大學生Part-Time推介2026｜12種常見兼職、人工比較同返工指南

大學生到底應唔應該做兼職？

開學第二個星期，有人已經返緊第三份 part time，有人仲諗緊應唔應該返。差別唔係懶唔懶，而係有冇計過自己個 Sem 頂唔頂得順。

講真，冇一份兼職係非做不可。對大學生嚟講，兼職最大問題從來唔係人工低，而係時間貴。你一星期得 168 個鐘，瞓覺、上堂、溫書、hall 莊、soc 已經用咗大半，剩低嗰十幾個鐘值幾錢，就要自己計。

我會建議 Year 1 第一個 Sem 先唔好簽死約。用頭三星期摸清 workload，等 add drop 完，分好 group project 組員，先再決定返幾多。呢篇就係幫你一次過睇晒常見工種嘅人工，點樣計實際時薪，去邊度搵，同埋有咩法例同伏位要避。

大學生做兼職，有咩好處？

簡單講幾句，因為呢 part 唔係重點。

第一係有穩定零用錢，唔使下下問屋企攞，特別係住 hall 又多嘢玩嘅時候。第二係早啲知自己返工同讀書並行得唔得，總好過畢業先第一次返工，搞到炒車。第三係如果份工同主修有關，可以直接寫落 CV，例如讀傳理去剪片，讀 CS 去做 freelance 寫 web。

但反過來講：為咗 $45 一個鐘而走堂，搞到 GPA 跌 0.3，係最貴嘅 part time。GPA 跌咗要用成個 Sem 追，獎學金同 exchange 機會都冇埋。

大學生最常見兼職，一張 mega table 睇晒

先睇總表，之後逐個拆。想快睇就 skim 張表，碌落去再睇詳細版。

人工範圍係綜合 2026 年 JobsDB，Indeed，PartTime.hk 實盤同 Jobfinder 市場調查，實際以最新招聘為準。新手唔好用頂薪去計自己收入。

1. 補習，人工最高但最睇口碑

私補係大學生賺錢天花板。工作就係一對一教，小學全科、初中英文數學，DSE 就逐科教。家長最睇你 DSE 考幾多星、有冇 5 星，同埋有冇教開同級。

新手大學生一般由 $150-$200 起，小學 $200-$400，DSE 科 $350-$700，IB A-Level 或者醫科法律嗰啲可以去到 $600-$1,000 以上。補習社就穩定好多，大埔嗰類招聘實盤 $100-$160，市區 $120，唔使自己搵客，但要跟中心更表，仲要抽佣。

入行多數靠朋友介紹同 FB 補習群，Tutor Circle，A****School，HelloToby 都得。記住，私補要自己追糧，最好逐堂計清楚，唔好月結。第一次見家長最好約喺 public 地方，試堂前講清楚幾錢一個鐘，幾多分鐘一堂，cancel 點計。

2. 餐飲，入行最快但最攰

侍應、快餐店、咖啡店、廚房助理，全部都係常見嘅兼職。做嘢就係招呼，落單，上菜，收銀，清潔。薩莉亞呢類 2026 年兼職約 $55-$75，廚房 $50-$70。Pizza Hut 侍應 $50-$65，廚房 $48-$62。晚更同假日多數加 $5-$10。

好處係唔使經驗，肯做嘅話通常都比較易請，排更 app 自己揀更，通常包一餐。壞處係企足 6 至 8 個鐘，Friday night 同 weekend 通常最忙，closing 更收舖收到半夜，第二日 8:30am 有堂，長期咁樣返會好傷。

3. 零售銷售，最練人，但亦最容易受氣

便利店、時裝店、電話鋪、pop-up store、書局，全部都係呢類。7-11 日更 $45-$55，夜更 $50-$65。學生事務助理或者零售助理一般 $55-$80。

工作唔難，難在要笑住受氣，長企，成日補貨盤點。好處係學到 sales 同應對，識到好多同齡同事，時間相對餐飲冇咁夜。面試會問你可唔可以返 weekend，答唔得基本上唔請。

4. Event expo banquet，比較適合想短期搵快錢嘅人

書展，美食博覽，動漫節，電腦節，婚宴傳菜，攤位遊戲，超市推廣，全部都係呢類。人工最浮動，普通 helper $60-$80，攤位遊戲助手可以到 $90-$105，超市推廣 $500 做 7 小時。

呢啲工唔係成日有，通常暑假、聖誕等旺季先多，亦有唔少只係 weekend 有。好處係唔使長約，有時間先報，識到一大班同齡人。壞處係朝早企到夜晚，中間得半個鐘食飯，仲要講足全日。做 banquet 傳菜仲要行到腳起泡。

暑假通常係招聘最旺嘅時候，記住 4 月尾 5 月頭就要開始留意招聘，唔好等到 7 月先搵。

5. 校內工，想少啲影響 GPA 嘅人可以優先考慮

圖書館，IT helper，student ambassador，RA 研究助理，TA 教學助理，全部都係校內工。TA 本科一般 $120-$180，HKU 約 $140-$160，中大差唔多，科大 STEM 到 $160-$200。研究生再高，$220-$350。Student affairs assistant 散工 $55-$80，文書助理 $65。

工作舒服，行兩步就返到堂，professor 一般都體諒考試週。最大好處未必係錢，而係推薦信同人脈，申請 grad school 同獎學金時都有幫助。壞處係位少，要 GPA 好，或者 professor 識你先有位，所以要早問。

6. Freelance，自由但唔穩定

剪片，design，寫 IG 文，影 UGC，幫人整 notes 賣，幫手寫網頁，全部都係呢類。Social media assistant 歡迎大學生嗰啲約 $70 起，有經驗 $150-$300 一個鐘都得，熟客包月仲穩陣。

好處係地點時間全自由，喺宿舍都開到工，同主修有關嘅仲可以放落 portfolio。壞處係客拖數，改稿改到傻，冇單就零收入。新手最好經朋友介紹，或者靠 IG 作品集接，唔好一開始就去大平台同人鬥價。

7. Internship，多數暑假先有

Part-time intern 同暑期全職 intern。工作就係跟住 team 做 project、寫 report、跟 meeting。時薪 $60-$90，大公司暑期月薪 $12,000-$18,000 不等。

呢個唔係為錢，係為 CV。商科、IT、傳理呢類科特別睇呢啲。大公司多數 12 月至 2 月就截止申請暑期位，細公司就全年都有 part-time intern。Year 1 未必爭得過，可以先做 admin 或者 freelance 儲作品。

8. Admin clerical，最悶但最穩

打字、filing、接電話、key 數據。公營機構兼職文書約 $65，其他私人 $55-$80。

適合唔想做太需要動腦嘅工作、又唔想做體力活，只想坐冷氣房賺零用錢嘅人。返 office hour，夜晚唔使 OT，考試週易請假。缺點係悶到瞓著，CV 加分有限。

9. 外賣倉務物流，主要靠體力換取收入

Keeta、Foodpanda rider，門市理貨，冷運收派件，搬貨。底薪 $55-$75，另加單佣，每單 $5-$15，雨天高峰可以一晚多幾百蚊。PartTime.hk 長期請多區理貨，唔使跟車嗰啲。

錢係唔差，但風險同體力成本最高。夜更揸車，落雨，搬重嘢，全部都係真係攰。返之前計埋車油、保養、意外保險，唔好淨係睇高峰價。

10. 興趣導師同義工

教琴、教游水、教波，$200-$500 一堂，睇你教咩級，ABRSM 8 級係基本。有音樂、體育底嘅人可以善用，時薪可以高過餐飲幾倍。

義工就冇錢，NGO 最多比車馬費。唔好睇少，申請獎學金，exchange，grad school，面試官好鍾意問你做過咩 community service。為 CV 嘅話，一個長期義工好過三個短散工。

大學生一星期返幾多鐘？兼職時間點樣分配？

第一：add drop 完先決定。
開學頭兩星期唔好急住簽長約，等你知道每科嘅 workload、group project 點分組，同埋有冇 lab、presentation 之後，先決定自己可以返幾多更。Year 1 最常見就係一開始覺得自己時間好多，簽咗一星期三更，之後先發現幾科 project 同 midterm 撞埋一齊。

第二：midterm 同 final 前要預早減更。
Sem 1 通常 10 至 12 月開始密集，Sem 2 就 3 至 5 月比較忙。考試同 deadline 多嗰幾個星期，最好預早同經理講少返幾更，唔好等到考試前幾日先臨時請假。

第三：唔好同時塞太多課外活動。
如果你住 hall、玩 Ocamp、上庄、參加 soc，再加一星期十幾個鐘 part time，時間其實好快就用晒。尤其 Year 1 頭一個 Sem 仲未摸熟大學節奏，可以先由每星期 4 至 8 小時開始，之後再睇自己頂唔頂得順。

第四：避免返 closing 再接早堂。
例如中環 11 點收工，返到屯門可能已經 1 點，第二朝 8:30 又有 lecture，長期咁樣返工一定會影響休息。排更嗰陣，寧願揀 daytime 或 weekend，更加唔好只係為咗夜更多嗰幾蚊而犧牲睡眠。

大概可以咁分：Sem 期間每星期 4 至 8 小時，比較適合以 GPA 為優先；8 至 12 小時就比較進取；去到 15 小時以上，就要好小心自己嘅 workload。暑假時間多好多，可以再考慮 full-time 或一星期 30 至 40 小時嘅工作。Reading week 就最好留返少少時間做 buffer，唔好預先排到滿晒。

兼職真正要計嘅唔係時薪，而係實際時薪

呢個係成篇最值得記低嘅概念！好多人見到 $70 一個鐘，就覺得好高，其實要計埋車錢飯錢同車程。

舉個例：

時薪 $60，返 6 小時，即係 $360。但來回車程要 2 個鐘，車費 $30，食飯 $50。扣除車費同食飯後剩返 $280。你前後總共用咗 8 個鐘，實際時薪係 $35。

公式好簡單：

實際時薪 = 實收人工 ÷（工作時間 + 來回車程 + 必要準備時間）

再舉多個例子：屋企樓下咖啡店 $50，行路 10 分鐘唔使車錢。過海展覽 helper $75，但來回 2 小時加 $40 車錢。計完，樓下嗰份實際上可能仲抵，仲要冇咁攰。

所以搵工唔好只問邊份時薪最高，要問邊份實際時薪最高，仲要睇攰唔攰。

大學生去邊度搵Part-time工？咩時候搵最好？

搵Part-time工方法主要可以分做五類：

1. 網上招聘平台
JobsDB、Indeed、CTgoodjobs：職位最多，適合搵長期兼職、retail、admin、intern 等，但熱門職位通常多人爭。

2. 散工平台
PartTime.hk、Moovup：event helper、展覽、promoter、banquet 呢類散工比較多。見到高薪職位要留意工作內容，同埋記得核實招聘公司。

3. 校內渠道
CEDARS、OSA、系內 email、教授直接請人：通常係校內 TA、RA、student helper、admin 呢類工作。職位數量少，但時間通常比較容易配合上堂時間。

4. 朋友 Referral
私補尤其常見。朋友、同學、師兄師姐介紹通常比公開招聘更容易搵到客，尤其係同一間學校或者同一區嘅補習。

5. TG、FB、IG 社群
Event、promoter、私補同 freelance 職位比較常見，亦比較容易見到臨時散工。不過來源比較雜，見到筍工一定要先核實公司、工作地點同出糧方式。

幾時搵兼職最好？

搵工唔係等到放假先開始。香港大學生大致可以按住學期節奏去安排：

9 月：開 Sem
開學頭兩星期先摸清自己 timetable 同 workload。可以開始睇 campus job，亦可以準備定 CV，但唔建議一開始就簽死約。

10–11 月：Midterm 季
開始有 project、presentation 同 midterm。呢段時間唔適合突然增加返工時間，原本有返工嘅就最好預留減更空間。

12 月至 1 月：Winter break
Final 完之後有幾星期假期，零售聖誕 helper、餐飲 banquet、event 散工通常比較多，適合短期搵快錢。

1 月底至 2 月：農曆新年
花市、年貨零售、promoter、餐飲等短期工會增加。人工可能較高，但通常都比較辛苦。

3–4 月：DSE 季
DSE 筆試期間補習需求通常會增加，私補市場會比較旺，亦係比較容易搵到補習客嘅時候。

4 月底至 5 月：Final 季
全年其中一段最忙嘅時間，唔建議排太多更。尤其有 final、project 或 presentation 撞埋一齊嘅科，最好預早減更。

6–8 月：暑假
全年比較適合集中返工嘅時間。Summer intern、暑期工、書展、美食博覽、動漫節、展覽 helper 等都會有較多職位。

7 月放榜前後：私補旺季
DSE 放榜前後，家長開始為新學年搵補習，私補需求通常會再增加。

搵工要預幾耐？

唔同類型嘅工，招聘時間差好遠，最好預早睇：

• 聖誕 helper： 通常 10 月尾至 11 月開始出招聘
• 暑期 intern： 大公司好多由 12 月至 2 月開始申請
• 暑期散工： 通常 4–5 月開始大量招聘
• 私補： DSE 放榜前後通常會再有一輪需求

所以如果你想返某段時間嘅工，最好早一兩個月開始睇，唔好等到正式放假先搵。

見工之前一定要問清楚嘅 10 件事

以下 10 項，見工或者覆 offer 前最好白紙黑字問清楚。建議直接 copy 落 notes 去問：

1. 時薪幾多，點計，包唔包飯鐘
2. 出糧日期，銀行過數定現金，幾號截數
3. 每星期最低要返幾多更，一更幾個鐘
4. 可唔可以自己揀更，考試週可唔可以 cut 更
5. 有冇試工，試工有冇薪金，幾多
6. OT 點計，有冇補水，定係補假
7. 有冇交通津貼，飯鐘錢，夜更津貼
8. 工作地點會唔會成日調，有冇跨區
9. 要唔要簽合約，合約係咩形式，幾耐通知辭職
10. 病假事假點計，臨時請假會唔會扣錢

任何要求你返工前支付按金、培訓費、制服費、行政費嘅工作，都屬於高風險訊號，應立即停止申請。

香港大學生做兼職，勞工法例要知咩？

資料根據勞工處及積金局官方指引整理，最後核實為 2026 年 9 月。法例及金額會更新，最新規定應以官方公布為準。

1. 最低工資
由 2026 年 5 月 1 日起，法定最低工資為 $43.1／小時。僱主唔可以用合約條款減低你嘅法定權益。

2. 出糧同拖糧
工資期唔可以超過一個月，僱主一般須於工資期完結後 7 日內出糧。如果拖糧或者無故扣人工，記低返工時間同出糧紀錄，必要時向勞工處求助。

3. 兼職都有基本勞工保障
勞工法例唔係淨係保障全職員工。兼職、臨時工同替工同樣受到基本保障，例如工資支付、非法扣薪及法定假日等規定。

4. 「418」已改為「468」
由 2026 年 1 月 18 日起，連續性合約門檻由俗稱「418」改為「468」。如果你長期固定返同一份兼職，值得留意自己係咪符合資格，因為休息日、有薪年假、疾病津貼等部分權益會視乎合約類別而定。

5. 最好留返書面紀錄
人工、工作時間、出糧日期、通知期等最好喺合約、WhatsApp 或 email 留低。尤其係第一次返工，唔好只靠口頭承諾。

最重要： 見工或者覆 offer 前，至少問清楚時薪、工作時間、出糧日期、試工有冇薪金、請假同辭職安排。

大學生兼職常見求職陷阱

資料參考香港警方及反詐騙協調中心公布。

大學生搵兼職最常見嘅伏位，唔係份工辛苦，而係份工根本唔係你以為嗰份工。

見到以下情況要特別小心

• 人工高得唔合理：例如免經驗、在家工作，但聲稱每日輕鬆賺 $1,000。
• 要你先畀錢：按金、培訓費、制服費、平台費、加盟費等。
• 工作內容含糊：招聘寫文員，見工後先話要做借貸銷售或者拉客。
• 人工同合約講唔清楚：唔肯講時薪、出糧日期、工作地點或者最低返工時數。
• 試工無薪：要求你試做幾日甚至一星期，但完全唔出糧。
• 突然要求你做其他嘢：例如用自己名義開戶、代收公司款項或者代運不明包裹。
• 要求敏感資料：銀行密碼、提款卡、OTP 等正常僱主都唔應該要求。

尤其係最後幾種，可能已經唔只係普通求職陷阱，甚至涉及洗黑錢等刑事風險。

有懷疑就唔好交錢、唔好交證件，亦唔好繼續幫對方做交易。 可以致電「防騙易」18222 查詢，亦可以自行核實招聘公司資料。

到底應該揀邊種兼職？

睇到呢度，可以按自己情況揀：

冇一種工係完美。補習錢多但要備課，餐飲易入但攰，intern 靚 CV 但人工一般。你揀嘅時候問錢、問時間、問對未來有冇用，通常三樣之中只可以兼顧兩樣。

總結：大學生應唔應該做兼職？

大學生做兼職冇話一定好或者一定唔好，最重要係睇你自己嘅時間同目的。

如果主要想賺零用錢，可以考慮私補、餐飲、零售、event 呢類比較容易入行嘅工作；想為 CV 儲經驗，就可以優先睇 intern、校內工或者同主修有關嘅 freelance。

如果係 Year 1，尤其係第一個 Sem，其實唔使一開始就返好多。先用每星期 4 至 8 小時試下自己頂唔頂得順，熟習大學節奏之後再慢慢加都未遲。

始終兼職只係大學生生活其中一部分。搵到一份人工唔錯、時間配合到，又唔會影響 GPA 同休息嘅工，比單純追求最高時薪更加重要。

第一次返 part time 揀咩好？

零售、校內工、餐飲三揀一。夠穩、易請假，唔使自己搵客。私補同 freelance 留到有經驗先。

一星期返幾多個鐘最好？

Sem 期間每星期 4 至 8 個鐘最穩，8 至 12 小時算進取，超過 15 小時好易炒 GPA。暑假先 full push。

私補通常幾錢一個鐘？

新手 $150-$250 起，小學 $200-$400，DSE 科 $350-$700，IB A-Level 可以上 $600 以上。補習社 $100-$160 一個鐘。記得逐堂計清楚，唔好月結。

冇經驗可以做咩？

餐飲，零售，便利店，event helper，校內 student helper，全部都會請冇經驗嘅人。Freelance 就要先有作品。

如果你已經入咗 U，賺錢之餘記得用盡學生身份慳錢，呢幾篇都係寫俾大學生睇：