HKCC 食飯攻略 2026｜西九龍、紅磡灣校園附近平價餐廳＋學生優惠

開學冇幾耐，你大概就會開始問：「咁去邊食飯？」

西九龍校園冇飯堂，呢樣嘢你開學第一日就會發現 ：三樓有 7-Eleven，亦有 Pacific Coffee，但想正正經經食餐飯？你要出校門。好彩嘅係，West Kowloon Campus 本身就喺大角咀，行幾步就有嘢食，奧海城更加係你嘅後花園。

呢篇會逐區拆解：邊度平、邊度可以坐耐啲、邊度有學生優惠，同埋夜晚收堂之後肚餓仲可以去邊。

你喺邊度返學，就去邊度食

先畀張總表你對號入座：

西九龍校園一帶

WK 附近嘅搵食選擇，主要分兩邊：奧海城商場同大角咀嘅街坊小店。前者選擇多、有冷氣、穩陣；後者平啲、有特色、但要識搵。

$40 以下：肚餓救急

7-Eleven（WK 三樓南座）

校園入面最方便嘅救急選擇。飯糰、三文治、杯麵，基本操作。朝早 9 點開到夜晚 9 點，星期六就朝早 10 點開到下晝 6 點。落堂遲咗冇嘢食，就靠佢頂住。

山東小城（埃華街）

地址：大角咀埃華街 101 號大衛樓地下 A1 號舖
價錢：陽春麵 $34，餃麵 $50 起，水餃 10 隻$40 至 50
營業時間：每日 11:30 至 22:00

由 WK 行過去大約五分鐘，係附近少數可以正正經經坐低食餐飯嘅選擇。主打山東菜，水餃即包即煮，水餃麵份量都夠。想清靜啲食，可以避開 12 點正。

岱民（紅磡/旺角）

兩餸飯界嘅連鎖霸主，紅磡同旺角都有分店。兩餸$25至$36，三餸加幾蚊，份量穩定，係最唔使諗嘅選擇。唔好期待環境，但抵食係真。

日常主戰場：想快食定坐低食都有

奧海城（三期商場）

行過去大概 5 至 8 分鐘，三期加埋有六十幾間食肆。日常快餐選擇：

• 大家樂（一期）— 港式快餐，套餐 $40 至 $55
• 麥當勞（一期）— 標準麥記，$30 以下搞掂
• 肯德基（一期）— 快餐套餐，人均約 $40 起
• MOS Cafe（一期）— 漢堡 $35 起
• 敏華冰廳（二期）— 港式茶餐廳，叉燒炒蛋飯 $48 起，有冷氣有位坐
• 綠茶餐廳（二期）— 平價中菜，人均 $50 至 $80
• 元氣壽司（二期）— 迴轉壽司，$50 至 $80
• 麥奀雲吞麵世家（三期）— 雲吞麵 $40 起，老字號，口味穩陣

想食好少少：金子半之助（一期）天婦羅丼 $68 起，HABITU table（二期）café 風格人均 $60 至 100，Café & Meal MUJI（二期）日式定食$55 起。

大食代喺二期 1 樓，十幾檔嘢食一次過解決選擇困難，人均$40 至 70。

大角咀街坊小店

由 WK 再行遠少少入大角咀，選擇會更多：

• 富榮餐廳小廚（海庭路 16 號富榮花園）— 港式茶記，$50 以下
• 大觀園（海庭道 8 號富榮花園）— 粉麵米線，$50 以下
• 水門雞飯（櫻桃街 38 號西九匯）— 泰式海南雞飯，$51 至 $100
• 富榮花園兩餸飯 — 有 HKCC 學生分享過，Gap 堂會去呢邊食兩餸飯。相比商場餐廳，街坊兩餸飯通常更加抵食，適合想控制每日飯錢嘅學生。

想食好啲：$50 起

文華雞飯（新加坡）

地址：大角咀中匯街 17 號地舖
價錢：海南雞飯$51 至 $100
營業時間：每日 11:30 至 21:30

主打新加坡菜，第一次去可以先試海南雞飯。雞肉嫩滑，油飯亦夠香。飲品可以揀自家製薏米水。行過去大概 8 至 10 分鐘，值得專程去。

上海老家

地址：大角咀中滙街 61 號地舖
價錢：人均$50 以下
營業時間：每日 11:30 至 21:30

平民價嘅上海菜館，老闆掌廚超過 40 年。酸菜魚係招牌，味道偏酸辣，如果你鍾意食重口味，呢間會啱你。想食中菜又唔想去商場，可以考慮呢間。

偶爾想食好啲：PURADAK CHICKEN

如果想食韓式炸雞，又想舒舒服服坐低食，呢間可以考慮。炸雞皮脆肉嫩，餐廳裝修走黑金風格。人均$201 至 $400，比較適合幾個人一齊 share，唔係平日隨便食一餐嗰類。

深夜救命

英記油渣麵

地址：大角咀菩提街 4 號
價錢：$50 以下

40 年老字號，淨係賣油渣麵，另外有雞翼同芝士腸。深夜肚餓落去食一碗熱辣辣嘅油渣麵，再加碟油菜，一條友$50 有找。位置比較隱蔽，第一次去直接跟 Google Maps 搵會穩陣啲。

骨煲皇火鍋世家

地址：大角咀杉樹街 2-16 號金基大廈 1 樓
價錢：人均$100 至 $200
營業時間：下午 4 時至凌晨 3 時

開到凌晨 3 點嘅豬骨煲老字號，澳門正宗豬骨煲同特香胡椒豬骨煲係招牌，幾個人夾錢食一鍋，夜晚收堂之後仲想坐耐啲吹吓水，火鍋就啱晒。記得預鬆啲時間，繁忙時段可能要等位。

紅磡灣校園一帶

HHB 附近本身食肆唔算密集，但黃埔天地已經夠應付日常。如果肯再行遠少少去紅磡舊區，選擇會再多一截。

日常主力

岱民（紅磡）

兩餸 $28 至36，同旺角店一樣穩定。喺紅磡區嚟講，算係最平嘅正餐選擇之一。

黃埔天地

商場入面有太興、McDonald's 同 food court，日常食飯基本夠用。牛響度拌麵喺 AEON Style 入面，拌麵$50 以下，想食粉麵可以考慮。

連鎖快餐：大快活、譚仔、McDonald's

如果唔想諗太多，其實大快活、譚仔同 McDonald's 都係學生常見嘅日常選擇。好處係出餐快、價錢容易預算，而且部分時段仲可以配合學生優惠使用。

深夜

紅磡夜晚選擇唔算多，竹家同燒烤堂開得夜但人均唔平。想平價宵夜可以考慮串噹噹（川菜串燒，人均大約$70 至 $100）或者蒙麵（車仔麵$50 以下）。

理大本部飯堂

HKCC 學生可以搭穿梭巴士去理大本部，用 CC Smart Card 入校園之後，入面幾個主要飯堂都可以食。呢個係唔少新生開學之後先知嘅隱藏資源。

Communal Student Canteen（新 Can）

位置：文康大樓 3 樓
座位：520
食物：中式快餐、餃子、麻辣燙、自選飯
價錢：兩餸飯約$29，加$3 有熱飲
營業時間：10:30 至 19:30（最後落單 19:00）

兩餸飯$29，加$3 有熱飲，喺紅磡一帶嚟講算相當抵食。位雖然夠多，不過午市照樣會排長龍，最好避開 12 點正。

VA Student Canteen（舊 Can）

位置：Shaw Amenities 地下（The Forest）
座位：610
食物：亞洲菜、港式、咖喱、湯麵、焗飯
營業時間：08:00 至 20:00

網上對佢嘅評價一向麻麻，不過近年口碑好似改善咗。如果你真係想試，就記得降低期望。

U Garden

位置：CD Wing 及 DE Wing 平台
座位：約 310 個室內位，另有 148 個戶外位
食物：亞洲菜、西餐、燒味、漢堡、咖啡
營業時間：08:00 至 20:00

美心集團經營，選擇最多嘅飯堂，戶外座位天氣好嘅時候幾舒服。

有兩個鐘 Gap，先好考慮去 Poly 食

如果你得 40 分鐘至 1 個鐘空堂，專登搭 Shuttle 去理大本部食飯未必划算，來回加埋等車、排隊時間，食完可能已經要趕返堂。

但如果有 兩個鐘 Gap，就值得考慮。亦有 HKCC 學生分享，自己會趁兩個鐘 Gap 搭 Shuttle 去 Poly main campus 食飯。

簡單嚟講：

• 1 個鐘內：留喺校園附近食
• 約 1.5 個鐘：奧海城／大角咀會比較穩陣
• 2 個鐘或以上：可以搭 Shuttle 去理大本部食

學生優惠：食物相關篇

以下係截至本文更新時仍然有效嘅 F&B 學生優惠。部分係限時推廣，睇到啱用之前記得再確認一次；零售購物嗰啲留返 Post 5 講。

Threads 實測：學生平時其實點食？

睇返 HKCC 學生自己分享嘅食飯方法，最常見唔一定係留喺校園附近。

如果你有兩個鐘 Gap，唔少人會直接搭 Shuttle 去理大本部食飯；亦有人會去富榮花園搵兩餸飯。即係話，如果你堂與堂之間有足夠時間，其實「去 Poly main campus 食」本身就係一個幾實用嘅選項。

另外亦有學生直接表示平時會食：

• 大快活
• 譚仔
• McDonald's
• 沙嗲米
• 冰火配

所以如果你只係得一個鐘左右，M記、大快活、譚仔呢類快餐反而比專程搵街坊小店實際；有兩個鐘以上先比較值得搭 Shuttle 去理大本部。

食飽先有力追GPA

睇到呢度，你應該會發現一件事：冇飯堂，但其實真係唔缺嘢食。奧海城六十幾間食肆、大角咀一帶嘅街坊小店，再加埋理大本部飯堂做後援，食嘢嘅選擇比你想像中多得多。旺角又只係一個站，真係食厭咗附近，仲可以再行遠少少。

唯一要記住嘅係：唔好每次都走去 7-Eleven 就算。出校門行幾步，世界大好多。

至於食飽之後去邊，就睇你下一步想做咩：想知附近仲有咩好玩，可以再睇 Post 2 嘅天地堂路線；想知除咗食嘢之外仲有咩學生著數就等我哋下個post。