中學成績表會唔會影響入大學？JUPAS、非聯招、海外升學要求詳解
中學嗰張成績表，除咗有各科成績之外，仲可能有班級排名、操行、遲到缺席紀錄、老師評語，甚至一大堆「中文大使」、「開放日義工」、「學會幹事」之類嘅紀錄。
每次派成績表，見到自己考得差、排名跌咗，或者老師寫咗句「需要改善」，係咪都會忍唔住諗：「呢啲會唔會影響我入大學？」
答案通常冇你想像中咁嚴重！尤其係香港最常見嘅 HKDSE → JUPAS 路線，普通成績表入面嗰啲校內考試成績、班排名、老師評語、操行紀錄，並唔係一份會跟住你嘅「扣分表」。
但係，唔好因為咁就以為自己可以亂嚟。有啲升學途徑真係會用到學校成績，亦有少數情況會睇到其他學校提供嘅資料，所以唔好由而家開始放飛自我。
成績表到底幾時先會派上用場？
其實唔同升學途徑，對你中學校內成績嘅重視程度可以差好遠。最簡單可以先睇呢張表：
| 升學途徑 | 成績表重要程度 | 成績表／校內成績主要用嚟做咩？ |
|---|---|---|
| 一般經 JUPAS 申請大學 | 🟢 低 | 普通成績表唔係主要申請資料，核心始終係 DSE 成績 |
| SNDAS（學校推薦直接錄取計劃） | 🟠 較高 | 部分課程會要求校內成績、排名、預測 DSE 成績等學校資料 |
| SPN（校長推薦計劃） | 🟡 視乎情況 | 主要係由學校推薦學生，睇整體表現；成績表可以係其中一部分參考 |
| E-APP（大專院校網上聯招平台） | 🟡 有一定作用 | 俾你喺 DSE 放榜前申請部分大專課程，院校可以參考校內成績等資料，提早作有條件取錄 |
| 申請自資院校／NMTSS 課程 | 🟡 視乎院校 | 部分院校可以要求校內成績，亦可能用嚟作提早有條件取錄嘅參考 |
| 英國／海外升學 | 🟠 較常用 | 因為申請時未有正式 DSE 成績，預測成績、校內成績及學校推薦等可以成為申請資料 |
| 獎學金／交流／暑期等其他申請 | 🟡 視乎項目 | 部分項目會要求校內成績、排名或學校推薦 |
JUPAS = Joint University Programmes Admissions System／大學聯招辦法），即係中學生用 DSE 成績申請本地資助大學本科課程嘅主要聯招系統，例如港大、中大、科大、理大、城大等。
所以，唔係「成績表有冇用」咁簡單，而係你用緊邊條升學路線。
對大部分經 JUPAS 申請大學嘅學生，普通成績表嘅存在感其實好低；但一去到 SNDAS、提早有條件取錄或者海外升學，校內成績就可能突然變得重要。
咁 School Reference Report（SRR）又係咩？
講到呢度，好多人可能會問：「咁 JUPAS 唔係有份 School Reference Report 咩？咪即係學校將我啲資料交畀大學？」
有，但唔好將 SRR 當咗你平時收到嗰張成績表。
SRR（School Reference Report／學校評核報告）係由校長或者獲校長授權嘅老師代表學校提交，俾參與 JUPAS 嘅院校作參考。
而且最重要係：SRR 並非強制提交。 官方亦明確寫明，SRR 只供院校參考，最終由各院校自己決定會唔會、以及點樣將入面嘅資料放入收生評核。
即係話，唔好理解成：
「我張成績表好柒 → 學校交咗份 SRR → 大學睇到 → 然後扣我分」
根本唔係呢個運作方式。
對一般經 JUPAS 申請大學嘅學生嚟講，SRR 比較似係學校可以額外提供嘅一份參考資料，而唔係一張「校內成績單」或者一份大學必睇嘅評分表。你平時張成績表入面嗰啲校內試分數、班排名、老師寫嘅一句兩句評語，亦唔係因為有 SRR 就自動全部交咗畀大學。
🚨會認真睇你成績表：SNDAS 同 SPN
如果你唔係純粹靠正常 HKDSE 成績入大學，而係想玩 SNDAS 或 SPN，咁校內表現就開始有返啲存在感。
SNDAS（學校推薦直接錄取計劃）
每間中學每年有 2 個提名名額，而每個學生只可以申請一個參與計劃嘅指定課程。2027 cohort 由 2026 年 10 月開始提名，之後大學會安排面試／測試，成功嘅學生會喺 DSE 放榜前嘅 2027 年 6 月收到 firm offer。
一旦接受，個 offer 唔會再理你之後 DSE 考成點，JUPAS 申請亦會被取消。
而 SNDAS 最大分別就係：呢度真係會睇你學校張成績表。
例如有啲課程會要求中五、中六校內成績、級內排名、學校預測 DSE 成績等。（每個課程要求唔一樣）
SPN（校長推薦計劃）
呢個就小唔同。佢主要係俾校長推薦啲有突出非學術成就嘅學生，例如體育、藝術、領袖才能、社會服務等。每間學校都有名額，但名額係按該校 JUPAS 申請人數計/冇固定。
SPN 嘅特別之處係：大學可以喺 DSE 放榜前俾你 conditional offer 或 bonus points。 不過，conditional offer 當然要睇你有冇達到嗰間大學嘅條件。
SNDAS 同 SPN 嘅吸引力
對好多學生嚟講，SNDAS 同 SPN 最大嘅吸引力其實就係一種「特異功能／後門」feel：人哋仲等緊 DSE 放榜先知入唔入到，你已經攞住張 firm/conditional offer。
所以，你 DSE 嘅壓力自然細好多。即使你最後 DSE 冇考到自己原本預期嗰個分數，只要你嗰分數已經符合 offer 嘅條件，就保證你入到間院校。
當然，唔係有 SNDAS／SPN 就可以完全唔讀書，但對成功攞到 offer 嘅人嚟講，個心理壓力確實可以差好遠。
E-APP：放榜前報 Asso, High Dip 用
E-APP（專上課程電子預先報名平台），就係俾應屆 DSE 考生喺放榜前申請 JUPAS 以外嘅專上課程，包括高級文憑、副學士同部分自資學士課程。
因為你申請嗰陣仲未有 DSE 成績，所以 E-APP 會要求你填中四、中五全年同中六上學期嘅校內考試成績，院校亦可以用呢啲資料作收生參考。簡單講，喺 E-APP，校內成績係真係有用嘅。
對好多學生嚟講，E-APP 就係 DSE 放榜前先幫自己留條後路backup，提早攞個 conditional offer。每間院校嘅收生要求都唔同，所以唔係話校內成績好就一定可以翻盤，但至少同普通 JUPAS 比，成績表喺 E-APP 嘅存在感高好多。
申請自資大學／NMTSS 課程：八大以外嘅另一條路
| 院校／類型 | 點申請？ | DSE 放榜前可以申請？ | 校內成績有冇用？ |
|---|---|---|---|
| 香港樹仁大學（HKSYU） | E-APP、仁大自己嘅網上申請系統，亦接受郵寄／親身申請 | 🟢 可以 | 🟢 有用，非聯招申請要交中四至中六校內成績單 |
| 恒生大學（HSUHK） | HSUHK 自己嘅 Undergraduate Application System，或者 E-APP | 🟢 可以 | 🟢 有用，會參考校內學業紀錄 |
| 東華學院（TWC） | TWC 自己嘅 Admission System，部分課程亦可經 E-APP | 🟢 視乎課程 | 🟢 視乎課程 |
| 其他自資／NMTSS 課程 | 視乎院校，有啲自己收 direct application，有啲經 E-APP | 🟡 視乎課程 | 🟡 視乎院校 |
所以如果你想讀八大以外嘅自資大學，例如樹仁、恆大，唔一定要等 DSE 放榜先申請。好多院校都有自己嘅申請系統，亦有啲課程可以經 E-APP 提早申請。
而呢條路就真係會比較睇你份成績表。因為你申請嗰陣仲未有正式 DSE 成績，院校自然可以用校內成績、預測成績等資料先做初步收生。
英國／澳洲／美加等海外升學：成績表真係會有用
去到海外升學，情況就同 JUPAS 幾唔同。
因為香港 DSE 通常要到 7 月先放榜，但好多海外大學早幾個月已經開始收生，所以你申請嗰陣根本冇正式 DSE 成績可以俾佢睇。呢個時候，校內成績、預測 DSE 成績、學校推薦信／reference、academic transcript 就會變得重要。
| 地區 | 常見申請方法 | DSE 放榜前可以申請？ | 校內成績重要程度 | 主要睇啲咩？ |
|---|---|---|---|---|
| 🇬🇧 英國 | UCAS，部分課程另有要求 | 🟢 可以，而且通常係 DSE 前申請 | 🟠 較重要 | 預測 DSE 成績、老師 reference、學術成績；部分院校／課程會再要求 transcript 或其他文件 |
| 🇦🇺 澳洲 | 香港 DSE 學生好多時直接向大學申請 | 🟢 好多大學可以 | 🟠 視乎大學 | 預測／forecast DSE 成績、最新校內成績，之後再交正式 DSE 成績 |
| 🇺🇸 美國 | Common App／大學自己嘅系統 | 🟢 可以 | 🔴 通常較重要 | High school transcript、school report、老師／升學主任推薦信，以及其他院校要求嘅資料 |
| 🇨🇦 加拿大 | 例如 Ontario 大學經 OUAC，再配合院校要求 | 🟢 可以 | 🔴 較重要 | High school transcript、中六校內成績、預測 DSE 成績等；部分院校會直接用呢啲資料做初步評核 |
| 🇸🇬 新加坡 | 大學自己嘅申請系統 | 🟢 視乎院校及課程 | 🟠 視乎院校 | 預測 DSE／最新校內成績，部分大學之後要求正式 DSE 成績 |
| 🇳🇿 紐西蘭 | 一般直接向大學申請 | 🟡 視乎院校 | 🟡 通常冇英美咁重 | 主要仍然係睇正式 HKDSE 資格同成績，個別院校安排唔同 |
| 🌍 其他國家 | 多數係大學自己收 direct application，部分有中央平台 | 🟡 視乎國家／院校 | 🟡🟠 差異好大 | Transcript、預測成績、語言成績等，冇一套全球統一玩法 |
🇬🇧 英國
好多課程喺 DSE 放榜前已經截止申請，所以申請時會用 預測 DSE 成績、學校推薦 等資料。即係話，你平時校內成績會影響學校點樣預測你最後 DSE 考成點。
🇦🇺 澳洲
冇英國咁統一，視乎大學。有啲大學可以用 預測 DSE 成績 喺放榜前申請，亦有啲主要等正式 DSE 成績。校內成績有冇用，要睇返個別大學。
🇺🇸 美國
申請通常要交 中學成績單、學校評語、老師推薦 等資料，所以校內成績本身就係申請資料之一。相比 JUPAS，呢度就更加唔可以當份成績表冇到。
🇨🇦 加拿大
同美國比較似。部分大學喺 DSE 放榜前會用 中學成績單加預測 DSE 成績 做初步評核，所以中六校內成績都可能直接影響申請。
🇸🇬 新加坡
部分大學接受仲未有正式 DSE 成績嘅學生，用 預測 DSE 成績、校內考試成績或者最新校內成績 申請，之後再補正式 DSE 成績。
咁到底使唔使擔心成績表？
講到尾，對大部分學生嚟講，你份中學成績表其實冇需要擔心到咁誇張。尤其係正常經 JUPAS 入大學，最後始終係睇你 DSE 考成點。
你張成績表以前有幾次考得差、排名跌過，甚至老師寫咗句難聽嘅評語，唔代表呢啲嘢會一路跟住你入大學。好多時講到底就係張紙上面嘅幾隻字，唔使將佢諗到咁大件事。
當然，申請海外或者部分自資課程就真係可能會睇校內成績。但如果你問普通香港中學生最常見嘅 DSE → JUPAS 路線，唔好因為張成績表柒咗少少就覺得自己大學申請已經玩完。
