【HKCC新生指南】開學前要做咩？註冊、迎新、校園、GPA制度懶人包

你啱啱入咗HKCC，開學前實際要知咩？

拎到HKCC Offer之後，其實仲有一堆嘢未搞掂。註冊、交學費、迎新、時間表、學生帳號，去到9月第一日正式上堂之前，邊樣要做先？

呢篇直接由你接受Offer之後開始講，帶你由註冊一路睇到正式開學：要記低咩日期、要開咩帳號、兩個校園點樣分，同埋由DSE轉去HKCC最容易唔習慣嘅嘢。

HKCC 背景資料

• 機構性質：自資專上院校（副學位機構），資歷架構第四級
• 隸屬大學：香港理工大學（PolyU）
• 開辦課程：副學士（Associate Degree）及高級文憑（Higher Diploma），涵蓋文、理、社、商，另設設計及健康學相關課程
• 在學人數：約9,000人
• 2024年畢業生升學率：90.3%（按學院公布口徑計算，來源），詳細拆解睇下面「銜接口碑」一段

新生重要日期

收到Offer唔代表之後等到9月開學就得。由接受Offer、交學費，到註冊、迎新同收到時間表，中間仲有幾個日期一定要記低。

以上日期以HKCC 2026/27官方公布為準，實際安排以學院之後發出嘅通知為準，詳情睇官網。

你會喺邊度上堂：兩個校園拆解

HKCC而家大部分課堂主要喺西九龍校園（WK）上，部分科目先會安排去紅磡灣校園（HHB）或理大本部。換句話講，對大部分新生嚟講，WK先係你最常返嘅地方，唔好以為兩個校園嘅上堂機會差唔多。

西九龍校園 West Kowloon Campus

對大部分HKCC學生嚟講，西九龍校園先係最主要嘅返學地點。官方資料亦直接寫明，大部分HKCC課堂都喺WK進行，所以你第一個Semester大部分時間好大機會都會喺呢度度過。

WK就冇HHB嗰種獨立Campus嘅感覺，比較似市區入面一座專門畀學生上堂嘅教學大樓。不過正因為你平時比較常返呢邊，附近有咩食、Gap Hour去邊同邊度可以坐低，其實比起HHB更加值得早啲摸熟。

不過返學同落堂高峰時間，Lift都可以幾多人。如果你下一堂喺另一層，而且得幾分鐘轉堂，唔好次次等Lift! 尤其落堂鐘聲一響之後，趕時間嘅話行樓梯有時仲快。

紅磡灣校園 Hung Hom Bay Campus

紅磡灣校園本身設施比較完整，亦比WK有多啲傳統「Campus」嘅感覺。不過對而家大部分HKCC學生嚟講，呢度未必係日日返學嘅地方! 官方最新新生資料亦寫明，大部分課堂主要喺WK進行，只有部分課堂會安排喺HHB或理大本部。

咁HHB仲會唔會去？會，但通常視乎你讀咩科同當學期安排。

部分需要專門設施嘅科目，例如實驗室 (lab) 或工程相關課堂，就較有機會去HHB；實際上堂地點始終要睇返自己個Timetable。近年HHB亦逐步融入PolyU本部使用，PolyU 部分學系同 Faculty 已經搬入，所以去到嗰邊你見到嘅亦未必全部都係HKCC學生。

時間表出咗之後，第一時間check呢3樣：

1. 第一堂喺邊個校園、邊座、邊層
2. 同一日有冇跨HHB／WK／理大本部
3. 兩堂之間夠唔夠時間食飯同轉場

呢3點check清楚，開學第一日就唔會周圍搵路。

圖書館方面，HKCC 同學可以用理大本部嘅包玉剛圖書館（樓高六層，3,900個座位），亦有自己嘅CPCE圖書館喺WK北座5樓。HKCC同學亦可以使用校內打印服務，實際Quota同收費以學院最新公告為準。

開學前搞掂啲工具同帳號

開學前最好至少登入過一次，唔好等到第一日要搵課室、睇通知或者交功課先發現自己唔記得密碼。

my.HKCC
呢個係你喺HKCC嘅大本營，睇你嘅Personal Timetable、選科同查閱個人資料都靠佢。建議開學前登入一次，順手熟習吓個介面。my.HKCC入口

Blackboard（CPCE LMS）
交Assignment、睇Course Material、留意老師公告，主要都係用呢個平台，同my.HKCC係兩件唔同嘅嘢，記得分清楚。Blackboard登入／LMS首頁

Student Email
好多重要通知，例如Cancel Class、改上堂地點或者學院公告，都會經Student Email發出。建議開學前將個Email綁定去手機Mail App，唔好淨係靠自己記得開網頁check。

Campus Wi-Fi
喺HHB同WK校園可以直接連CPCE-WiFi。如果你有eduroam帳戶設定，去到支援eduroam嘅院校或機構時，一般可以直接連網，唔使每次重新開Guest Wi-Fi，實際設定方法同可用範圍以學院IT資訊為準。

GPA點計？HKCC用4.3制

如果你讀HKCC嘅目標係之後轉八大，開學第一個Semester就要開始睇GPA (Grade Point Average)。HKCC由2020/21學年開始採用4.3制，A+係4.3、A係4.0、A-係3.7，之後每級再逐級下降。

簡單講，Semester GPA係你嗰一個Semester修讀科目嘅平均Grade Point；Cumulative GPA就係由入學到而家所有科目累積計出嚟嘅平均數。科目唔同學分，計GPA時亦會按學分加權，所以唔係單純將每科成績直接除返開。

A+唔再係「都係當4.0」，而係真係有4.3。對想衝高GPA嘅人嚟講，呢點都幾重要。另外，如果你Retake一科，GPA只會計最後一次修讀嘅成績。

如果GPA低過1.70，下一個Semester可能會進入Academic Probation，所以真係唔好第一個Semester抱住「Pass到就算」嘅心態。

由DSE過渡到HKCC，最容易唔慣係呢幾樣

Lecture同Tutorial係兩樣嘢
Lecture人數可以多好多，動輒過百人，老師主要負責講內容；Tutorial先係你真正有機會同同學交流、做活動或者討論嘅地方。唔好以為每堂都係中學嗰種幾十人一班，要自己記得邊個Tutorial老師負責你。

天地堂會比你想像中常見
一日得兩堂，中間隔幾個鐘完全冇嘢做係正常情況，例如9點有堂，跟住去到下晝3點先再有堂。你要自己決定留喺校園溫書、去Cafe、食飯，定係直接走人，冇人會幫你安排。呢個亦係點解下一篇會專門講Gap Hour去邊。

一個學期唔係等Final先算數
DSE一試定生死嘅模式喺呢度唔存在，你要應付嘅係Continuous Assessment，Assignment、Quiz、Presentation、Test、Midterm同Final可以全部撞埋一齊。每科比例都唔同，唔好以為淨係Final考得好就得，臨急抱佛腳呢招喺呢種模式度通常唔work。

Group Project唔一定有人幫你組隊：有啲Tutorial會自由組隊，第一堂見到啱傾或者合作到嘅同學，就可以主動交換WhatsApp，唔好等到最後一刻先發現全班已經組晒隊，變成孤家寡人或者被派入「潛水隊」。

出席要求逐科睇：唔好以為讀副學位就可以隨便走堂，唔會好似中學咁日日點名，但唔少科都有計出席，去到一定次數缺席會扣分甚至唔准考試，實際要求（次數、扣分機制）最穩陣係第一堂直接睇Course Outline。

冇乜Hall Life：CPCE其實有喺旺角東安街開學生宿舍，畀HKCC同SPEED學生一齊申請，但床位極少（得46個），本地生想申請到基本上機會渺茫 (0機)，宿位一般會優先畀有實際住宿需要嘅同學。

所以現實係，大部分同學都係每日搭車返學、放學就返屋企，識人主要靠Tutorial同Group Project，如果你唔主動，好易變成上堂就走人嘅狀態。

HKCC嘅銜接/升U口碑：唔止睇90.3%呢個數字

如果你目標係PolyU，HKCC自然係好多副學位學生會考慮嘅選擇。畢竟HKCC同PolyU關係密切，部分課程亦有比較直接嘅銜接途徑。網上流傳嘅講法係HKCC「Chur」，讀嘅嘢深啲、記嘢多啲，甚至有人形容HKCC係PolyU嘅「親生仔」，呢類講法喺同學之間幾常聽到，不過始終都係網民自己嘅體驗，唔好當成學院官方講法。

90.3%呢個數字，講嘅係「升讀學士學位課程」嘅整體比率，唔等於「升到八大UGC-funded學位」。根據學院2025年畢業生調查，喺2,623名畢業生入面：

• 79.7%（2,091人）升讀本地八大院校頒授嘅學位課程（包括自資課程）
• 67.5%升讀政府資助嘅學士學位課程
• 33.5%升讀PolyU頒授嘅學士學位課程，11.9%升讀PolyU SPEED學士學位銜接課程

即係話，如果你目標係八大嘅UGC-funded學士學位（即大家平時講嘅「八大正選」），而唔止係PolyU體系內部銜接，實際比率會比90.3%呢個headline數字低一截，睇呢類數字嘅時候記得拆開嚟諗，唔好淨係睇住個大數字。

HKCC生存指南｜由開學前一路睇到開學後