides成堆 → GoodNotes
- 最重視錄音 → Notability
- 唔想俾錢 → CollaNote
如果你有學生資格，GoodNotes亦可以睇下Student Beans有冇優惠；價錢同功能會變，課金前睇返App Store最新資料。
Notion 學期大腦
Notion做學期dashboard，一頁睇晒功課，deadline同reading link。Toggle list收起答案，考前self test好用。如果你有學生資格，可以用school email申請免費Plus；記得每年verify一次。用手機寫筆記始終唔夠GoodNotes嗰類順手，佢最強係整理。
另外iPad有built-in Math Notes，手寫條business math公式即刻計，唔使裝。
YPT 讀書計時同自律組
韓國讀書app YeolPumTa，5M人用緊。逐科計時，10分鐘planner，每日to-do，每週每月stats，顏色愈深代表你讀得愈多。開group見到朋友讀緊幾耐，ranking會逼你唔好碌電話。Focus mode仲可以block分心apps。免費夠用，進階先要課金。
Anki + Quizlet
- Anki：spaced repetition背嘢神器，nursing、law呢啲要背好多嘢嘅科幾啱用。Desktop免費，Android免費，iOS版現時一次買斷$24.99，無trial。iPhone唔想俾錢就用AnkiWeb頂住，或者用Quizlet。
- Quizlet：自己整卡或者upload筆記AI整卡，offline搭MTR背，仲有textbook題解。
Genius Scan 掃功課交PDF
免費版已經夠用，無廣告無浮水印，掃幾多份都得，offline都用到。Worksheet影完直接出多頁PDF交。OCR要俾錢，現時Ultra $39.99一年，純交功課唔使OCR唔使俾。
📚 寫文同Research：HD同Year 1都要識
Zotero + MyBib 唔使手打APA
兩個一齊用，短功課同FYP都cover到。
| 工具 | 啱咩用 |
|---|---|
| Zotero iOS | 免費，Safari撳Share就save paper，Pencil highlight，APA過萬款式，scan書barcode入library |
| MyBib web | 免費網頁無廣告，書名URL或者ISBN自動出APA MLA Chicago，即copy貼入Word同Google Docs |
Zotero用得多就建議用desktop版，iPad留返做annotate同睇PDF。MyBib無原生app，用Safari開就得。
Z-Library
搵 Reference / 影印本必備嘅神級電子書庫
用途： 搵免費電子書、大專教科書、學術論文、參考資料。
讀大學最怕買貴教材同搵唔到 Assignment 資料。Z-Library 齊集了數以百萬計嘅電子書、各科教科書、外文書籍同 Lap/Academic 論文。除咗 PDF 格式之外，仲支援 EPUB 方便喺 iPad 或 e-Reader 慢慢睇。做 Research 寫 Paper 嗰陣，喺 Library 搵唔到或者想睇延伸閱讀，嚟呢度 Search 下通常都有驚喜，堪稱大專生必備嘅資料庫。
Sci-Hub ｜ 學術論文免費解鎖神器
每次喺 Google Scholar 搵到好啱用嘅 Paper，入到去發現要 $30–$40 USD 買一篇？
Sci-Hub 就係解決呢個問題嘅工具。只要複製文獻嘅 DOI 貼落去，即刻幫你拎到 Full-text PDF。
雖然各大學庫通常有 Library Access，但遇著冷門 Journal 或者學校冇買 Coverage 嘅資料，Sci-Hub 基本上係大專生寫 Essay / 做 Research 嘅最後防線。
DeepL + Grammarly
DeepL 英文翻譯器
寫formal英文、改email、整presentation稿都幾方便，成段掉入去可以直接翻譯，仲可以順手執埋tone。英文唔知點寫嗰陣，比逐句Google Translate再自己改自然好多。
Grammarly
Grammarly：交英文功課之前掃一次，grammar、拼字同句子讀落順唔順都會幫你捉。免費版已經夠做基本check，先睇下學校圖書館有無送premium，唔使急住自己課金。
Google Scholar
搵academic source唔好淨係Google亂search，Google Scholar專門搵journal、conference paper、thesis同其他academic publication。最方便係見到啱用嘅paper之後，直接撳「Cite」拎APA、MLA、Chicago格式，再丟入Zotero整理。
幾個幾實用嘅位：
- 用引號搜exact phrase，搵返一篇指定topic嘅paper
- 撳「Cited by」睇邊啲paper引用過佢，追落去搵更多source
- 撳「Related articles」搵同一topic嘅其他研究
- 見到右邊有[PDF]就可以直接開全文，唔使撞library paywall
- 設定email alert，有新paper出就會通知你
無官方mobile app，用Safari開Google Scholar已經夠。搵到source之後再用Zotero save，之後寫Reference list會輕鬆好多。
Canva 整presentation, infographics
Group present趕deadline嗰陣，Canva最大用途係唔使由白底開始自己砌。揀template改字換圖，幾個人可以一齊喺browser改，做完直接export PDF或者PowerPoint。
- Group project一齊改，唔使send嚟send去幾十個version
- Presentation揀template起稿，alignment同spacing唔使自己慢慢執
- Infographic、poster、流程圖呢啲用Canva快過PowerPoint
🛡️ Ad blocker：上網少啲垃圾
如果你成日search資料、搵PDF、睇tutorial，ad blocker其實幾值得裝。除咗少啲banner同popup，亦可以減少tracking、假Download掣同啲一撳就跳去另一頁嘅廣告。做assignment嗰陣少好多煩嘢。
Chrome：uBlock Origin Lite
Chrome而家對舊式extension嘅支援有變，所以唔好照抄幾年前叫你裝uBlock Origin嘅教學。Chrome用緊新嘅Manifest V3架構，而家直接裝uBlock Origin Lite就最簡單。
免費、開源，裝完已經會block ads、trackers同其他垃圾request。
Chrome Web Store — uBlock Origin Lite
Safari / iPhone / iPad：AdGuard
Safari可以直接用content blocker，iPhone、iPad都得。AdGuard免費版已經可以block Safari廣告、pop-up同基本tracking，裝完再去Safari Extensions開啟就得。
App Store — AdGuard Ad Blocker
Android：Firefox + uBlock Origin
Chrome Android唔支援一般desktop-style extension，所以想有完整ad blocker，可以用Firefox + uBlock Origin。
uBlock Origin有正式Firefox Android extension，免費，連ads、trackers、pop-ups等都可以一齊block。
uBlock Origin — Firefox Add-ons
📱 咁學生需唔需要？
如果你成日上網搵資料，我會話裝啦。尤其係：
- Google search搵assignment資料
- 搵lecture notes / PDF
- 睇tutorial同documentation
- Search textbook、software或者technical問題
- 上啲學校以外嘅reference website
少啲廣告、popup同假Download掣，個browser乾淨好多。
| 你用咩 | 推薦 |
|---|---|
| Windows / Mac Chrome | uBlock Origin Lite |
| Mac Safari | AdGuard |
| iPhone / iPad Safari | AdGuard |
| Android | Firefox + uBlock Origin |
裝一次，平時基本上唔使理。遇到網站叫你disable ad blocker，再針對嗰個site熄佢就得。
🤖 先check你間U有冇送AI，唔好急住課金
出面好多要收錢嘅AI讀書app，其實好多都係做緊NotebookLM嗰套嘢。唔同係，香港幾間U已經有自己嘅AI畀學生用，入學第一日記得用school account login一次，睇下有咩可以用，可能你已經有ChatGPT、Gemini、DeepSeek或者NotebookLM可以用。
| Uni | 有咩校方AI | 點入 |
|---|---|---|
| HKU | HKU GenAI，ChatGPT，GPT Image，DeepSeek，Gemini，GLM，Qwen，每月50萬AI credits | genai.hku.hk，API portal另有student-genai-services |
| CUHK | Copilot Chat全校學生有，Gemini Enterprise Education連NotebookLM功能，8月加LinkedIn Learning全校平台 | ITSC EdTech頁，Gemini要申請 |
| HKUST | GenAI Platform + OpenWebUI，多模型，web search，upload文件，廣東話語音，每月免費credit | genai.ust.hk，openwebui.hkust.edu.hk |
| CityUHK | CityUHK Chatbot，GPT-5 mini，GPT-5.2，DeepSeek V4 Flash，每月quota | CityUHK Mobile App或者Portal入面IT and Library Services |
| PolyU | PolyU GenAI，ChatGPT，Gemini，Qwen，Llama，Mistral，DeepSeek，Flux同Stable Diffusion等 | genai.polyu.edu.hk，用NetID入 |
| PolyU CPCE / HKCC / SPEED | Gemini Pro 3全校規模，包Deep Research，NotebookLM Enterprise，Veo出片 | CPCE Portal，HKCC同SPEED學生同老師都包 |
| HKU SPACE | AI Hub + SPACE Chat + Copilot，AI政策同approved tools集中喺AI Hub | aihub.hkuspace.hku.hk，用SSO入 |
| EdUHK | EdUHK GenAI，每月150萬credits，ChatGPT，Gemini，Grok，DeepSeek都有 | genai.eduhk.hk |
| HKMU / HSUHK | ChatGPT portal + OLE chatbot + AI Hub，每間叫法唔同 | 學校AI頁或者OLE入面搵 |
HKU 每月50萬credits
HKU GenAI App同API portal共用quota，學生每月50萬AI credits，每月1號reset。用得多可以自費top up。Model list成日轉，現時有ChatGPT，GPT Image，DeepSeek，Gemini，GLM，Qwen。如果份功課有敏感資料，先睇返學校個AI policy，唔好以為係校方AI，就乜資料都夠膽掉入去。
CUHK Copilot人人有，Gemini要申請
Copilot Chat Basic係跟Microsoft校園agreement開放畀學生用，全校學生自動有，用嚟brainstorm同寫草稿夠。Gemini Enterprise Education就有NotebookLM功能，但個別功能要視CUHK開通安排，老師同助教要填form申請。另外LinkedIn Learning 2026年8月全校推出，做AI literacy同搵工skill，9月開學啱啱好，記得去EdTech頁睇。
HKUST 處理confidential嘢用返學校平台
佢嘅好處係chat data跟學校security指引走，唔想將功課掉去出面啲AI就用佢。OpenWebUI係升級版，web search多啲，文件upload格式又多啲，廣東話語音輸入，仲可以同一個chat轉model比較。每月有HKD 8免費credit，同GenAI Platform共用，唔夠先top up。
CityUHK Chatbot 原來喺Mobile App入面
唔喺App Store另外下載，就喺CityUHK Mobile App撳Academic再撳CityUHK Chatbot，或者Portal撳IT and Library Services。現時有GPT-5 mini，GPT-5.2同DeepSeek V4 Flash，每月quota，開新對話慳quota，history留6個月。
PolyU 模型自助餐
PolyU GenAI寫明係buffet：ChatGPT，Gemini，Qwen，Llama，Mistral，DeepSeek，Hunyuan，Flux，Stable Diffusion都有。Chatbot，寫作，翻譯，code，search一次過。CPCE嗰邊就仲誇張，HKCC同SPEED都有，同Google Cloud合作全亞太最大規模Gemini Pro 3，包NotebookLM Enterprise同Veo，副學士都用到，唔使羨慕讀degree嗰班。
學校話用AI要declare同cite，course instructor仲可以另加規矩，唔跟當plagiarism，後果自負。
講句老實嘢，你遲早都會用AI趕功課。但真係要抄，都咪用學校account嗰個嚟抄，log晒邊個幾時問過咩，捉到你咪即刻釘死你。
NotebookLM 王牌用法，學校有都要識
學校AI未必有NotebookLM，就算有，Google嗰個都值得識。玩法唔係叫佢幫你寫，而係掉sources入去再問。
- 成week slides一次過dump入去
- 撳Audio Overview，搭MTR當podcast聽
- 問佢出mock題，唔明位叫佢用簡單英文再講
做法：
- 一科開一個notebook，唔好溝埋
- Upload PDF同Google Docs，唔好貼成堆亂碼
- 出完個結果自己再寫一次重點，唔好抄
CUHK同CPCE嗰邊已有NotebookLM enterprise安排，Google學生plan本身都包NotebookLM Plus同2TB。兩邊邊個方便就用邊個。
Gemini / ChatGPT / Perplexity / Claude 免費版後備
- Gemini：配Google全家，學生plan最抵
- ChatGPT：寫大綱同改文最順
- Perplexity：要source嗰陣用，有cite
- Claude：長文／文件整理幾強
有學校AI就用學校嗰個，唔夠先用出面啲免費版。邊個免費先用邊個，唔使四個全課金。
ChatGPT (vpn required)
Claude (vpn required)
💾 學校送嘅Software唔好自己買
唔好見到Adobe同MATLAB就即刻課金，好多間U本身有campus licence。用EID或者NetID login睇下先。
| Uni | 學生有咩正嘢 | 注意 |
|---|---|---|
| CityUHK | MATLAB + Simulink + 80幾個MathWorks tools，自用機都裝到，browser開MATLAB Online都得，另有Foxit，SPSS，VMware，Sophos | Adobe CC係enterprise agreement，學生裝Office用M365 Apps for Students |
| HKUST | Foxit PDF Editor免費，自己Windows Mac裝到，SSO開通，另有Mathematica，MATLAB，SAS，SPSS，Zoom，VPN | 部分經download portal或者VDI，Acrobat唔使急住買 |
| PolyU | SCC + vSCC remote用software，MatLab，SPSS，Adobe CC，AutoCAD，TLIT Lab仲有DaVinci Resolve，Blender，Unity | 唔一定要部機勁，喺屋企remote入vSCC用學校部機 |
| HKBU | Adobe Express + Firefly全校學生有，100GB，每月250 generative credits，Adobe Stock任用 | Full Creative Cloud目前staff only，唔好寫錯話學生有CC |
| CUHK | Copilot Chat跟Microsoft校園約，Gemini Enterprise要申請，LinkedIn Learning 8月全校開 | Gemini個別功能視CUHK開通情況 |
| HKU SPACE | AI Hub集合ChatGPT同校內AI，另有Copilot，AI政策頁列明approved tools | 要SSO入，舊subscriber account已清 |
| EdUHK | GenAI每月150萬credits，另有API俾department起chatbot | 用network account入genai.eduhk.hk |
CityUHK 唔好咁快買MATLAB同PDF software
MATLAB、Simulink、80幾個MathWorks tools、Foxit PDF Editor都有校方license。MATLAB仲可以裝自己部機，browser開MATLAB Online都得。Adobe就唔好直接當學生個人機都有full CC，先check自己資格。SPSS經JUCC site licence，Sophos防毒自用機都裝到。先用EID login睇資格，唔好自己俾原價。
HKUST Foxit免費係重點
Foxit PDF Editor之前只喺Virtual Barn用到，家陣學生自己Windows Mac裝到，SSO開通，仲有online版。功能同Acrobat Standard差唔多，開合併轉分割填form都得。學校 survey就係因為太多人想要方便PDF工具先推出，唔使再周圍搵crack或者亂課金。Mathematica，MATLAB，SAS，SPSS另外經download portal或者VDI攞。
PolyU 部機唔勁都run得郁
PolyU SCC喺李嘉誠樓4樓，200幾部機，唔使book。TLIT Lab有DaVinci Resolve，Blender，Unity，Unreal，啱晒交片同game功課。重點係vSCC，屋企開browser、用NetID就remote到SCC啲licensed software，MatLab，SPSS，Adobe CC，AutoCAD都包。CPCE即HKCC SPEED仲有Gemini Enterprise經portal入，Qwen都有。
HKBU Adobe Express + Firefly已經有
HKBU學生用school email login就開到Adobe Express同Firefly，記得揀 Adobe Express and Firefly (HKBU) 呢個profile，唔好撳錯。每人100GB，每月250 generative credits，用完唔會停，只會慢。Stock相任用，branding功能都有。目前Full Creative Cloud desktop版寫明staff only，學生唔好寫成有CC，係Express先係學生嗰份。
✅ 學校account仲有啲咩？開學第一日check一次
好多嘢唔係喺App Store搵，而係藏喺學校IT portal。入學第一日，用school account逐樣check：
- AI / GenAI portal開到未，quota幾多
- PDF editor有無免費版
- MATLAB / SPSS / Mathematica，你科用先裝
- Cloud storage有幾多，畢業會唔會收返
- VPN點開，返屋企睇database靠佢
- Library database識唔識入
- Printing要點set，Octopus點扣錢
- Remote desktop / virtual lab / software download portal
上面學校AI同software兩節就係咁嚟，唔係叫你裝多37個apps，而係話畀你聽學校靜靜哋送咗一堆嘢，無人會逐樣提你自己去攞。
🎬 交片功課：有啲科真係要剪片
DaVinci Resolve for iPad + Adobe
DaVinci iPad版免費，免費版基本夠交大部分功課，無浮水印，4K都出到。真係玩重型剪輯先考慮Studio，現時 $95一次過。M chip iPad最順，舊A chip有啲功能用唔到，要iPadOS 16以上。PolyU同學如果部iPad唔夠力，直接去TLIT Lab或者vSCC用學校版。
Adobe就Express整圖，Reader睇PDF。HKBU學生直接用學校個Express，想用CC學生價就先問學校有冇，唔使自己亂買。
DaVinci Resolve for iPad App Store
Adobe Acrobat Reader App Store
Adobe Acrobat Reader Google Play
💬 師兄姐情報網：加退選靠呢啲
Telegram 加Drop換科同Non-JUPAS情報
WhatsApp係班group，Telegram先係全年級戰場。Add drop嗰兩星期，每日都有人放位換堂，直接TG搵人快過逐個問。Sub-degree同學重點睇Non-JUPAS同senior year群，有師兄姐po offer、GPA同收offer嘅情況，睇落幾方便。尤其副學士/HD：搜「Non-JUPAS」「senior year」「offer」通常比淨係搜學校名有用。
用法：
- 搜學校名加add drop，swap，reg科
- 搜Non-JUPAS，senior year，睇offer分享
- 入群先睇pinned message，唔好一入就問重複嘢
- 換科約交收要小心，唔好亂俾個人資料
Channel名成日轉，唔貼死link，自己喺Telegram搵返最新嘅。
學生論壇同吹水區
呢啲未必係你日日開嘅apps，但遇到選科、搵past paper、問科伏唔伏，或者想知其他學生點諗嗰陣就幾有用。尤其係學校冇乜正式渠道講嘅嘢，學生forum反而最容易搵到真人經驗。
- Discord：好多學系、社團同student server都有，CS、design呢類科尤其多，搵notes、past paper、assignment resources或者直接問師兄姐都方便。
- Dcard u life：換科、伏科review、hall文化、學校生活呢啲學生經驗幾集中，想睇下其他人點講一科可以先search下。
- Threads / IG secrets：加退選期間成日有人講邊科伏、邊個professor多人鬧，想睇下近期風向幾方便。
- LIHKG：學生比例冇以前咁高，但校園、apps、科技同日常討論仲係會有料，當第二個search engine用都得。
Duolingo 得閒學多個語言
主修以外學韓文日文德文都得，每日十分鐘，唔使同GPA鬥。
🎯 結語：開學前先搞掂呢5樣
唔使一次過裝晒，開學前先搞掂呢5樣：大學App、HKBUS.app、學校AI portal、NotebookLM、Telegram。聽日返學已經順好多。其他等第一份功課嚟先再裝都未遲，software就更加要先check學校有冇送，唔好自己先課金。
仲有啲學生福利未執好，睇埋我哋9月版大學生著數指南，Octopus、UNiDAYS同戲院優惠乖乖哋拎晒佢。
