【2026 Reg Day 懶人包】各大專院校選課日期、Add/Drop 機制與搶科免死攻略

開Portal嘅一刻,先係大學生涯真正嘅起點
放榜、揀科、交表、等錄取信,你以為呢條路走完就完?其實真正令人手心冒汗嘅一刻,係Reg Day打開個選課系統,見住個心儀course quota喺度不停跳,700人爭50個位,你隻手指仲未撳到「確認」,個位就已經無咗。
呢種感覺,幾年前可能仲少人講,而家已經係開學前最大嘅集體焦慮之一。所以呢篇文,我哋將2026年各大院校嘅Reg Day日期整合埋一齊,再教你點樣唔會手忙腳亂。
Reg Day(Registration Day/註冊日)係你正式向大學「登記」做學生嘅日子,通常包括交文件、影學生證、揀宿舍安排,同埋最重要嘅——選課。唔同院校用嘅字眼可能係Enrollment Day、Orientation Day或者Welcome Day,意思大同小異。
2026 各大專院校 Reg Day 日期一覽
呢個表幫你哋整理好,按時間順序排,方便你快速搵到自己間學校:
| 院校 | Reg Day / 相關活動日期 |
|---|---|
| 香港樹仁大學 | 8月5–6日 |
| 香港中文大學 | 8月6日 |
| 香港科技大學 | 8月6–7日(部分工程學院活動延至8月10日) |
| 香港大學 | 8月8–9日 |
| 香港浸會大學 | 8月10–11日 |
| 香港理工大學 | 8月12–14日 |
| 香港城市大學 | 8月12–15日(待確認) |
| 香港都會大學 | 8月13日 |
| 聖方濟各大學 | 8月13–14日、17日 |
| 香港教育大學 | 8月14日、17日 |
| 嶺南大學 | 8月24日 |
| 香港恒生大學 | 8月24日 |
表上部分日期其實係Orientation/Master Registration(返學校交文件、影相、簽宿舍合約嗰種),唔一定就係網上選課(Online Course Selection)嗰日,兩個日期記得分開留意。
港大Year 1嘅Semester 1網上選課窗口係8月18–24日,同表上8月8–9日嘅返校註冊日唔同;理大Year 1嘅Subject Registration亦係8月21–25日左右(8月17–20日仲有Mock Registration畀你熟習系統),同8月12–14日嘅Orientation活動亦分開嚟。
各院校每個學院/課程嘅安排都可能唔同,性質亦分正式註冊、Enrollment Day、Orientation Day、Welcome Day同Welcome Roadshow幾種。實際日期同時間,一定要以你收到嘅錄取信、學生電郵,同院校最新公告為準,呢個表只係俾你有個大概時間表。
Add/Drop係咩?點解人人講到好緊張
先講最核心嘅概念:Add/Drop Period(加退選期)。
簡單講,你Reg Day揀嘅科目唔係即刻定死。開學之後大學會俾你一段時間(通常一至兩個星期),畀你「加」返啱心水但之前爆滿嘅科,或者「退」返揀錯/唔啱嘅科。呢段期間就叫Add/Drop Period。
點解會咁緊張?因為熱門科(尤其係啲教得好、又計分容易嘅)永遠爭崩頭。你Reg Day見到quota爆晒唔代表無機會,因為總有人試堂之後覺得唔啱、退咗,個位就會放出嚟。Add/Drop期就係你執漏嘅黃金機會。
有啲學校(例如中大)用「先到先得+年資排序」嘅方式處理加選申請,即係你交得越早、你個年級越高(Year 3好過Year 1),優先權越大。有啲學校就用SIS系統自動配對,你要留意自己間學校用邊種方式。
中大CUSIS入面有個「Shopping Cart」功能,好多新生誤以為將科放咗入Cart就等於已經揀咗。唔係。放入Cart之後撳「Validation」,個系統淨係幫你check時間有冇撞、Prerequisite夠唔夠,唔會即刻幫你留位。真正搶位要去到選課當日親手撳「Enroll」先算數,唔撳嘅話個位隨時比人搶咗。
簡單啲講就係: Reg Day選唔到心水科唔代表世界末日,Add/Drop先係你真正嘅第二次機會,記得留意學校電郵通知幾時開始同幾時完。
Common Core / GE到底係咩,同我個Major有咩關係
好多新生見到「Common Core」、「General Education(GE)」、「通識」呢啲字就一頭霧水,因為DSE年代冇呢個概念。
Common Core/GE就係大學逼你揀嘅「非本科」課程,通常橫跨唔同學科範疇(例如科學、人文、社會),目的係唔想你讀完四年淨係識自己個學系嗰啲嘢。
用個比較貼地嘅比喻:如果你個Major係主線任務,Common Core就係遊戲入面嘅「支線任務」——你唔一定鍾意做,但唔做完就唔畀你解鎖畢業呢個成就。有啲支線做完先發現原來幾有用(識咗新技能、識咗新朋友),有啲就純粹磨時間,但兩樣你都要修夠Credits先過關。
每間大學叫法唔同:
- 港大:Common Core(分幾個Area of Inquiry)
- 中大:University General Education(UGE)
- 科大:Common Core(分Humanities/Social Analysis/Science & Technology幾類)
- 理大/城大等:一般叫GE或Core Curriculum
呢啲科通常學分唔重(3學分為主),但因為人人都要揀,加上部分「hea科」出晒名易讀又易攞高分,所以Reg Day最快爆嘅往往唔係本科課程,反而係呢啲GE。
開學前上下年嘅Instagram、Reddit(r/HongKong相關)、或者你間大學嘅迎新群組,搵吓邊啲GE科出名「靚Grade」、邊啲係公認嘅「神科」,好過Reg Day先臨時揀。
咁我一定要去Reg Day咩?
呢個係好多新生真心會問嘅問題,答案係:視乎你間學校,但99%情況你都應該去,或者最少準時網上完成。
- 大部分院校嘅Reg Day唔淨係選課咁簡單,仲包括交入學文件正本、影相整學生證、簽宿舍合約(如果有宿位)、甚至醫療紀錄登記。呢啲手續好多都要求你「親身」到場,網上係搞唔掂。
- 就算學校話「選課可以之後網上做」,你都好可能要去攞Student ID、開閘卡,冇呢張卡你連入圖書館、上堂嘅課室大樓都入唔到。
以港大、中大、科大、理大、城大、浸大、嶺大、教大、恒生呢批JUPAS主要degree課程院校嚟講,Reg Day基本上係必去項目,唔存在「可去可唔去」呢種選擇。
就算你覺得「唔緊要遲少少去」,Reg Day遲到隨時等於熱門科自動被人揀晒,甚至個學生身份都未正式生效,連帶部分獎學金、宿位確認都可能受影響。除非你有醫生紙或者特殊原因申請延期,否則預咗要去,仲要準時。
Backup Plan:揀科唔係「一擊必殺」
新生最常犯嘅錯,係淨係諗住揀最想要嗰5科,冇諗過plan B。以下係實戰策略:
大部分大學會自動幫Year 1新生預先排好Major核心堂同埋中英文必修科,呢啲叫Auto-enrolled/Pre-assigned課程。千祈唔好因為想試下換堂,就手多多將呢啲科Drop咗——一旦手動退咗,之後想搶返個位隨時要重新排隊,運氣差嘅可能成個Term都補唔返。
想將A科換成B科嘅時候,千祈唔好先Drop咗A先至去Add B,因為如果B已經爆滿,你就會兩科都冇埋,雙輸收場。正確做法係用系統入面嘅「Swap」功能:如果新科加唔到,系統會自動幫你保留返原本嗰科,唔會兩頭唔到岸。
- 每一個時段最少準備1–2個backup:你想上嘅堂同你嘅backup堂,時間唔可以撞。開Excel或者用學校自己個Planner,將所有可能撞期嘅組合都試埋。
- 摸清楚啲科嘅「爆滿速度」:學長學姐、Instagram迎新群組會有情報,邊啲科係「一開Portal即刻被清」,邊啲科「幾日之後都仲有位」。
- 留意Waitlist機制:好多學校爆滿之後仲有等候名單(Waitlist),唔代表冇位就即刻放棄,記得問清楚你間學校點運作。
- GE同Major科分開諗策略:Major必修科通常學校會盡量confirm你個位,反而GE、選修科先係真正嘅戰場,backup應該優先集中喺呢啲科度諗。

Reg Day 生存清單
出門前check多次好過臨時走漏眼:
- 手機、電腦電量full晒,充電器都帶埋
- 網絡有backup(校園wifi+自己data plan),以防人多塞爆
- 錄取信、身份證、學生證(如已有)文件正本+副本各帶一份
- 提早寫低自己嘅選課清單,包括每個時段嘅backup科
- Screenshot自己個選課結果,同存返落手機/電腦(唔好淨係信個系統)
- 記低學校IT Helpdesk電話同電郵,Portal死機唔驚冇人幫
- 見到排隊畫面(例如城大AIMS、港大/科大SIS、中大CUSIS嘅Queue Screen)唔使慌,係正常現象,千祈唔好狂撳F5強制refresh,否則好大機會被踢返去隊尾重新排過
最後講句
Reg Day真係好chur,但講到尾,佢淨係一個開始,唔係整個大學生涯嘅定局。揀漏咗科、跌咗心水堂,之後靠Add/Drop、靠問學長學姐,通通有得補救。緊張係正常,但唔使畀個Portal嚇到自己亂晒陣。
如果Reg Day之後仲要諗宿舍嘅嘢,執行李同揀宿舍嘅細節我哋都有寫過,可以睇埋呢兩篇:



