【DSE/大專生必讀】免費IELTS評估平價課程？小心誤墮高壓借貸陷阱！

陌生電話響起，對方好friendly咁問：「最近讀書/返工點呀？」，跟住送多句「想唔想試個免費IELTS評估？」。如果你最近都收過類似電話，恭喜你，你可能啱啱avoid咗一個幾萬蚊嘅陷阱，或者好唔幸咁已經跌咗入去。

呢類針對DSE生、大學生嘅冷call式IELTS課程推銷，響香港已經流傳咗一段時間。今次我哋唔講一般嘅「貨不對辦」投訴，而係專門講一種手法更加陰、殺傷力更大嘅版本，MLM式高壓推銷，仲要拉你去借錢嗰種。

個Call Source：你部電話點解會有人打嚟

先講你部電話點解會突然有陌生人打嚟。答案好多時唔止一個，可能係:

• 你之前響網上填過表格留低電話（例如抽獎、問卷、免費資料包），資料被轉售俾第三方；
• 電訊商層面漏出去嘅data
• 街上派傳單、填問卷嗰啲「順手」留低聯絡方法，都係常見來源。

呢啲資料一旦流出，就好難追返去邊個環節出事，所以與其查邊個漏，不如準備好自己以後點應對。

由一通電話到簽咗份貸款：個套路點行

呢個部分，我哋跟返一個真實IG post個案（下面會再詳細講），逐步拆解成個流程係點行嘅。

① 陌生來電

電話響起，caring，唔會一開始就sell嘢，反而先關心你「最近讀書/搵工進度點呀」，跟住先輕輕帶出「想唔想試下免費IELTS評估」。呢個開場故意設計到唔似sales call，等你放低戒心。

② 到場測試

你回應咗，佢哋約你去一間「中心」，去到會做一個簡短嘅level test。呢個test本身唔一定準，但重點唔係準唔準，而係營造一種「呢度好專業、有認證」嘅感覺，等你之後更加信佢哋講嘅嘢。

③ 密室換人

test完，你會被帶入一間細房。傾傾吓，最初嗰個sales會話要「叫個同事」入嚟，然後換咗個自稱係「高級顧問/主管」嘅人加入，繼續同你傾。呢招叫tag-team pressure，兩個人輪住講，你會愈嚟愈攰，判斷力自然落。

④ 拆細數字

呢度先開始講價錢。成套course可能開價 $20,000 - $60,000 唔等，聽落好嚇人，但佢哋唔會俾你消化呢個數，即刻拆細：「其實分期一個月都係 $800幾咋」、「出席率同合格夠嘅話，持續進修基金(CEF)資助返成9成」。

你腦入面嘅「3萬好貴」瞬間變成「$800好抵」，呢個純粹係number framing嘅心理技巧，同商場「限時優惠」拆做每日幾蚊嘅計價法一模一樣。

HOWEVER, 好多人唔知：CEF 係「事後發還」，唔係「即場扣減」。

即係話，你要先自己全額俾晒學費，之後成功修畢一個已登記响政府名單嘅合資格課程，先可以自己向政府申請發還部分費用，過程完全唔經個中心。CEF由頭到尾都唔會直接找數俾任何一間中心，更加唔會俾一間未登記响名單嘅機構。

如果對方講到好似「政府會直接補貼俾中心，你淨係俾差價」，呢個講法本身已經有問題。

⑤ 心理打擊

如果你仲有啲猶豫，佢哋會轉用另一招，攻擊你嘅自信。

常見講法係「你依家英文水平同同齡人差好遠㗎喇」、「唔學嘅話出到嚟做嘢/入到大學都應付唔到」。呢招之所以特別work响DSE生、大學生身上，因為佢哋精準捉住咗你最深層嗰種焦慮，怕自己英文未夠水準入大學、達唔到大學Non-JUPAS/Senior Year Entry Requirement、將來搵工又輸俾同齡人。

呢啲說話唔係想幫你，係想製造焦慮同羞愧感，逼你即場決定唔好諗多陣。

⑥ 誘導貸款

如果你話俾唔起咁多錢，呢步先係全個套路最危險嘅地方。佢哋唔會就此收手，反而會主動提出「幫你安排分期」，甚至直接攞出一份第三方貸款/財務公司嘅申請表，話「好簡單啫，填幾行就得，過幾日就批」。

通常係sales攞住自己部平板電腦，一路講一路幫你「代填」大部分資料，將成件事包裝成好平常嘅「每月學費分期」，跟住催你趕快撳「我同意」，你連仔細睇清楚條款嘅時間都冇。

呢度有個關鍵位好多人唔知：你以為自己响分期繳學費，但實情係財務公司（或者BNPL平台）已經一筆過將成套course嘅金額直接找晒俾間中心，你嗰啲「每月供款」其實係還緊俾財務公司嘅貸款，唔關中心事。

呢個亦解釋咗點解就算你事後想退學或者停課，都停唔到你要繼續還錢，因為你欠嘅債主已經係財務公司，唔係嗰間補習社，中心收唔收到你錢，你都要準時還款，唔還嘅話會直接影響你嘅個人信貸紀錄。

⑦ 細額按金鎖死你

最後佢哋會叫你俾一筆唔太大嘅按金「留位」，例如$300到$2000。呢筆錢本身唔多，但一俾咗，你個心態就會變成「都俾咗咁多，唔簽埋落去就蝕晒」，sunk cost心理令你更容易妥協簽落去。

呢七步唔係亂咁排，每一步都係經過設計，目的係逐步瓦解你嘅判斷力，等你去到最後簽合約嗰刻，已經冇心機再諗清楚。

點解成套嘢咁似MLM

睇返成個流程，你會發現同 Multi-Level Marketing 傳銷手法有好多相似位：

呢個對比唔係話間機構一定係MLM組織，而係佢哋用嘅心理操控手法，同MLM洗腦套路幾乎一模一樣。識穿呢套模式，你先會明白點解好多本身好清醒嘅人，去到現場都會頂唔順簽落去。

模式講完，到底實況有幾誇張？我哋可以睇吓真實受害者嘅分享：

真實case：一個IG Post入面嘅親身經歷

呢個個案嚟自 Instagram 帳號 @schools.secrets 底下嘅一個投稿留言，事情發展大致係咁：

1. 事主接聽咗一個聲稱係 IELTS 機構嘅 cold call
2. 到場之後俾人試堂，跟住就係足足兩個鐘嘅高壓銷售
3. 最後開價$17,800，話可以分四期
4. 對方：出席率同合格嘅話，政府會資助返約$13,000
5. 最後俾咗$300留位費，加埋一期一半嘅學費，即係總共2,300
6. 事後同朋友傾返，先驚覺唔對路，上網搜尋先發現呢種模式疑似傳銷
7. 事主想追返俾咗嘅$2,300但追唔返，唯有決定放棄尾數唔再交
   （提提大家：如果簽咗嘅其實係第三方貸款合約，單方面唔交尾數可能會影響個人信貸紀錄，甚至俾財務公司追討，呢點千祈唔好輕視，最好先搞清楚份合約性質先決定點做）
8. 而家最擔心係唔交尾數嘅話，會唔會被人拎個人資料做其他用途

呢個case幾乎完美對應返上面七個步驟，你會發現由「免費試堂」到「$17,800拆做每月幾百蚊」再到「按金鎖死」，成個flow同我哋分析嘅一模一樣。

睇返原文 (Instagram)
https://www.instagram.com/p/CwACBwnByRO/

順帶一提，消委會同工聯會過往都收過類似投訴，涉及嘅英語培訓機構收費同樣海鮮價，不過嗰啲case性質偏向「課程程度錯配、貨不對辦」，同今次講嘅冷call+誘導借貸唔完全一樣，但都反映出呢個行業銷售手法確實有一定問題，值得大家提高警覺。

危險訊號 Red Flags

睇到呢度，你應該已經有個底。如果你最近有類似經歷，可以對返以下清單自己check：

• 電話係「3」字頭 + Cold Call
• 現場先話你「免費」，但一去到就變成一個銷售room
• 有人中途加入，用「主管/高級顧問」身份加壓
• 大數字即刻被拆做「每月$XXX」嚟講
• 開始攻擊你嘅能力/前途，令你有恐懼感
• 你話冇錢，佢哋即刻提出幫你安排貸款/分期
• 要求你即場俾錢先俾你睇齊份合約

以上超過兩三項中晒，基本上可以肯定唔對路，第一時間應該停手，唔好再俾多一蚊。

已經俾咗錢/簽咗嘢，而家點算

呢部分要老實講返俾你聽：香港其實冇一般性嘅法定冷靜期適用於教育、語言或補習類課程合約。法定冷靜期只存在響某啲特定行業（例如保險，同某啲上門推銷嘅電訊服務），教育中心/課程提供者依法唔包括響入面。政府雖然近年有諮詢緊會唔會就美容、健身呢類預繳服務推行強制冷靜期，但課程呢個範疇暫時未涵蓋。

即係話，一旦你簽咗合約，或者同意咗份貸款/分期協議，你唔可以純粹話「我change主意」就要求7日內取消，除非份合約本身明文寫低呢一條（呢類sales基本上唔會俾你呢一條）。

你可以做嘅嘢：

1. 停止再交任何款項，包括尾數
2. 保留所有對話紀錄、收據、合約、宣傳資料（截圖）
3. 香港有《商品說明條例》（Cap. 362）保障消費者，幾種情況特別啱用响呢類case：

如果對方用密室加壓、催谷你即場決定嗰啲手法，可能構成威嚇性營業行為 (Aggressive Commercial Practices)

如果對方假稱同British Council/IDP有合作、或者虛報認證，可能構成虛偽商品說明 (False Trade Descriptions)

如果對方响簽署過程中冇講清楚「分期繳費」實情係綁定一份第三方貸款合約，隱瞞呢個關鍵事實，可能構成誤導性遺漏 (Misleading Omissions)

以上三者都可以向香港海關投訴跟進，講返呢啲字眼可以令投訴更加精準

1. 同時向消費者委員會提出投訴，佢哋會嘗試調停
2. 如果涉及金額唔算太大，可以考慮小額錢債審裁處追討
3. 如果已經簽咗第三方貸款，額外去信財務公司講明情況，同步保留證據，必要時尋求法律意見

點分真假機構：British Council同其他「認可」機構點verify

好多sales為咗令你放低戒心，會聲稱自己同British Council有合作，或者話間中心係「政府認可」。呢啲講法你完全可以自己查證，唔使信對方口講：

• British Council同IDP官方都唔會主動冷call你sell課程。喺香港，IELTS 官方考證同課程機構得 British Council 同 IDP 呢兩間（IELTS本身係由British Council、IDP 同 Cambridge University Press & Assessment三方共同擁有），坊間任何其他機構都無權代表官方推銷。如果對方聲稱代表任何一間、或者話同佢哋有合作，直接上返佢哋官網或者打官方電話核實，唔好靠對方主動畀你嘅聯絡方式
• 換句話講，IELTS官方考試主辦方得返呢兩間，市面上其他街外機構同佢哋一律冇從屬關係，佢哋更加唔會外判sales team幫手上門/電話推銷課程
• 持續進修基金 (CEF) 認可課程必須響政府「課程搜尋器」名單入面。唔好信sales展示畀你睇嘅宣傳單張或者證書，自己上wfsfaa.gov.hk用返個課程搜尋器查一查間中心、個課程係咪真係响名單度，同埋登記有效期過咗未

其他實用小貼士：

• 合法機構通常唔會要求你即場俾錢先俾你睇齊份合約
• 唔會用「今日先有呢個價」逼你即決
• 唔會唔俾你帶合約返屋企諗清楚先簽
• Google搜尋唔到呢間「分校」嘅存在，就要格外小心

另外，響防禦層面，可以考慮裝一個來電辨識/攔截app，識別呢類冷call嘅推銷電話。以下係比較多人用嘅選擇：

Jima Caller ID 芝麻來電

iOS: https://apps.apple.com/us/app/jima-caller-id/id910656808

Android: https://play.google.com/store/apps/details?id=com.techmaxapp.hongkongjunkcalls&hl=en

最後一提，街上或者網上見到啲問卷/survey，話填咗有機會抽獎或者送贈品，最好都唔好隨便留低你電話號碼。呢個做法唔保證幫到你完全避開，但都係其中一個資料外洩嘅源頭，減少一個曝露渠道好過冇。

講返轉頭

IELTS本身唔難搵到合適嘅備考資源，官方past paper、學校/圖書館資源、甚至坊間信譽良好嘅補習都做到。如果有人要靠電話突襲、密室加壓、拉你借錢先能夠成單交易，呢個本身已經係最大嘅訊號，話俾你知呢間唔係想幫你進步，係想搵你嘅錢。

下次電話再響起，講到「免費評估」嗰刻，你已經知道發生緊咩事。